ယေးငိုၼ်းၵမ်ႇပေႃးၸ KBZ BANK ၵမ်ႉၸွႆႈ ၶဝ်ႈသၢၼ်လႄႈ ၼမ်ႉမၼ်းၵိၼ် ပၼ်တီႈ RCSS တႃႇၶိုၼ်းၸႅၵ်ႇ ပၼ်ၵူၼ်းမိူင်းတႆးၶိုၼ်း ၽွင်းတၢင်းပဵၼ်ၶူဝ်ႊဝိတ်ႉ – 19 ၼႆႉ။
ဝၼ်းတီႈ 8/6/2020 ယၢမ်းၵၢင်ၼႂ် 10 မူင်း ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လႆႈႁပ်ႉ ၶဝ်ႈသၢၼ် 300 ထူင်၊ ၼမ်ႉမၼ်းၵိၼ် 30 ပုင်း ဢၼ်ယေးငိုၼ်း ၵမ်ႇပေႃးၸ ၸႅၵ်ႇပၼ်တီႈႁူင်းႁဵၼ်းၸၼ်ႉသုင် မၢႆ 1 ၸႄႈ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။
ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ “ယူႇတီႈယေးငိုၼ်းၵမ်ႇပေႃးၸ ၵမ်ႉၸွႆႈမႃး ၶဝ်ႈသၢၼ်လႄႈၼမ်ႉမၼ်း တႃႇဢဝ်ၵႂႃႇၸႅၵ်ႇပၼ်ပီႈၼွင်ႉၵူၼ်းမိူင်းတႆးၶိုၼ်း။ ယဝ်ႉၵေႃႈ ၶိူင်ႈႁႄႉၵင်ႈတၢင်းပဵၼ် လႄႈ ၶိူင်ႈၵမ်ႉၵႅမ် ဢၼ်ၸူႉ/တုမ်ဝႆႉၵမ်းပူၼ်ႉလႄႈသင်၊ ဢၼ်ၵူႈၾၢႆႇၾၢႆႇၸွႆႈမႃးလႄႈသင် ၸိူဝ်းၼႆႉ လႆႈၸႅၵ်ႇပၼ် လုမ်းၵပ်းသၢၼ်ၵူႈတီႈတီႈ၊ ယူႇတီႈလုမ်းၵပ်းသၢၼ်ႁဝ်းၶႃႈဢဝ်ပုၼ်ႈၽွၼ်ႈသေ တေသိုပ်ႇသူင်ႇပၼ် ၸဝ်ႈၼႃႈတီႈၼႂ်းပိုၼ်ႉတီႈႁဝ်း၊ ယဝ်ႉၵေႃႈ ယူႇတီႈၸဝ်ႈၼႃႈတီႈႁဝ်း ၶိုၼ်းသိုပ်ႇၸႅၵ်ႇမႅင်ႇပၼ် ၵူၼ်းမိူင်းၼႂ်းပိုၼ်ႉတီႈႁဝ်းၵႂႃႇ” ဝႃႈၼႆ။
ၶဝ်ႈသၢၼ် ဢၼ်ယူႇတီႈ KBZ BANK ၵမ်ႉၸွႆႈမႃး 300 ထူင်ၼၼ်ႉ ၼိုင်ႈထူင်လႂ် မီး 24 ပေႇ၊ ၼမ်ႉမၼ်းၵိၼ် တႃႇ 30 ပုင်းၼၼ်ႉၵေႃႈ ၼိုင်ႈပုင်းလႂ် မီး 10 ၸွႆႉ ဝႃႈၼႆ။
ၸဝ်ႈသိုၵ်းဢုမ်ႈၶိူဝ်း သိုပ်ႇလၢတ်ႈဝႃႈ “ယူႇတီႈ KBZ BANK ၸွႆႈမႃးၼႆႉ ၶဝ်ၸဝ်ႈမီးၼမ်ႉၸႂ်ၸေႇတၼႃႇ၊ ၼႂ်းပိုၼ်ႉတီႈၶွင် RCSS ၼႆႉ မၢင်တီႈမၢင်လႂ် လူင်ပွင်ၸိုင်ႈၵေႃႈ ဢမ်ႇၽႅဝ်လႆႈ၊ တၢင်ႇမူႇတၢင်ႇၸုမ်းၵေႃႈ တေဢမ်ႇၽႅဝ်လႆႈ ၶဝ်ၵေႃႈပွင်ႇၸႂ် ႁၼ်ထိုင်ၸိူင်ႉၼၼ်သေၸွႆႈမႃး။ ၵမ်းၼႆႉ ႁဝ်းၶႃႈၵေႃႈ သမ်ႉလႆႈႁူပ်ႉထူပ်း ၺႃးၵၼ် လႆႈၵၢႆႇၵႂၢမ်းၸူးၵၼ်ဝႆႉလႄႈ ပွင်ႇဝႃႈၶဝ်ၵေႃႈမီးၸေႇတၼႃႇသေ ႁဝ်းၶႃႈၵေႃႈ သမ်ႉတူင်ႉၼိုင်လွင်ႈႁႄႉၵင်ႈတၢင်းပဵၼ်ၼႆႉလႄႈ ၶဝ်တေႁူႉၶၢဝ်ႇ ၸွမ်းသေၸင်ႇၸွႆႈမႃးပၼ်ႁဝ်းၶႃႈယဝ်ႉ” ဝႃႈၼႆ။
