ၾၢႆႇပႃႇမႆႉ ဝဵင်းၶူဝ်လမ် ၸႄႈဝဵင်းၼမ်ႉၸၢင် တီႉၺွပ်းၵႃးတၢင်ႇမႆႉသၵ်း 13 လမ်း မႆႉသၵ်းၼပ်ႉႁူဝ်ပၢၵ်ႇပုတ်း/လုၼ်ႈ သေတႃႉ တီႉလႆႈၵူၼ်းႁေႃႈၵႃး ၵေႃႉလဵဝ် – ၵူၼ်းၵဵဝ်ႇၶွင်ႈ သိပ်းပၢႆ ပၢႆပူၼ်ႉလွတ်ႈသဵင်ႈ။

ဝၼ်းတီႈ 1/6/2020 ယၢမ်းၵၢင်ဝၼ်း 11 မူင်းၼၼ်ႉ ယူႇတီႈၽူႈမီးပုၼ်ႈၽွၼ်း ၾၢႆႇပႃႇမႆႉလႄႈ ဢိၵ်ႇထႅင်ႈလၢႆလၢႆၾၢႆႇ ႁူမ်ႈၵၼ် ၵူတ်ႇထတ်းရူတ်ႉၵႃးၵႂႃႇမႃး တီႈၼိူဝ်သဵၼ်ႈတၢင်းလူင် ၵုၼ်ႁဵင် – ၶူဝ်လမ်၊ ၵူတ်ႇထတ်းတီႉလႆႈ ၼႂ်းၵႃးရူတ်ႉတူႈဢွၼ်ႇ(ၵႃးမၢၼ်ႇလူင်ႇ) တၢင်ႇမႆႉသၵ်းမႃး 13 လမ်း၊ သမ်ႉတီႉလႆႈတူဝ်ၵူၼ်းႁေႃႈၵႃး ၵေႃႉၼိုင်ႈၵူၺ်း တႃႇ 12 ၵေႃႉတႄႉ ပၢႆႈလွတ်ႈဝႆႉ။ မႆႉဢၼ်တီႉလႆႈၼၼ်ႉ ပဵၼ်မႆႉသၵ်း တင်းမူတ်းမီး 837 လႅမ်ႈ ၼမ်ႉၼၵ်းမီး 15 တၼ်ႊ ဝႃႈၼႆ။

ဢူးပေႉႁဵင်း ၽူႈမီးၸၼ်ႉ ၾၢႆႇပႃႇမႆႉ လၢတ်ႈတီႈၽူႈတွႆႇႁွၵ်ႈဝႃႈ “ တင်းမူတ်း တီႉလႆႈ ၵႃးလၵ်ႉတၢင်ႇမႆႉ 13 လမ်း။ ၵူၼ်းႁေႃႈၵႃးတီႉလႆႈ 1 ၵေႃႉ။ ထႅင်ႈ 12 ၵေႃႉတႄႉပၢႆႈလွတ်ႈဝႆႉ။

ၵဵဝ်ႇလူၺ်ႈလွင်ႈၼႆႉ ၸဝ်ႈၵႃးဢၼ်လၵ်ႉပၢႆႈလွတ်ႈဝႆႉၸိူဝ်းၼၼ်ႉ တေၸွမ်းႁႃသေ မႃးပၼ်တူတ်ႈတၢမ်ႇၵႂႃႇ။ တေႃႈလဵဝ် ဢၼ်တီႉလႆႈ ဝႆႉၵေႃႉၼိုင်ႈၼၼ်ႉတႄႉ လႆႈပိုတ်ႇလိူင်ႈၸွႆးတြႃးဝႆႉတီႈႁူင်းပလိၵ်ႈၶူဝ်လမ်ဝႆႉယဝ်ႉ”ဝႃႈၼႆ။

မိူၼ်ၼၼ် ၼင်ႇၵဝ်ႇ မိူဝ်ႈဝၼ်းတီႈ 2/6/2020 ယၢမ်းၵၢင်ဝၼ်း 11 မူင်းၼၼ်ႉၵေႃႈ ၵူတ်ႇထတ်းလႆႈမႆႉၵေႇတွၵ်ႈ ၼႂ်းၵႃး 5 လမ်း၊ ၼမ်ႉၼၵ်း 10 တၼ်ႊလႄႈ မႆႉသၵ်းၼမ်ႉၼၵ်း 20 တၼ်ႊ ၼႂ်းၸႄႈဝဵင်းၵဵင်းတွင်း ၸိုင်ႈတႆးပွတ်းၸၢၼ်း။

မိူဝ်ႈႁၢင်လိူၼ်မေႊ ပူၼ်ႉမႃးၼၼ်ႉသမ်ႉ ၶူးမေႃယႃ (တွၵ်ႊတိူဝ်ႊ) ၵေႃႉၼိုင်ႈ ဢဝ်ၵႃးတၢင်ႇၵူၼ်းပဵၼ် တၢင်ႇမႆႉသၵ်း ဢၼ်ႁဵတ်းပဵၼ်ၽၵ်းတူ 9 ၶႅပ်း လုၵ်ႉၵဵင်းတွင်းမုင်ႈၸူး ၼမ်ႉၸၢင် လွႆလႅမ် ပၢင်လူင် လႄႈ ၺႃးတီႉၺွပ်းတီႈ လွႆလႅမ် ၸိုင်ႈတႆးပွတ်းၸၢၼ်း။