ၽူႈၸၢႆးၵေႃႉၼိုင်ႈ ဢၼ်ၵုမ်းတူဝ် Quarantine တီႈႁူမ်ႈယဵၼ်မူဝ်းၵူၵ်ႉ ဝဵင်းတူၼ်ႈတီးၼၼ်ႉ မီးလူမ်းမႆႈ ၶႆႈၼၢဝ် လႆႈသူင်ႇယူတ်းယႃတူဝ် ဝႆႉတီႈႁူင်းယႃၸဝ်ႈၸၢမ်ႇထုၼ်း ။

ၽူႈၸၢႆးၵေႃႉၼႆႉ တိုၵ်ႉလုၵ်ႉၵုင်းထဵပ်ႈ (မိူင်းၵွၵ်ႇ) ၸိုင်ႈထႆး ပွၵ်ႈမႃးၶိုၼ်းပူၼ်ႉမႃးမိူဝ်ႈဢမ်ႇႁိုင်ၼႆႉၵူၺ်း။ ယွၼ်ႉပိူဝ်ႈမၼ်းၸၢႆး ဢမ်ႇယူႇလီ မီးလူမ်းမႆႈလူမ်းၼၢဝ်ဝႆႉလႄႈတေႃႈလဵဝ်မၼ်းၸၢႆး လႆႈၵုမ်းတူဝ်ဝႆႉတီႈႁူင်းယႃ လူင် ၸဝ်ႈၸၢမ်ႇထုၼ်း Hospital Quarantine -ၼႆယဝ်ႉ။

ၻွၵ်ႊတိူဝ်ႊဝူၺ်ႇဝူၺ်ႇမုၼ်ႇ ႁူင်းယႃၸဝ်ႈၸၢမ်ႇထုၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပဵၼ်ၼၼ်ႉ လၢတ်ႈၼႄႁဝ်းၶႃႈဝႃႈ မၼ်းၸၢႆးၼႆႉ ၵမ်ႉၼၢဝ် ၵမ်ႉႁၢႆ ပဵၼ်မႃး ၶၢဝ်းတၢင်းမွၵ်ႈ 2 လိူၼ်ၼႆႉယဝ်ႉ။ မိူဝ်ႈဝၼ်းတီႈ 31/5/2020 ယၢမ်းၵၢင်ၶမ်ႈမွၵ်ႈ 8 မူင်းၼႆႉ ၸင်ႇႁွတ်ႈၽႅဝ်မႃးတီႈ ႁူင်းယႃၸဝ်ႈၸၢမ်ႇထုၼ်းၼႆႉ ” ဝႃႈၼႆ။

ၽူႈၸၢႆး ၵေႃႉဢၼ်ဢမ်ႇယူႇလီ မီးလူမ်းမႆႈၼၢဝ်ၼၼ်ႉ မၼ်းၸၢႆး လုၵ်ႉၵုင်းထဵပ်ႈၶဝ်ႈမႃးတၢင်းမျႃႉဝတီႇသေ မႃးၵုမ်းတူဝ်ဝႆႉတီႈႁူမ်ႈယဵၼ်မူဝ်းၵူၵ်ႉ တူၼ်ႈတီး မိူဝ်ႈဝၼ်းတီႈ 27 လိူၼ်မေႊၼႆႉ တႃႇၶၢဝ်းတၢင်း 21 ဝၼ်း ။

ၻွၵ်ႊတိူဝ်ႊ ဝူၺ်ႇဝူၺ်ႇမုၼ်ႇ သိုပ်ႇလၢတ်ႈဝႃႈ “ၽူႈၸၢႆးၵေႃႉၼၼ်ႉ လီၶိုၼ်ႈမႃးယဝ်ႉ ။ မီးလူမ်းမႆႈလူမ်းၼၢဝ် ပိူင်လဵဝ်ၵူၺ်း။ တေႃႈလဵဝ်ၼႆႉတႄႉ ယူႇတီႈမေႃယႃၶဝ် ပႂ်ႉတူၺ်းဝႆႉယူႇ၊ လွင်ႈၵူတ်ႇထတ်းတၢင်းပဵၼ်ၼႆႉတႄႉ ဝၼ်းတီႈ 3 ၼႆႉ ၸင်ႇတေဢဝ်ၵႂႃႇၵူတ်ႇထတ်း” ဝႃႈၼႆ။

ၵူၼ်းမိူင်းတႆး ဢၼ်ၵႂႃႇႁဵတ်းၵၢၼ် တၢင်းမိူင်းထႆးသေ ပွၵ်ႈၶဝ်ႈမႃးၼႂ်းမိူင်းတႆးၼႆႉ တေႃႈလဵဝ် မီးၵႂႃႇ 2,000 ပၢႆယဝ်ႉ။ ဢၼ်မႃးၵုမ်းတူဝ် Quarantine ယူႇဝႆႉတီႈမူဝ်းၵူၵ်ႉတူၼ်ႈတီးၼႆႉသမ်ႉ တေမီး 100 ပၢႆ ဝႃႈၼႆ။

ၽူႈၸၢႆး ၵေႃႉဢမ်ႇယူႇလီမီးလူမ်းမႆႈၶႆႈၼၢဝ်ၼႆႉ ဢမ်ႇပႆႇမၵ်းမၼ်ႈပဵၼ်ၵူၼ်းထၢင်ႇထိူမ် မိူၼ်ၵူၼ်းၸပ်း တၢင်းပဵၼ်ၶူဝ်ႊဝိတ်ႉ 19 ၊ ၵူၺ်းၵႃႈ တီႈႁူင်းယႃၸဝ်ႈၸၢမ်ႇထုၼ်းတႄႉ မၵ်းမၼ်ႈဢွင်ႈတီႈလွင်ႈၵႂႃႇမႃး ၸိူဝ်းၼၼ်ႉဝႆႉပၼ်မၼ်းယူႇ ဝႃႈၼႆ။

ၼႂ်းမိူင်းတႆးၼႆႉမီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ယူႇ 7 ၵေႃႉ။ လူင်းႁူင်းယႃယဝ်ႉ 6 ၵေႃႉ။ ၵိုတ်းယူႇတီႈ ႁူင်းယႃၵဵင်းတုင် 1 ၵေႃႉ ၵူၺ်းယဝ်ႉ။ ၵူၼ်းမိူင်းတႆး ဢၼ်လုၵ်ႉမိူင်း ၻူႊပၢႆႊမႃးသေ ၸပ်းၸိူဝ်ႉမႅင်း ၶူဝ်ႊဝိတ်ႉ 19 ဝႆႉၼၼ်ႉတႄႉ ယူတ်းယႃတူဝ်ဝႆႉတီႈဝဵင်းတႃႈၵုင်ႈ။