ႁူင်းၸၢၵ်ႈတႅင်ၾၢင်/တဝ်ႈ တၢင်းၾင်ႇမိူင်းၶႄႇ ပွႆႇၼမ်ႉလၢႆႇ တူၵ်းၼမ်ႉလႄႈ ႁဵတ်းႁႂ်ႈ ၼမ်ႉမၢဝ်းၶုၼ်ႇလႅင် ထပ်းၵၼ်မႃးလၢႆလၢႆ ဝၼ်း – ပႃလႄႈတူဝ်သတ်းၼႂ်းၼမ်ႉၵေႃႈ တၢႆၼမ် ဝႃႈၼႆ။

တႄႇဢဝ် ဝၼ်းတီႈ 9/6/2020 ယၢမ်းဝၢႆးဝၼ်း မွၵ်ႈ 3 မူင်းမႃး ၵႄးၼမ်ႉမၢဝ်း (မႄႈၼမ်ႉလႅၼ်လိၼ်တႆး-ၶႄႇ) ပွတ်းဝဵင်းမူႇၸေႊ ၸိုင်ႈတႆးပွတ်းႁွင်ႇ ယဵၼ်းပဵၼ်သီလႅင်၊ ယွၼ်ႉႁူင်းၸၢၵ်ႇတႅင် တၢင်းၾင်ႇမိူင်းၶႄႇ ဢိတ်ႇတႅင်ပႅတ်ႈတူၵ်းလူင်းသႂ်ႇၼႂ်းၵႄးၼမ်ႉယၢင်း ဢၼ်လႆၶဝ်ႈၼႂ်းၵႄးၼမ်ႉမၢဝ်း – ၼႆယဝ်ႉ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၼမ်ႉမၢဝ်းၼႆႉ လႅင်မႃးလႆႈသွင်သၢမ်ဝၼ်း ယဝ်ႉ။ ၼမ်ႉမၢဝ်းလႅင်ၼႆႉ ဢမ်ႇၸႂ်ႈဝႃႈ ၾူၼ်တူၵ်းသေလႅင်ၸိူင်ႉၼၼ် မၼ်းလႅင်ဝႆႉထႅင်ႈပိူင်ၼိုင်ႈ။ ၵဵဝ်ႇၵပ်းလွင်ႈၼႆႉ ပီႈၼွင်ႉႁဝ်းၶႃႈဝၢၼ်ႈၼမ်ႉသွၼ်းလၢတ်ႈၼႄတႄႉ ၼမ်ႉယၢင်းၼႆႉ တိတ်းၸပ်းႁူင်းၸၢၵ်ႈဢိတ်ႇတႅင်တၢင်းမိူင်းၶႄႇ၊ ၶဝ်ဢိတ်ႇတႅင်လႅဝ်ယဝ်ႉသေ ထွၵ်ႇသႂ်ႇၼႂ်းၼမ်ႉယၢင်း။ ၼမ်ႉယၢင်းၼႆႉသမ်ႉ လႆၶဝ်ႈၸူးၼႂ်းၼမ်ႉမၢဝ်း၊ ဢွင်ႈတီႈလႆၶဝ်ႈ ၼၼ်ႉ ၼႂ်းၵႄႈၵွင်းၶၢင် – ၼမ်ႉသွၼ်း တၢင်းယွမ်ႇၸိၼ်ႊသၢၼ်ႊ​​ၵျေႃႈၼၼ်ႉ” ဝႃႈၼႆ။

