ၵူၼ်းပၢႆႈၽေး ၸွမ်းလႅၼ်လိၼ်တႆး – ထႆး 6 ႁဵင်ပၢႆ ႁူပ်ႉတၢင်းယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ် ယွၼ်ႉၽေး ၶူဝ်ႊဝိတ်ႉ – 19 ၽႄႈလၢမ်း ၶွမ်ႊမတီႊၵူၼ်းပၢႆႈၽေးလႅၼ်လိၼ်တႆး – ထႆး တေၸွႆႈထႅမ်။
ၵဵဝ်ႇၵပ်းလွင်ႈၼႆႉ ယူႇတီႈၶွမ်ႊမတီႊ ၵူၼ်းပၢႆႈၽေးလႅၼ်လိၼ်တႆး – ထႆး SSRC – Shan State Refugee Committee (Thai Border) ႁၢင်ႈႁႅၼ်းတေသူင်ႇၶဝ်ႈၼမ်ႉတၢင်းၵိၼ်ၵမ်ႉၸွႆႈ တႃႇၵူၼ်းပၢႆႈၽေးသိုၵ်း ၸွမ်းလႅၼ်လိၼ် တႆး – ထႆး တႃႇ 6 ဢွင်ႈတီႈ မိူၼ်ၼင်ႇ လွႆၵေႃႇဝၼ်း၊ လွႆတႆးလႅင်း၊ လွႆသၢမ်သိပ်း၊ ၵုင်းၵျေႃႇ၊ လွႆလမ်လႄႈ ၵွင်းမုင်ႈမိူင်း ၸိူဝ်းၼႆႉ သင်ဝႃႈၽၵ်းတူ လႅၼ်လိၼ်ပိုတ်ႇၶိုၼ်း မွၵ်ႈႁူဝ်လိူၼ်ၵျူႊလၢႆႊ 2020 တေထိုင်ၼႆႉ ဝႃႈၼႆ။
မိူဝ်ႈလဵဝ် ယွၼ်ႉပဵၼ်ၽွင်းၶၢဝ်းၶိုၵ်ႉၶၵ်ႉသေ တၢင်းလူင်ပွင်ၸိုင်ႈမိူင်းထႆး ၸီႉသင်ႇပိၵ်ႉဢိုတ်းၽၵ်းတူ ႁၢမ်ႈၵူၼ်းၶဝ်ႈဢွၵ်ႇ Lockdown ၸွမ်းလႅၼ်ဝႆႉလႄႈ ႁဵတ်းႁႂ်ႈ ၵူၼ်းပၢႆႈၽေးသိုၵ်း ႁူပ်ႉလွင်ႈယၢပ်ႇၽိုတ်ႇလိူဝ်ႁႅင်းၵၼ် ဝႃႈၼႆ။
ၼၢင်းငိုၼ်းႁွမ် ၽူႈၵပ်းသၢၼ် ၵေႃႇမတီႇၵူၼ်းမိူင်းတႆးပၢႆႈၽေးလႅၼ်လိၼ်တႆး- ထႆး SSRC – TB လၢတ်ႈတီႈၽူႈတွႆႇႁွၵ်ႈဝႃႈ “တေႃႈလဵဝ်ၼႆႉ ႁဝ်းၶႃႈ လႆႈႁပ်ႉဝႆႉၶဝ်ႈသၢၼ် တီႈၽူႈမီးၼမ်ႉၸႂ်ၶဝ်ၸွႆႈမႃး 16 တၼ်ႊ(16,000 ၵီႊလူဝ်ႊ) ၼႆႉ၊ ယဝ်ႉၵေႃႈ ငိုၼ်းတီႈပိူၼ်ႈၸွႆႈထႅင်ႈ တႃႇ 3 သႅၼ်ဝၢတ်ႇပၢႆ။ ယၢမ်းလဵဝ်ၼႆႉ မုင်းမွင်းတၢင်းမိူင်းထႆးပိုတ်ႇၽၵ်းတူလႅၼ်လိၼ် ၵူၺ်းၶႃႈယဝ်ႉ၊ ႁဝ်းၶႃႈ ဢၢၼ်းဝႆႉတႄႉ တေပဵၼ်ႁူဝ်လိူၼ်ၵျူႊလၢႆႊ လိူၼ်ၼႃႈၼႆႉ တေသူင်ႇၸူးၵႂႃႇ” ဝႃႈၼႆ။
ယၢမ်းလဵဝ်တၢင်းပဵၼ် ၶူဝ်ႊဝိတ်ႉ -19 ယင်းတိုၵ်ႉလၢမ်းၽႄႈႁၢဝ်ႈႁႅင်းယူႇလႄႈ ၽၵ်းတူ ၸွမ်းလႅၼ်လိၼ် တႆး – ထႆးၵေႃႈ ယင်းပႆႇပိုတ်ႇ။ ၵူၼ်းပၢႆႈၽေးၸွမ်းလႅၼ်လိၼ် ပႆႇၸၢင်ႈ ၵႂႃႇၵိၼ်ၸၢင်ႈ ႁဵတ်းၵၢၼ် တၢင်းလႂ် ႁူပ်ႉလွင်ႈယၢပ်ႇၽိုတ်ႇလွင်ႈၵိၼ်ယႅမ်ႉလိူဝ်ႁႅင်း – ဝႃႈၼႆ။
