ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းၸိုင်ႈတႆးပွတ်းၸၢၼ်း မီးမႃးထႅင်ႈၵေႃႉၼိုင်ႈ၊ ပဵၼ်ၵူၼ်းၸႄႈဝဵင်းသီႇသႅင်ႇ။

ဝၼ်းတီႈ 9/6/2020 ယၢမ်းၵၢင်ၶမ်ႈ 8 မူင်း ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇမႃးဝႃႈ ၼႂ်းမိူင်းႁူမ်ႈတုမ်ၼႆႉ မီးၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 ၽိူမ်ႉမႃးထႅင်ႈ 2 ၵေႃႉ။ ၼႂ်းၵူၼ်းပဵၼ် 2 ၵေႃႉၼၼ်ႉ ပႃးၵူၼ်းမိူင်းတႆးပွတ်းၸၢၼ်း ၵေႃႉၼိုင်ႈလႄႈ ၵူၼ်းမိူင်းၸႄႈဝဵင်းလၢႆႇ တိူင်းတႃႈၵုင်ႈ ၵေႃႉၼိုင်ႈ ဝႃႈၼႆ။

ၻွၵ်ႊတိူဝ်ႊၼိၼ်းဢိၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ၾၢႆႇၽဵဝ်ႈမူၺ်ႉတၢင်းပဵၼ်ၸပ်းငၢႆႈ ၸႄႈမိူင်းတႆး လၢတ်ႈတီႈ ၽူႈတွႆႇႁွၵ်ႈဝႃႈ “ၵူၼ်းပဵၼ်တီႈသီႇသႅင်ႇၼႆႉ ပဵၼ်ၵူၼ်းဝၢၼ်ႈသၢႆးၶၢဝ်၊ မိူဝ်ႈဝႃးတႄႉ လႆႈယူတ်းယႃဝႆႉတီႈ ႁူင်းယႃသၢႆးၶၢဝ်၊ မိူဝ်ႈၼႆႉတႄႉ တေဢဝ်သူင်ႇမႃးယူတ်းယႃတီႈႁူင်းယႃလူင်ၸဝ်ႈၸၢမ်ႇထုၼ်း တီႈတူၼ်ႈတီးၼႆႉ” ဝႃႈၼႆ။

ၵူၼ်းသီႇသႅင်ႇ ၵေႃႉတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၼႆႉ ပဵၼ်ၽူႈၸၢႆး ဢႃယု 30 ပီ ပဵၼ်ၵူၼ်းဝၢၼ်ႈသၢႆးၶၢဝ်၊ မၼ်းၸၢႆးၼႆႉ ဢမ်ႇမီးပိုၼ်းဢွၵ်ႇၶၢဝ်းတၢင်းၵႂႃႇၼွၵ်ႈမိူင်းမႃး၊ လွင်ႈလႆႈတိတ်းၸပ်းၸိူဝ်ႉမႅင်းၼႆႉ ယွၼ်ႉတုမ်ႉတိူဝ်ႉ ၸွမ်းၵူၼ်းပဵၼ်ၶူဝ်ႊဝိတ်ႉ- 19 တၢင်ႇၵေႃႉ ၼႂ်းလိၵ်ႈပိုၼ်ၽၢဝ်ႇ ႁွင်ႈၵၢၼ်ပၢႆးယူႇလီ ဢွၵ်ႇဝႆႉၼင်ႇၼႆ။

ၵူၼ်းသီႇသႅင်ႇ ၵေႃႉတိတ်းၸပ်းတၢင်းပဵၼ်ၼႆႉ မၼ်းၸၢႆးၵႂႃႇႁဵတ်းၵၢၼ်သိူဝ်ႇတၢင်း (လမ်းလုပ်သား) တီႈႁိမ်းမိတ်ႉသူင်ႇ (မြစ်ဆုံ) ၸႄႈမိူင်းၶၢင်သေ ပွၵ်ႈမႃး ၶိုၼ်းဝဵင်းသီႇသႅင်ႇ မိူဝ်ႈဝၼ်းတီႈ 21/5/2020 ။ လႆႈထုၵ်ႇၵုမ်းတူဝ်ဝႆႉ 16 ဝၼ်း၊ မိူဝ်ႈၽွင်းၵုမ်းတူဝ်ဝႆႉၼၼ်ႉ လႆႈသူင်ႇၵူတ်ႇထတ်းၼမ်ႉလၢႆး ၼမ်ႉမုၵ်ႈသေ ၸင်ႇလႆႈႁူႉၶေႃႈတွပ်ႇမိူဝ်ႈဝႃး ဝၼ်းတီႈ 9/6/2020 ဝႃႈ မၼ်းၸၢႆးတိတ်းၸပ်း တၢင်းပဵၼ်ၸိူဝ်ႉမႅင်း ၻွၵ်ႊတိူဝ်ႊၼိၼ်းဢိၽိဝ်ႇ လၢတ်ႈၼႄၼင်ႇၼႆ။

တေႃႈလဵဝ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ -19 ၼႂ်းမိူင်းႁူမ်ႈတုမ် တင်းမူတ်းမီး 246 ၵေႃႉ၊ လူႉတၢႆ 6 ၵေႃႉ၊ ယူတ်းယႃ 81 ၵေႃႉလႄႈ ယႃၶႅၼ်း 159 ၵေႃႉ။