ၸႄႈဝဵင်းတႃႈၶီႈလဵၵ်း ၾူၼ်တူၵ်းလူမ်းၽတ်ႉပဝ်ႇႁႅင်း၊ လင်ၶႃးႁိူၼ်းၵူၼ်းဝၢၼ်ႈ ၵွၵ်းပိဝ်လူႉၵွႆၸွမ်း၊ သဝ်ၾႆး ၶၢင်ႈတၢင်း ၵေႃႈႁၵ်းလူမ်ႉ ဝႃႈၼႆ။
ဝၼ်းတီႈ 2/6/2020 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈၼၼ်ႉ ၾူၼ်လူမ်းၽတ်ႉပဝ်ႇႁၢဝ်ႈႁႅင်း ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း၊ ႁိူၼ်းၵူၼ်းဝၢၼ်ႈမႂ်ႇ တၢင်းပွၵ်ႉသၼ်သၢႆး (ၶ) လင်ၼိုင်ႈ လင်ၶႃးႁိူၼ်း ၵွၵ်းပိဝ်လူႉၵွႆၸွမ်း။ လိူဝ်သေၼၼ်ႉ သဝ်ၾႆးၾႃႉၶၢင်ႈတၢင်း ၵေႃႈႁၵ်းလူမ်ႉပႃးထႅင်ႈ- သိုဝ်ႇၶၢဝ်ႇ တႃႈၶီႈလဵၵ်းၼိဝ်ႊသ် ဢွၵ်ႇဝႆႉၼင်ႇၼႆ။
ၵဵဝ်ႇၵပ်းလွင်ႈၼႆႉ ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ- “မိူဝ်ႈဝႃး ၾူၼ်လူမ်းမႃးၼႆႉ တေပဵၼ်မွၵ်ႈ 3 မူင်းၶိုင်ႈဝၢႆးဝၼ်း၊ လူမ်းတႄႉ ၽတ်ႉႁႅင်းၶႃႈယဝ်ႉ။ ၵူၺ်းၵႃႈ လွင်ႈႁိူၼ်းယေးၵူၼ်းဝၢၼ်ႈ လႆႈလူႉၵွႆၸွမ်းတင်းၼမ်ၸိူဝ်းၼၼ်ႉတႄႉ ဢမ်ႇလႆႈငိၼ်း။ လိူဝ်သေၼၼ်ႉ လွင်ႈၵူၼ်းတုမ်ႉတိူဝ်ႉမၢတ်ႇၸဵပ်း လူႉတၢႆၵေႃႈဢမ်ႇမီး ဢမ်ႇလႆႈငိၼ်း” ဝႃႈၼႆ။
မိူဝ်ႈဝၼ်းတီႈ 13/5/2020 ယၢမ်းႁူဝ်ၶမ်ႈ မွၵ်ႈ 5 မူင်းပၢႆၼၼ်ႉၵေႃႈ ၼႂ်းဝဵင်းတႃႈၶီႈလဵၵ်း ၺႃးၾူၼ်ယႂ်ႇလူမ်းလူင် ၽတ်ႉပဝ်ႇ မၢၵ်ႇႁဵပ်း တူၵ်းႁႅင်း တူၼ်ႈမႆႉယႂ်ႇ၊ ၵိင်ႇမႆႉ၊ သဝ်လၵ်းၾႆးၵူၼ်ႇ၊ သၢႆၾႆးၾႃႉၶၢတ်ႇ ၸိူဝ်းၼႆႉ။ ပိုၼ်ႉတီႈ ဢၼ်ထူပ်းၽေးတုမ်ႉတိူဝ်ၼမ်လိူဝ်ပိူၼ်ႈ ပဵၼ်တၢင်းၵႂႃႇ ဝိႁၢရ် ထၢတ်ႈပုင်ႇလူဝ်ႉ၊ တၢင်းၵႂႃႇပႃႇသၵ်း ႁွင်ႈလိုၵ်ႉ သၢႆဝဵင်း ၸွမ်းၵၢင်ဝဵင်း ၸိူဝ်းၼႆႉ။