ထႆးသူင်ႇႁႅင်းၵၢၼ်မိူင်းႁူမ်ႈတုမ် ပွၵ်ႈတႃႈၶီႈလဵၵ်းထႅင်ႈ ႁိမ်းပၢၵ်ႇ

ႁႅင်းၵၢၼ်မိူင်းႁူမ်ႈတုမ် ဢၼ်ၶဝ်ႈၵႂႃႇႁဵတ်းၵၢၼ် တၢင်းမိူင်းထႆးၼၼ်ႉ ယူႇတီႈၸဝ်ႈၼႃႈတီႈတင်းသွင်မိူင်း သၢၼ်မိုဝ်းႁူမ်ႈၵၼ် သူင်ႇတူဝ်ပွၵ်ႈၶဝ်ႈမႃး တၢင်းတႃႈၶီႈလဵၵ်းထႅင်ႈ 90 ပၢႆ ဝႃႈၼႆ။

ဝၼ်းတီႈ 2/6/2020 ယၢမ်းဝၢႆးဝၼ်း ယူႇတီႈၽူႈမီးပုၼ်ႈၽွၼ်း တၢင်းၾင်ႇမိူင်းထႆး – မိူင်းတႆး ႁူမ်ႈၵၼ်ၶပ်းၶိုင်သူင်ႇ ႁႅင်းၵၢၼ်မိူင်းႁူမ်ႈတုမ် 60 ၵေႃႉ တင်း ႁႅင်းၵၢၼ် ၸိူဝ်းတူၵ်းၶွၵ်ႈသေပူၼ်ႉဢွၵ်ႇၶွၵ်ႈမႃး တၢင်းမိူင်းထႆးၼၼ်ႉ 32 ၵေႃႉ ႁူမ်ႈၵၼ် 92 ၵေႃႉ ၶဝ်ႈမႃးတၢင်းၶူဝ်မိုတ်ႈၵိုဝ်းမၢႆ 2 လႅၼ်လိၼ်တႆး – ထႆး ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း လႄႈ ၸုမ်းၸွႆႈထႅမ် ႁႅင်းၵၢၼ် လႅၼ်လိၼ်တႆး-ထႆး လၢတ်ႈတီႈၽူႈတွႆႇႁွၵ်ႈဝႃႈ“ ၸႂ်ႈၶႃႈဢေႃႈ၊ ႁႅင်းၵၢၼ် မိူင်းႁူမ်ႈတုမ် ပွၵ်ႈၶဝ်ႈမႃးထႅင်ႈ တင်းမူတ်း 92 ၵေႃႉ။ တေႃႈလဵဝ် ႁႅင်းၵၢၼ်ႁဝ်းၶႃႈၸိူဝ်းၼႆႉ လႆႈၵုမ်းတူဝ်ဝႆႉတီႈၵျွင်းမူဝ်းၵူၵ်ႉယဵၵ်ႉတႃႇ မွၵ်ႈၶၢဝ်းတၢင်း 4 ဝၼ်း၊ သင်ဝႃႈ ၵူတ်ႇထတ်းလွင်ႈပၢႆးယူႇလီၶဝ် ပေႃးၽၢၼ်ႇ ဢမ်ႇတိတ်းၸပ်းၸိူဝ်ႉမႅင်းၼႆ ၸင်ႇပၼ်ဝႂ်ႁပ်ႉႁွင်း ပၢႆးယူႇလီၶဝ်သေ ပၼ်ပွၵ်ႈၶိုၼ်းဝၢၼ်ႈၽႂ်မိူင်းမၼ်း” ဝႃႈၼႆ။

ႁႅင်းၵၢၼ် ဢၼ်ပွၵ်ႈၶဝ်ႈမႃးထႅင်ႈ 92 ၵေႃႉၼႆႉ ပဵၼ်ၵူၼ်းတူၵ်းၶွၵ်ႈ 32 ၵေႃႉ၊ ႁႅင်းၵၢၼ် 60 ၵေႃႉ ဝႃႈၼႆ။

