ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 တီႈသီႇသႅင်ႇ ၼၼ်ႉယၢမ်းလဵဝ် ယူတ်းယႃတူဝ်ဝႆႉတီႈ ႁူင်းယႃၸဝ်ႈၸၢမ်ႇထုၼ်းတူၼ်ႈတီး၊ ဢွင်ႈတီႈဢၼ်မၼ်းၸၢႆးလႆႈတူင်ႉၼိုင် ၵႂႃႇမႃး ၼႂ်းပိုၼ်ႉတီႈၸိူဝ်းၼၼ်ႉ ၸဝ်ႈၼႃႈတီႈဢိုတ်းဝႆႉ တႃႇၶၢဝ်းတၢင်း 14 ဝၼ်း။

ၵူၼ်းပဵၼ်ၵေႃႉထူၼ်ႈ 245 ၼႆႉ မၼ်းၸၢႆးၵႂႃႇႁဵတ်းၵၢၼ် သဵၼ်ႈတၢင်း (လမ်းလုပ်သား) တၢင်းဝဵင်းမျိတ်ႉၵျီးၼႃး ၸႄႈမိူင်းၶၢင်သေ ပွၵ်ႈမႃးၶိုၼ်းသၢႆးၶၢဝ် ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း မိူဝ်ႈဝၼ်းတီႈ 21 လိူၼ်မေႊပူၼ်ႉမႃးၼႆႉ ၼႆယဝ်ႉ။

ယူႇတီႈႁွင်ႈၵၢၼ်ၾၢႆႇမေႃယႃပိုၼ်ၽၢဝ်ႇဢွၵ်ႇဝႆႉတႄႉ ၵူၼ်းပဵၼ် ၵေႃႉထူၼ်ႈ 245 ၼႆႉ ၽွင်းပွၵ်ႈမႃးၶိုၼ်းႁိူၼ်းၼၼ်ႉ ဢမ်ႇလႆႈၵုမ်းတူဝ်ဢွင်ႈတီႈဢၼ်တမ်းဝႆႉ (Facility Quarantine) ၊ ႁႂ်ႈၵုမ်းတူဝ်ယူႇဝႆႉတီႈႁိူၼ်း Home Quarantine ၵူၺ်း ၵူၼ်းပိုၼ်ႉတီႈသီႇသႅင်ႇ လၢတ်ႈၼႄၼင်ႇၼႆ။

“ယူႇတီႈႁွင်ႈၵၢၼ်ပၢႆးယူႇလီၶဝ် ပိုၼ်ၽၢဝ်ႇဢွၵ်ႇမႃး တႃႇၵူၼ်းပဵၼ်ၼၼ်ႉ ဢမ်ႇလႆႈႁၢမ်ႈၵႂႃႇတၢင်းလႂ် ဢၼ်ဝႃႈၼၼ်ႉ ဢမ်ႇပႃး။ ႁၼ်ဝႃႈ ႁႂ်ႈမၼ်းၸၢႆး ၵုမ်းတူဝ်ယူႇတီႈႁိူၼ်း Home Quarantine ၵူၺ်း” ဝႃႈၼႆ။

ၵူၼ်းပဵၼ်ၵေႃႉထူၼ်ႈ 245 ၼႆႉ မၼ်းၸၢႆး ယူႇတီႈပွၵ်ႉတတႃးဢူး။ ၵူၺ်းၵႃႈ တီႈပွၵ်ႉၺွင်ႇပိၼ်ႇတႃႇလႄႈ ၵၢတ်ႇသၢႆးၶၢဝ် 2 တီႈၼၼ်ႉတႄႉ လႆႈပိၵ်ႉဢိုတ်းဝႆႉၸူဝ်ႈၶၢဝ်း ယွၼ်ႉမၼ်းၸၢႆးၵႂႃႇဢႅဝ်ႇယဵမ်ႈၸိူဝ်းၼၼ်ႉ ဢူးၸၢမ်ႇဝိၼ်းမွင်ႇ ၵူၼ်းပွၵ်ႉဢွင်ႇၶျၢမ်းတႃႇ ဝဵင်းသီႇသႅင်ႇ လၢတ်ႈၼႄၼင်ႇၼႆ။