ဢၼ်ၵူၼ်းပၢႆႈၽေးႁူပ်ႉလွင်ႈယၢပ်ႇၽိုတ်ႇလိူဝ်ႁႅင်းတႄႉ ပဵၼ်တွၼ်ႈတႃႇၵႂႃႇယူတ်းယႃတူဝ်တီႈႁူင်းယႃ တၢင်းၾင်ႇမိူင်းထႆး
ၼၢင်းငိုၼ်းႁွမ် သိုပ်ႇလၢတ်ႈဝႃႈ “လွင်ႈပၢႆးယူႇလီ ၵူၼ်းပၢႆႈၽေး တႄႉ ၵမ်ႈၼမ် လႆႈသူင်ႇယူတ်းယႃတူဝ်တၢင်းၾင်ႇ မိူင်းထႆး ၶႃႈဢေႃႈ။ တေႃႈလဵဝ် ၸိူဝ်းတေ ၵႂႃႇယူတ်းယႃတူဝ်တၢင်းၾင်ႇမိူင်းထႆးၵေႃႈ ဢမ်ႇလႆႈ။ ယႃႈယႃ ဢၼ်မီးတီႈသုၼ်ၵူၼ်းပၢႆႈၽေးႁဝ်းၶႃႈ ၸိူဝ်းၼၼ်ႉၵေႃႈ ဢမ်ႇၵုမ်ႇထူၼ်ႈၶႃႈ၊ လွင်ႈၼႆႉ ပဵၼ်ဢၼ်မႆႈၸႂ်တႃႇၵူၼ်း ပၢႆႈၽေးႁဝ်းၶႃႈတႄႉတႄႉ ယဝ်ႉၵေႃႈ လွင်ႈၵိၼ်ယႅမ်ႉၸိူဝ်းၼႆႉ” ဝႃႈၼႆ။
တႃႇတေလႆႈလွင်ႈၵမ်ႉၸွႆႈမႃးၼႆႉၵေႃႈ ၾၢႆႇၼိုင်ႈတၢင်းၼိုင်ႈ ၶွမ်ႊမတီႊၾၢႆႇၸွႆႈထႅမ်လႆႈၸတ်းပၢင်လဝ်ႇမူၼ်ႈ (Concert) ၼိူဝ်ဢွၼ်ႊလၢႆႊ။ ယၢမ်းလဵဝ် ၶဝ်ႈသၢၼ်လႄႈ ငိုၼ်းတႃႇၸွႆႈထႅမ်ၵူၼ်းပၢႆႈၽေးသိုၵ်းလႅၼ်လိၼ် ယင်းပႆႇၵုမ်ႇထူၼ်ႈလႄႈ တေသိုပ်ႇၸတ်း ပၢင်လဝ်ႇမူၼ်ႈႁႃတၢင်းၸွႆႈထႅမ်ၵႂႃႇထႅင်ႈ ဝႃႈၼႆ။
ပၢင်လဝ်ႇမူၼ်ႈ (Concert) ၼိူဝ်ဢွၼ်ႊလၢႆႊၼႆႉ မူၼ်ႈၸႂ်ၼႄတင်း ၽဵင်းတႆး၊ ထႆး၊ ဢင်းၵိတ်း တေထၢႆႇၼႄၵမ်းသိုဝ်ႈ(သူတ်ႇ/ Live) တီႈၼႂ်းၾဵတ်ႉၿုၵ်ႉၶွင် Shan State Refugee Committee – Thai Border ၶႅၼ်ႈတေႃႈၶဝ်ႈပၼ်ႁႅင်း တဵၵ်း Like, Share လႄႈ Follow ပၼ်သေၵမ်း ဝႃႈၼႆ။
တီႈပၢင်သဝ်းၵူၼ်းပၢႆႈၽေးသိုၵ်း ၸွမ်းလႅၼ်လိၼ်တႆး – ထႆး 6 တီႈၼႆႉ မိူၼ်ၼင်ႇ လွႆၵေႃႇဝၼ်း ႁူဝ်ၵူၼ်း 2,559 ၵေႃႉ၊ လွႆတႆးလႅင်း 2,381 ၵေႃႉ၊ လွႆသၢမ်သိပ်း 390 ၵေႃႉ၊ ၵုင်းၵျေႃႇ 303 ၵေႃႉ၊ လွႆလမ် 253 ၵေႃႉလႄႈ ၵွင်းမုင်ႈမိူင်း 221 ၵေႃႉ တင်းမူတ်း ႁူမ်ႈၵၼ် ႁူဝ်ၵူၼ်း 6,101 ၵေႃႉ။
ၵဵဝ်ႇၵပ်းလွင်ႈၵူၼ်းပၢႆႈၽေးသိုၵ်း ဢၼ်ယူႇသဝ်းဝႆႉ လႅၼ်လိၼ်တႆး-ထႆးၼႆႉ သင်ဝႃႈပီႈၼွင်ႉၵူၼ်းမိူင်းတႆး ၶႂ်ႈၸွႆႈထႅမ်မႃးလႄႈ ၶႂ်ႈ တွင်ႈထၢမ်လွင်ႈတႅတ်ႈတေႃးႁူဝ်ယွႆႈမၼ်းၸိုင် ၵပ်းသိုပ်ႇလႆႈတီႈမၢႆ 082-189-0684 ဝႃႈၼႆ။
