ၼႂ်းၶၢဝ်းၶိဝ်းၵဝ်ႈမိုဝ်ႉသိပ်းဝၼ်းမႃးၼႆႉ ၼႂ်းမိူင်းတႆး ၽူႈမီးပုၼ်ႈၽွၼ်းၶဝ် တီႉလႆႈယႃႈမဝ်းၵမ် ၼပ်ႉႁူဝ်ႁဵင်လၢၼ်ႉပျႃးပၢႆ (ကျပ်သိန်းဘီလီယံကျော်) ဝႃႈၼႆ။
မိူဝ်ႈဝၼ်းတီႈ 30/5/2020 ယၢမ်းၵၢင်ၼႂ် 10 မူင်းၼၼ်ႉ မီးၽူႈၸၢႆးၵေႃႉၼိုင်ႈ ၶီႈရူတ်ႉၶိူင်ႈမႃး၊ မိူဝ်ႈၸမ်ႁွတ်ႈၽႅဝ် တီႈၵဵတ်ႉ/လၢၼ်ႇ ၼိူဝ်သဵၼ်ႈတၢင်း မိူင်းသၢတ်ႇ – မိူင်းတုမ်းၼၼ်ႉ ႁေႃႈရူတ်ႉၶိူင်ႈလႅၼ်ႈပၢႆႈ။ ယူႇတီႈၽူႈမီးပုၼ်ႈၽွၼ်း ပလိၵ်ႈၶဝ် ထၢင်ႇထိူမ်သေ လမ်းတီႉၺွပ်းလႆႈၵူၼ်းႁေႃႈရူတ်ႉၶိူင်ႈၼၼ်ႉယဝ်ႉ ၵူတ်ႇထတ်းထူပ်းႁၼ် ယႃႈမႃႉ 2 သႅၼ်မဵတ်ႉ သႂ်ႇဝႆႉၼႂ်းထူင်ၸၢၼ်ႈ ၼႆယဝ်ႉ။
ၵဵတ်ႉ/လၢၼ်ႇ ၼိူဝ်သဵၼ်ႈတၢင်း မိူင်းသၢတ်ႇ – မိူင်းတုမ်းၼႆႉ မီးႁိမ်းဝၢၼ်ႈၸူးလူႇ (ဂျူးလု ကျေးရွာ) ယူႇၼႂ်းၸႄႈဝဵင်း မိူင်းသၢတ်ႇ ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။
ၼႂ်းလိၵ်ႈပိုၼ်ၽၢဝ်ႇ ၾၢႆႇၽဵဝ်ႈမူၺ်ႉယႃႈမဝ်းၵမ် ဢွၵ်ႇဝႆႉဝႃႈ “ၼႂ်းဝၼ်းတီႈ 30 ယၢမ်းၵၢင်ဝၼ်း 11 မူင်းၼၼ်ႉသမ်ႉ ၵႃးလမ်းၼိုင်ႈ TOYOTA REVO ၵွၼ်ႇပႆႇထိုင်တီႈၵဵတ်ႉၵူတ်ႇထတ်းၼၼ်ႉ ဝိၼ်ႇဝၢႆႇႁူဝ်ၵႃးသေ ႁေႃႈလႅၼ်ႈပၢႆႈလႄႈ ယူႇတီႈၽူႈမီးပုၼ်ႈၽွၼ်းၶဝ် လမ်းယိုဝ်းၸွမ်းၵႃးၼၼ်ႉ၊ ဢဝ်မၢၵ်ႇၵႃးပွင်ႇသေ ၸဝ်ႈၵႃးတၼ်းဢဝ်တူဝ် ပၢႆႈလွတ်ႈ” ဝႃႈၼႆ။
ၼႂ်းၵႃးၼၼ်ႉ တီႉလႆႈယႃႈမႃႉ 3 လၢၼ်ႉမဵတ်ႉ။ ၼႂ်းဝၼ်းလဵဝ်ၵၼ်ၼၼ်ႉၵူၺ်းၼင်ႇၵဝ်ႇ တီႉလႆႈယႃႈမႃႉထႅင်ႈ ၶၼ်ငိုၼ်း 48,000 သႅၼ်ပျႃး ဝႃႈၼႆ။
ဝၼ်းတီႈ 30/5/2020 တီႈပွၵ်ႉႁူဝ်မူၼ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇၼၼ်ႉၵေႃႈ ပလိၵ်ႈလႆႈၶဝ်ႈၵူတ်ႇထတ်း တီႈႁိူၼ်းၵူၼ်းဝၢၼ်ႈ လင်ၼိုင်ႈ တီႉလႆႈယႃႈမႃႉ 72,000 မဵတ်ႉ (မႅၼ်ႈငိုၼ်းယူႇ 1,080 သႅၼ်) ဝႃႈၼႆ။
မိူဝ်ႈဝၼ်းတီႈ 29/5/2020 ယၢမ်းဝၢႆးဝၼ်း 1 မူင်းၼၼ်ႉ ၼိူဝ်သဵၼ်ႈတၢင်း တူၼ်ႈတီး – ၵၢတ်ႇလေႃႉ ဝဵင်းဢွင်ႇပၢၼ်း ၸႄႈဝဵင်းၵၢတ်ႇလေႃႉ (ၵလေႃး) ၸိုင်ႈတႆးပွတ်းၸၢၼ်း ၸဝ်ႈၼႃႈတီႈ လႆႈၵူတ်ႇထတ်းၼႂ်းၵႃး 12 လေႃႉ လမ်းၼိုင်ႈ ထူပ်းႁၼ် ယႃႈဢႆႊသ် ICE ၼမ်ႉၼၵ်း 1,534 ၵီႊလူဝ်ႊ မႅၼ်ႈၶၼ်ငိုၼ်း 38.35 (ပီႇလီႇယၼ်ႇပၢႆ) ဝႃႈၼႆ။
ဢွၼ်ၼႃႈၼၼ်ႉ မိူဝ်ႈဝၼ်းတီႈ 24 ပူၼ်ႉမႃးၼၼ်ႉၵေႃႈ တီႈဝၢၼ်ႈႁူဝ်တိုဝ်ႉ ၸႄႈဝဵင်းလွႆလႅမ်သမ်ႉတီႉလႆႈယႃႈဢႆးသ် ICE ၼမ်ႉၼၵ်း 1615 ၵီႊလူဝ်ႊ မႅၼ်ႈငိုၼ်း 40 ပီႇလီႇယၼ်ႇၵျၢတ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