ဢွင်ႈတီႈၸိူဝ်းၼၼ်ႉ တႄႇဢဝ် ဝၼ်းတီႈ 10/6/2020 ၼႆႉမႃး လႆႈပိၵ်ႉဢိုတ်း Lockdown ဝႆႉ တႃႇၶၢဝ်းတၢင်း 14 ဝၼ်း ဝႃႈၼႆ။

ဢူးၸၢမ်ႇဝိၼ်းမွင်ႇ သိုပ်ႇလၢတ်ႈဝႃႈ “ၵူၼ်းပဵၼ်ၵေႃႉထူၼ်ႈ 245 ၼႆႉ ဢၼ် မၼ်းၸၢႆးလႆႈ ႁူပ်ႉထူပ်းၶဝ်ႈႁႃၵႂႃႇၸူးၵၼ်မီးယူႇ မွၵ်ႈ 8 ၵေႃႉၼႆႉ။ ယၢမ်းလဵဝ် ၵူၼ်းၸိူဝ်းၼၼ်ႉၵေႃႈ လႆႈသူင်ႇၵုမ်းတူဝ်ဝႆႉတီႈႁူင်းယႃယဝ်ႉ” ဝႃႈၼႆ။

ၵူၼ်းပဵၼ်ၵေႃႉထူၼ်ႈ 245 ၼႆႉ ႁွင်ႈၵၢၼ်ပၢႆးယူႇလီ ပိုၼ်ၽၢဝ်ႇထူပ်းႁၼ် ၸိူဝ်ႉမႅင်းၶူဝ်ႊဝိတ်ႉ – 19 မိူဝ်ႈဝၼ်းတီႈ 9/6/2020 ပူၼ်ႉမႃးၼႆႉ ။ ၵူၺ်းၵႃႈ မၼ်းၸၢႆးၼႆႉ ဢမ်ႇမီးပိုၼ်းဢွၵ်ႇၼွၵ်ႈမိူင်း ဢမ်ႇမီးပိုၼ်းလႆႈႁူပ်ႉထူပ်း ၵူၼ်းမီးၸိူဝ်ႉမႅင်း ဝႃႈၼႆ။

တေႃႈလဵဝ် ၼႂ်းမိူင်းတႆးၼႆႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 မီး 3 ၵေႃႉ ပွတ်းၸၢၼ်း 2 ၵေႃႉလႄႈ ပွတ်းႁွင်ႇ 1 ၵေႃႉ။ ပွတ်းၸၢၼ်း 2 ၵေႃႉၼၼ်ႉတႄႉ ယၢမ်းလဵဝ် ယူတ်းယႃတူဝ်ဝႆႉတီႈႁူင်းယႃလူင်ၸဝ်ႈၸၢမ်ႇထုၼ်း။ ပွတ်းႁွင်ႇၼၼ်ႉတႄႉ လႆႈယူတ်းယႃဝႆႉတီႈႁူင်းယႃလူင် မူႇၸေႊ ဝႃႈၼႆ။

ၼႂ်းမိူင်းႁူမ်ႈတုမ်ၼႆႉ ယၢမ်းလဵဝ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 တင်းမူတ်းမီး 260 ၵေႃႉ။ လူႉတၢႆ 6 ၵေႃႉ၊ ယူတ်းယႃ 89 ၵေႃႉလႄႈ ယႃၶႅၼ်း 165 ၵေႃႉ ယူႇတီႈႁွင်ႈၵၢၼ်ပၢႆးယူႇလီ ပိုၼ်ၽၢဝ်ႇဢွၵ်ႇဝႆႉ။