ၸၢႆးၼုမ်ႇတုၺ်ႈ သိုပ်ႇလၢတ်ႈဝႃႈ “ ဢွင်ႈတီႈတႃႇတေၶဝ်ႈမႃး ၵုမ်းတူဝ်ယူႇဝႆႉ Quarantine တီႈၵျွင်းမူဝ်းၵူၵ်ႉ ဝိပသ်ႉသၼႃ ယဵၵ်ႉတႃႇၼႆႉ တေႁပ်ႉလႆႈႁူဝ်ၵူၼ်း 300 ၵေႃႉ၊ တေႃႈလဵဝ်တႄႉ ႁပ်ႉဝႆႉ 92 ၵေႃႉ။ ယူႇတီႈၽူႈမီး ပုၼ်ႈၽွၼ်းၶဝ် တေႁပ်ႉဢဝ်ၵမ်းလွႆးလွႆး ဢဝ်ၵႂႃႇတေႃႇထိုင်ပေႃးယဝ်ႉ။ ၽႂ်ၽႅဝ်ဢွၼ်တၢင်းၵေႃႈ တေၵူတ်ႇထတ်းသေ သင်ဝႃႈဢမ်ႇပဵၼ်သင်ၼႆ သူင်ႇပွၵ်ႈႁိူၼ်းယေးၽႂ်မၼ်းၵႂႃႇၵမ်းလဵဝ်။ ၸိူဝ်းဢၼ်သူင်ႇမႃးၵေႃႈသူင်ႇမႃး၊ ၸိူဝ်းဢၼ်သူင်ႇမိူဝ်းၵေႃႈသူင်ႇမိူဝ်း ပၼ်ႇပူတ်ႈၵၼ်ၵႂႃႇၸိူင်ႉၼၼ်”ဝႃႈၼႆ။

ႁႅင်းၵၢၼ်မိူင်းႁူမ်ႈတုမ် ဢၼ်သူင်ႇပွၵ်ႈမႃးတၢင်း မႄႈသၢႆ – တႃႈၶီႈလဵၵ်းၼႆႉ ၵမ်ႈၼမ် ပဵၼ်ၵူၼ်းသႂ်ႇသဵၼ်ႈမၢႆ တၢင်ႇၸိုဝ်ႈဝႆႉ ပဵၼ်ႁႅင်းၵၢၼ် တၢင်းပွတ်းတွၼ်ႈၼိူဝ်မိူင်းထႆး မိူၼ်ၼင်ႇ ၵဵင်းမႆႇ၊ ၵဵင်းႁၢႆး၊ ၵဵင်းသႅၼ်၊ လမ်းပၢင်း၊ လမ်းပုၼ်း လႄႈ ဢိၵ်ႇထႅင်ႈလၢႆလၢႆတီႈ ၸိူဝ်းၼၼ်ႉ ဝႃႈၼႆ။

ၼႃႈၵၢၼ်ပိူဝ်ႈတႃႇသူင်ႇၵူၼ်းမိူင်းႁူမ်ႈတုမ် ပွၵ်ႈၶိုၼ်းၼႆႉ ယူႇတီႈၽူႈမီးပုၼ်ႈၽွၼ်း တင်းသွင်မိူင်း ဢုပ်ႇဢူဝ်းၵိူဝ်းၵုမ် ၵၼ်သေႁူမ်ႈၵၼ်ၶပ်းၶိုင်ႁၢင်ႈႁႅၼ်း သူင်ႇပွၵ်ႈၶဝ်ႈမႃးတၢင်းၾင်ႇတႃႈၶီႈလဵၵ်း ဝႃႈၼႆ။

မိူဝ်ႈဝၼ်းတီႈ 29/5/2020 ၼၼ်ႉၵေႃႈ လႆႈသူင်ႇပွၵ်ႈမႃးတီႈၶူဝ်မိုတ်ႈၵိုဝ်းမၢႆ 2 ၸႄႈဝဵင်းတႃႈၶီႈလဵၵ်း 76 ၵေႃႉ ၼႆယဝ်ႉ။