ၽၵ်းၵၢတ်ႇပီ ဢၼ်ၽုၵ်ႇဝႆႉၼႂ်းသူၼ် တီႈဝဵင်းဢေးသႃႇယႃႇ(အေးသာယာမြို့)ၸႄႈဝဵင်းတူၼ်ႈတီးၼၼ်ႉ ၶၢႆဢမ်ႇဢွၵ်ႇ ယွၼ်ႉၽေးၶူဝ်ႊဝိတ်ႉ ထိုင်တီႈ လႆႈၸႅၵ်ႇမႅင်ႇပၼ်လၢႆ ၵူၼ်းၼႂ်းပိုၼ်ႉတီႈၶိုၼ်း ဝႃႈၼႆ။
ဝၼ်းတီႈ 1/6/2020 ယူႇတီႈၸုမ်းႁၢပ်ႇၵၢၼ် (စေတနာ့ဝန်ထမ်း) သေ လူင်းပိုၼ်ႉတီႈၵႂႃႇပိတ်းဢဝ် ၽၵ်းၵၢတ်ႇပီ ၸွမ်းၼႂ်းသူၼ် ၶွင်ၵူၼ်းဝၢၼ်ႈတိတ်ႉပိၼ်ႇထွင်ႇ ဝဵင်းဢေးသႃႇယႃႇ ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ဢဝ်မႃးၸႅၵ်ႇပၼ် ပီႈၼွင်ႉၸွမ်းၼႂ်းပွၵ်ႉ ၼႂ်းယွမ်ႇလႄႈ ၸွမ်းၼႂ်းၵၢတ်ႇ ဝဵင်းတူၼ်ႈတီး ဝႃႈၼႆ။
ၵူဝ်ႇဝိၼ်းၼၢႆႇၸူဝ်း ၸုမ်းႁၢပ်ႇၵၢၼ် (စေတနာ့ဝန်ထမ်း) လၢတ်ႈတီႈၽူႈတွႆႇႁွၵ်ႈဝႃႈ “ယွၼ်ႉဝႃႈ ၽၵ်းၵၢတ်ႇပီၼၼ်ႉ ၶၢႆဢမ်ႇဢွၵ်ႇယဝ်ႉလႄႈ ၸွမ်းၼင်ႇႁဝ်းၶႃႈ ပွင်ပဵၼ်လႆႈၼၼ်ႉ လႆႈၸွႆႈၵမ်ႉထႅမ်ပၼ်ငိုၼ်း တီႈၸဝ်ႈသူၼ်ၶိုၼ်းဢိတ်းဢွတ်းသေ။ ႁဝ်းၶႃႈ လႆႈလူင်းပိုၼ်ႉတီႈသေ ၵႂႃႇပိတ်းဢဝ် ၽၵ်းၵၢတ်ႇပီ ဢၼ်ၽုၵ်ႇဝႆႉၼႂ်းသူၼ်ၸိူဝ်းၼၼ်ႉ မႃးၸႅၵ်ႇပၼ် ၸွမ်းၼႂ်းပွၵ်ႉ ၼႂ်းၵၢတ်ႇဝဵင်းတူၼ်ႈတီး ၸိူဝ်းၼႆႉ။” ဝႃႈၼႆ။
ယွၼ်ႉတၢင်းပဵၼ်ၶူဝ်ႊဝိတ်ႉ – 19 ၼႆႉသေ ၸဝ်ႈသူၼ်ၽၵ်းၵၢတ်ႇပီ ဢွၼ်ၵၼ်ထူပ်းလွင်ႈယၢပ်ႇၽိုတ်ႇ ၶၢႆဢမ်ႇဢွၵ်ႇ၊ လႆႈလူႉသုမ်းတင်းၼမ်လၢႆ။ ၵဵဝ်ႇလူၺ်ႈလွင်ႈၼႆႉ ယူႇတီႈယေးငိုၼ်းၵၢမ်ႇပေႃးၸ ၶိုၼ်းသိုဝ်ႉဢဝ် ၽၵ်းၵၢတ်ႇပီ တီႈၸဝ်ႈသူၼ်ၸိူဝ်းၼၼ်ႉ တႃႇငိုၼ်း 3 သႅၼ်ပျႃးသေ သူင်ႇၸႅၵ်ႇၵႂႃႇတၢင်း တႃႈၵုင်ႈ၊ ဝဵင်းလိူဝ်ႇ၊ မိၼ်းၶျၢၼ်ႇ၊ မေႃႇလမႅင်ႇလႄႈ ယမႄးတိၼ်း ၸိူဝ်းၼႆႉ။
ၵၢၼ်ၽုၵ်ႇသွမ်ႈ ၶူဝ်းသူၼ် ၼႂ်းၸိုင်ႈတႆးပွတ်းၸၢၼ်းၼႆႉ လွင်ႈလွၵ်းၵၢတ်ႇၼၼ်ႉ ၸဝ်ႈသူၼ်ၶဝ် လႆႈၸႂ်ယႂ်ႇပိုင်ႈဢိင် သူင်ႇၶၢႆၸူးၼႂ်းမိူင်းႁူမ်ႈတုမ်ပတ်းပိုၼ်ႉ ဝႃႈၼႆ။
တေႃႈလဵဝ် ယွၼ်ႉတၢင်းပဵၼ်ၶူဝ်ႊဝိတ်ႉ – 19 ၼႆႉသေ တုမ်ႉတိူဝ်ႉၵၢၼ်တေႃႉသူင်ႇဢဝ်ဢွၵ်ၶၢႆ၊ ဢမ်ႇလႆႈဢဝ်ဢွၵ်ႇ သူင်ႇၸူးတၢင်းၼွၵ်ႈလႄႈ ၸဝ်ႈသူၼ်ဢွၼ်ၵၼ်ထူပ်းတၢင်းယၢပ်ႇၽိုတ်ႇ လူႉသုမ်းၵၼ်ႁၢဝ်ႈႁႅင်း ဝႃႈၼႆ။
ဢိင်ၼိူဝ်လွင်ႈၼႆႉသေ ယူႇတီႈၸဝ်ႈသူၼ်ၶဝ် တုၵ်းယွၼ်းထိုင် တီႈၽူႈမီးပုၼ်ႈၽွၼ်း လူင်ပွင်ၸိုင်ႈ ႁႂ်ႈၸွႆႈၶပ်းၶိုင်ပၼ်၊ ၼင်ႇႁိုဝ် ၶူဝ်းသူၼ် ဢၼ်ဢွၵ်ႇၼႂ်းသူၼ်ၼႂ်းႁိူၵ်ႈၸိူဝ်းၼႆႉ ပေႃးတေလႆႈတေႃႉသူင်ႇၶၢႆၸူးတၢင်ႇမိူင်းလႆႈငၢႆႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