သိုပ်ႇလၢတ်ႈဝႃႈ “ၼမ်ႉယၢင်းၼႆႉ လုၵ်ႉတၢင်းပၢင်ႇသၢႆးသေလႆမႃး၊ လွင်ႈၼႆႉၵေႃႈ ႁဝ်းၶႃႈ လႆႈထၢမ်ၵႂႃႇတၢင်း ပီႈၼွင်ႉပၢင်ႇသၢႆးႁဝ်းၶႃႈယူႇ ဝႃႈၼမ်ႉယၢင်းၼႆႉ ၸွင်ႇလႅင်မိူၼ်ပွတ်းမူႇၸေႊ၊ ၵူၼ်းပၢင်ႇသၢႆးႁဝ်းလၢတ်ႈမႃးဝႃႈ တီႈၼၼ်ႈၼမ်ႉယၢင်းဢမ်ႇလႅင်ၼႆၶႃႈ။ ပေႃးၼႆ ၼမ်ႉၼႆႉ တႄႇလႅင်မႃးတီႈယွမ်ႇၸိၼ်ႊသၢၼ်ႊ​​ၵျေႃႈ ၼႂ်းၵႄႈၵွင်းၶၢင် တင်း ၼမ်ႉသွၼ်းၼၼ်ႉတႄႉ”ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၵူၼ်းဢဝ်သၢႆး တီႈပွၵ်ႉတူဝ်ႇယွတ်ႈ ၵေႃႈဝႃႈ ၼမ်ႉမၢဝ်းၼႆႉ တႄႇလႅင်မႃး မိူဝ်ႈဝၼ်းတီႈ 9 ယၢမ်းဝၢႆးဝၼ်း၊ ၵူၺ်းၵႃႈ မိူဝ်ႈဝႃးၼႆႉလႅင်ႁႅင်းဝႆႉ၊ တေႃႇထိုင်မိူဝ်ႈၼႆႉၵေႃႈ တိုၵ်ႉလႅင်ယူႇ ဝႃႈၼႆ။

ယွၼ်ႉၼမ်ႉမၢဝ်းလႅင်ၼႆႉသေ တူဝ်သတ်းၼမ်ႉ ပႃၼႂ်းၼမ်ႉမၢဝ်း ၼမ်ႉယၢင်း ၸိူဝ်းၼၼ်ႉၵေႃႈ ႁၼ်တၢႆ ႁၼ်ၽူးဝႆႉ တင်းၼမ် ဝႃႈၼႆ။

“တေႃႈလဵဝ်ၼႆႉ ၸဝ်ႈၼႃးႁဝ်းၶႃႈတေတဵင်ၼမ်ႉယၢင်းသေ ဢဝ်သႂၢင်းၼႃးၼႆ ပႆႇၸၢင်ႈသႂၢင်း၊ ယွၼ်ႉဝႃႈ ၼမ်ႉၼႆႉ မၼ်းလႅင်ဝႆႉလႄႈ ၸဝ်ႈၼႃးမၢင်ၵေႃႉ ထူပ်းတၢင်းယၢပ်ႇၽိုတ်ႇဝႆႉ” ၸဝ်ႈၼႃးတၢင်းမူႇၸေႊ ၵေႃႉၼိုင်ႈ လၢတ်ႈၼႄၼင်ႇၼႆ။

ၼမ်ႉမၢဝ်းၼႆႉ တႄႇႁူဝ်မႃးတၢင်းမိူင်းမႅၼ်း(ယုၼ်ၼၢၼ်/မိူင်းၶႄႇ) လႆလတ်း ၼႃႈလိၼ်ၽွင်းငမ်းတူဝ်ၵဝ်ႇတႂ်ႈၶူင်း၊ လႆလတ်း တတ်းပဵၼ် လႅၼ်လိၼ် မိူင်းႁူမ်ႈတုမ်မၢၼ်ႈ တင်း မိူင်းၶႄႇ ၸႄႈမိူင်းယုၼ်ၼၢၼ်၊ လတ်းဝၢႆႈၼႂ်းၸႄႈဝဵင်းမူႇၸေႊ ၼမ်ႉၶမ်း မၢၼ်ႈတူင်ႈ မၢၼ်ႈပဵင်း မိူင်းမိတ်ႈၸိူဝ်းၼႆႉ သေ ၶဝ်ႈႁူမ်ႈ ၼမ်ႉၵဵဝ်ႇ တီႈၵဝ်ႇၸၢင်ႈပေႃႈ ၸႄႈဝဵင်းၸၢင်ႉပေႃႈ(သိၼ်ႇပူဝ်ႇ)။