ယေးငိုၼ်းၵမ်ႇပေႃးၸ KBZ BANK ၼႆႉ လႆႈၸွႆႈၵမ်ႉထႅမ်ပၼ်တီႈ RCSS ၼႆႉ မီးမႃး 2 ပွၵ်ႈပႃးပွၵ်ႈၼႆႉယဝ်ႉ၊ မိူဝ်ႈပွၵ်ႈၵမ်းဢွၼ်တၢင်းၼၼ်ႉ ၸွႆႈထႅမ်ပၼ် လွင်ႈၶိူင်ႈၸႂ်ႉတိုဝ်ႉႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ။ ပွၵ်ႈၼႆႉသမ်ႉ ၸွႆႈထႅမ် ပၼ်ၶဝ်ႈသၢၼ် လႄႈ ၼမ်ႉမၼ်းၵိၼ် တႃႇၵူၼ်းမိူင်းၼႂ်းပိုၼ်ႉတီႈ ဝႃႈၼႆ။
“ယူႇတီႈ KBZ BANK ၸွႆႈမႃးတီႈ RCSS ႁဝ်းၶႃႈၼႆႉ မီး 2 ပွၵ်ႈပႃးပွၵ်ႈၼႆႉယဝ်ႉ။ ယဝ်ႉၵေႃႈ လူင်ပွင်ၸိုင်ႈမိူင်းတႆးၵေႃႈ ယၢမ်ႈၸွႆႈမႃးပၼ်ပွၵ်ႈၼိုင်ႈ တပ်ႉသိုၵ်းမၢၼ်ႈ ပွၵ်ႈၼိုင်ႈ။ လွင်ႈသိုၵ်းမၢၼ်ႈ ႁႄႉႁၢမ်ႈ မိူဝ်ႈသိုၵ်းႁဝ်းၶႃႈလူင်းၸွႆႈထႅမ် ပၼ်တၢင်းႁူႉ ၵူၼ်းမိူင်း ၽွင်းတၢင်းပဵၼ်ၶူဝ်ႊဝိတ်ႉ 19 ၼႆႉ ၶဝ်ႁၢမ်ႈတီႈမိူင်းပၼ်ႇၼၼ်ႉ ပွၵ်ႈလဵဝ်ၵူၺ်း၊ လိူဝ်ၼၼ်ႉတႄႉ ဢမ်ႇႁႄႉႁၢမ်ႈၵဝ်းတီႈလႂ်ထႅင်ႈယဝ်ႉ။ တေႃႈလဵဝ် လွင်ႈၶဵင်ႈၶႅင် ၵၢၼ်သိုၵ်းတေႃႇၵၼ်ၸိူဝ်းၼႆႉၵေႃႈဢမ်ႇမီး လိူဝ်သေ ပဵၼ်ပၢင်တိုၵ်းၵၼ်တီႈမိူင်းတူၼ်ၼၼ်ႉၵမ်းၼိုင်ႈၵူၺ်း၊ လိူဝ်ၼၼ်ႉ ဢမ်ႇမီးလွင်ႈၶဵင်ႈၶႅင်သင်တေႃႇၵၼ်” ၸဝ်ႈသိုၵ်း ဢုမ်ႈၶိူဝ်း လၢတ်ႈၼႄၼင်ႇၼႆ။
တႄႇဢဝ် ဝၼ်းတီႈ 28/3/2020 မႃးတေႃႇထိုင် ဝၼ်းတီႈ 2/6/2020 ၼႆႉ ယူႇတီႈမေႃယႃ ၾၢႆႇပၢႆးယူႇလီ RCSS/SSA လူင်းပိုၼ်ႉတီႈၵူတ်ႇထတ်းပၼ်ပၢႆးယူႇလီ သင်ၶၸဝ်ႈ၊ ၵူၼ်းမိူင်း ၸွမ်းဝၢၼ်ႈၼွၵ်ႈၼႃးပၢင်ႇမႃး တင်းမူတ်း မီး 69,904 ၵေႃႉ၊ ဢၼ်လႆႈပၼ်တၢင်းႁူႉ ၵဵဝ်ႇလူၺ်ႈၶူဝ်ႊဝိတ်ႉ – 19 ၼႆႉသမ်ႉ မီး 517 ပွၵ်ႈ၊ မီးၽူႈၶိုၼ်ႈႁွတ်ႈၶဝ်ႈႁူမ်ႈထွမ်ႇငိၼ်း 66,244 ၵေႃႉ ယူႇတီႈႁွင်ႈၵၢၼ်ပိုၼ်ၽၢဝ်ႇ ၶွင် RCSS ဝႅပ်ႊသၢႆႊတႆးလွတ်ႈလႅဝ်း ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