ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 တီႈမူႇၸေႊ ၵေႃႉထူၼ်ႈ 231 ၼၢင်းမေႃယႃ (Nurse) ဢႃယု 30 ပီ ၼၼ်ႉ ယၢမ်းလဵဝ် ယူတ်းယႃတူဝ်ဝႆႉတီႈႁူင်းယႃမူႇၸေႊ ပၢႆးယူႇလီမၼ်းၼၢင်းၶႅမ်ႉလႅပ်ႈယူႇ ၽူႈတႅၼ်းသၽႃးမူႇၸေႊ လၢတ်ႈၼႄၼင်ႇၼႆ။
ၸၢႆးၵျေႃႇတဵင်း ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းပဵၼ် တီႈမူႇၸေႊၵေႃႉၼႆႉ ယူႇလီၵိၼ်ဝၢၼ်ယူႇ။ ၵူၼ်းၸိူဝ်းဢၼ်မၼ်းၼၢင်း လႆႈႁူပ်ႉထူပ်း 160 ၵေႃႉပၢႆၸိူဝ်းၼၼ်ႉၵေႃႈ ၵူတ်ႇထတ်းတူၺ်းမူတ်းယဝ်ႉ ဢမ်ႇမီး ၸိူဝ်ႉမႅင်းသေၵေႃႉ” ဝႃႈၼႆ။
ၼၢင်းမေႃယႃ ၵူၼ်းတိတ်းၸပ်းတၢင်းပဵၼ်ၵေႃႉထူၼ်ႈ 231 ၼႆႉ မိူဝ်ႈဝၼ်းတီႈ 2/6/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ပၢႆးယူႇလီ ပိုၼ်ၽၢဝ်ႇဢွၵ်ႇမႃး ထူပ်းႁၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ -19 ၼႆသေ လႆႈၶဝ်ႈယူတ်းယႃတူဝ်တီႈႁူင်းယႃ မူႇၸေႊ ၵမ်းလဵဝ်။
ၸၢႆးၵျေႃႇတဵင်းလၢတ်ႈဝႃႈ – “ယွၼ်ႉဝႃႈ ႁွင်ႈၵၢၼ်ၾၢႆႇပၢႆးယူႇလီ ဢွၵ်ႇဝႆႉ ၸိူဝ်းပဵၼ်ၽူႈႁၢပ်ႇၵၢၼ်ၾၢႆႇပၢႆးယူႇလီၵူႈၵေႃႉၼႆႉ တေလႆႈၵူတ်ႇထတ်းတၢင်းပဵၼ်ၼႆသေ မၼ်းၼၢင်းၵႂႃႇ ၵူတ်ႇထတ်းလႄႈ ႁၼ်မႅၼ်ႈၸိူဝ်ႉမႅင်းတၢင်းပဵၼ်ၵူၺ်း။ ဢမ်ႇၸႂ်ႈမၼ်းၼၢင်းၸပ်းတၢင်းပဵၼ် တၢင်းၼွၵ်ႈမႃး”ဝႃႈၼႆ။
ၼၢင်းမေႃယႃ ဢႃယု 30 ပီၼႆႉ ယူႇတီပွၵ်ႉႁူဝ်မူၼ်ႇ ၸႄႈဝဵင်းမူႇၸေႊ တီႈယွမ်ႇမၼ်းၼၢင်းယူႇၼၼ်ႉ တေႃႇထိုင်ယၢမ်း လဵဝ် တိုၵ်ႉပိၵ်ႉဢိုတ်းLock Down ဝႆႉယူႇ ႁၢမ်ႈၵူၼ်းၶဝ်ႈဢွၵ်ႇမႃး ဝႃႈၼႆ။
ၼႂ်းၸႄႈဝဵင်းမူႇၸေႊၼႆႉ မီးၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၼႆႉမႃး မီး 2 ၵေႃႉ ပႃးၵေႃႉၼႆႉယဝ်ႉ။ မိူဝ်ႈဝၼ်းတီႈ ဝၼ်းတီႈ 24/4/2020 ထဝ်ႈယိင်း ဢႃယု 87 ပီ ၵူၼ်းပွၵ်ႉၵၢတ်ႇ ၸႄႈဝဵင်းမူႇၸေႊၼၼ်ႉၵေႃႈ ထူပ်းႁၼ်တိတ်း ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 ၼင်ႇၵဝ်ႇ၊ လႆႈယူတ်းယႃတူဝ်တီႈႁူင်းယႃမူႇၸေႊသေ ထိုင်မႃး ဝၼ်းတီႈ 9/5/2020 မၼ်းၼၢင်းယူႇလီ ဢမ်ႇမီးမႅင်းယဝ်ႉလႄႈ ပွၵ်ႈမိူဝ်းႁိူၼ်းၶိုၼ်းယဝ်ႉ ဝႃႈၼႆ။
ယၢမ်းလဵဝ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းတႆးၼႆႉ တင်းမူတ်းမီးဝႆႉ 3 ၵေႃႉ။ တီႈႁူင်းယႃလူင် ၸဝ်ႈၸၢမ်ႇထုၼ်း ၸႄႈဝဵင်းတူၼ်ႈတီး 2 ၵေႃႉလႄႈ တီႈမူႇၸေႊၼႆႉ 1 ၵေႃႉ ဝႃႈၼႆ။
ၼႂ်းမိူင်းႁူမ်ႈတုမ်ၼႆႉ ယၢမ်းလဵဝ် ၵူၼ်းၸပ်းတၢင်းပဵၼ် တင်းမူတ်းမီးယူႇ 260 ၵေႃႉ။ လူႉတၢႆ 6 ၵေႃႉ၊ ယႃၶႅၼ်း 165 ၵေႃႉ၊ ယူတ်းယႃဝႆႉ 89 ၵေႃႉ ယူႇတီႈႁွင်ႈၵၢၼ်ပၢႆးယူႇလီပိုၼ်ၽၢဝ်ႇဢွၵ်ႇဝႆႉ။
