ႁူင်းယႃလူင် ၸဝ်ႈၸၢမ်ႇထုၼ်း တေပိုတ်ႇႁွင်ႈ ၵူတ်ႇထတ်း တၢင်းပဵၼ် ၸိူဝ်ႉမႅင်းလၢႆလၢႆဢၼ်ပႃးၸဵမ်ၸိူဝ်ႉမႅင်းၶူဝ်ႊဝိတ်ႉ – 19 ၼႂ်းလိူၼ်ၵျူႊလၢႆႊ တေမႃးၼႆႉ။
ၻွၵ်ႊတိူဝ်ႊ ပူဝ်းပူဝ်းလိၼ်း ႁွင်ႈၵၢၼ်ၾၢႆႇၶူၼ်ႉၶႂႃႉတၢင်းပဵၼ် တီႈႁူင်းယႃလူင် ၸဝ်ႈၸၢမ်ႇထုၼ်း လၢတ်ႈတီႈ ၽူႈတွႆႇႁွၵ်ႈဝႃႈ “ ႁွင်ႈၵၢၼ်ၵူတ်ႇထတ်းတၢင်းပဵၼ်ၶူဝ်ႊဝိတ်ႉ 19 ၼႆႉ တေတႄႇၼႂ်းၵၢင်လိူၼ်ၵျူႊလၢႆႊၵႂႃႇ၊ တေဢဝ်ၶိူင်ႈၸၢၵ်ႈသေ တႄႇၵူတ်ႇထတ်းၵႂႃႇယဝ်ႉ။ ၼိုင်ႈပွၵ်ႈတေၵူတ်ႇထတ်းလႆႈတၢင်းပဵၼ် 96 ဢၼ်။ ၵူတ်ႇထတ်းၼိုင်ႈပွၵ်ႈတေၸႂ်ႉၶၢဝ်းယၢမ်း 2 ၸူဝ်ႈမူင်း ထိုင် 3 ၸူဝ်ႈမူင်းၼႆႉ” ဝႃႈၼႆ။
ၶိူင်ႈၸၢၵ်ႈၵူတ်ႇထတ်းၼႆႉ ဢမ်ႇၸႂ်ႈပဵၼ်ၸၢၵ်ႈၵူတ်ႇထတ်းတၢင်းပဵၼ်ၶူဝ်ႊဝိတ်ႉ – 19 ၼႆႉပိူင်လဵဝ်ၵူၺ်း တၢင်းပဵၼ်ၸိူဝ်ႉမႅင်း တၢင်ႇၸိူဝ်ႉတၢင်ႇပိူင်ၵေႃႈ ၵူတ်ႇထတ်းပႃးလႆႈ ဝႃႈၼႆ။
တေႃႈလဵဝ် ၶိူင်ႈၸၢၵ်ႈဢၼ်မႃးဝႆႉတီႈႁူင်းယႃလူင် ၸဝ်ႈၸၢမ်ႇထုၼ်းၼႆႉ ပဵၼ်ၸၢၵ်ႈဢၼ်ၸဝ်ႈတႃႇၼလူႇတၢၼ်းမႃး ။ ၼွၵ်ႈလိူဝ်ၼၼ်ႉ ယူႇတီႈ ႁွင်ႈၵၢၼ်ၵူတ်ႇထတ်းပၢႆးယူႇလီ ၸၼ်ႉၸိူဝ်ႉၸၢတ်ႈသေ လႆႈတုၵ်းယွၼ်းဝႆႉတီႈ ႁွင်ႈၵၢၼ်ပၢႆးယူႇလီလုမ်ႈၾႃႉ WHO ဝႆႉ ၶိူင်ႈၸၢၵ်ႈထႅင်ႈလုၵ်ႈၼိုင်ႈၼၼ်ႉၵေႃႈ တေႁွတ်ႈမႃးထႅင်ႈယူႇ ဝႃႈၼႆ။
ၶိူင်ႈၸၢၵ်ႈၼႆႉ တွၼ်ႈတႃႇၼႂ်းမိူင်းတႆးၼႆႉ ႁၢင်ႈႁႅၼ်းတေဝႆႉတီႈႁူင်းယႃလူင် ၸဝ်ႈၸၢမ်ႇထုၼ်း တူၼ်ႈတီးၶိူင်ႈၼိုင်ႈလႄႈ ႁူင်းယႃလူင် လႃႈသဵဝ်ႈၶိူင်ႈၼိုင်ႈ ဝႃႈၼႆ။
