တုၵ်းယွၼ်းပၼ်ႁႅင်းၵၢၼ်ယၢၼ်မိူင်း ႁႂ်ႈမီးသုၼ်ႇလႆႈ ႁပ်ႉငိုၼ်းၸွႆႈလိူဝ်

ၸုမ်းၼႅင်ႈသၢၼ်ႁႅင်းၵၢၼ်ယၢၼ်မိူင်း ပွတ်းတွၼ်ႈၼိူဝ် ၸိုင်ႈထႆး ႁူမ်ႈၵၼ်ၵႂႃႇယိုၼ်ႈလိၵ်ႈတုၵ်းယွၼ်း ပၼ်ႁႅင်းၵၢၼ် ႁႂ်ႈမီးသုၼ်ႇလႆႈ ႁပ်ႉငိုၼ်းၸွႆႈလိူဝ် ၸိူဝ်းတူၵ်းၵၢၼ်တူၵ်းငၢၼ်း ယွၼ်ႉၽေးတၢင်းပဵၼ်ၶူဝ်ႊဝိတ်ႉ – 19 ၼႆႉ။

မိူဝ်ႈဝၼ်းတီႈ 28/5/2020 ယူႇတီႈၸုမ်းၼႅင်ႈသၢၼ်ႁႅင်းၵၢၼ်ယၢၼ်မိူင်း ပွတ်းတွၼ်ႈၼိူဝ် ၸိုင်ႈထႆး ႁူမ်ႈၵၼ်သေ ၵႂႃႇယိုၼ်ႈလိၵ်ႈ တုၵ်းယွၼ်း တီႈလုမ်းၵွၼ်းၸႄႈတွၼ်ႈၵဵင်းမႆႇဝႃႈ ႁႅင်းၵၢၼ်ယၢၼ်မိူင်းၸိူဝ်းမီးဝႂ်ႁပ်ႉႁွင်း (ပရႃႊၵၼ်သင်ၶူမ်း)ဝႆႉၼၼ်ႉ ႁႂ်ႈမီးသုၼ်ႇလႆႈႁပ်ႉလွင်ႈၸွႆႈထႅမ် တၢင်းပိူင်ၵူၼ်း ဢမ်ႇၼၼ် လႆႈႁပ်ႉငိုၼ်းၸွႆႈလိူဝ် ဢၼ်လႆႈယၢပ်ႇၽိုတ်ႇယွၼ်ႉၶူဝ်ႊဝိတ်ႉ 19- ၼႆယဝ်ႉ။

ထွင်းၶမ်း ၽူႈၸွႆႈထႅမ်ႁႅင်းၵၢၼ်ယၢၼ်မိူင်း မုလ်ၼိထိ MAP ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၶႃႈ လႆႈၵႂႃႇတုၵ်းယွၼ်းပၼ် ႁႅင်းၵၢၼ် ၸိူဝ်းတူၵ်းၵၢၼ်/ ငၢၼ်း၊ မၢင်ၵေႃႉၵေႃႈ တီႈၼၢႆးၸၢင်ႈ(ပေႃႈလဵင်ႉ/ မႄႈလဵင်ႉ) ၶဝ်ၸႅင်ႈဝႆႉပၼ် ဝႂ်ႁပ်ႉႁွင်း(ပရႃႊၵၼ်သင်ၶူမ်း) ယဝ်ႉ ႁႅင်းၵၢၼ်ႁဝ်းသမ်ႉ ဢမ်ႇလႆႈႁပ်ႉ ၵႃႈႁႅင်းပူၼ်ႉမႃး 2-3 လိူၼ်ယဝ်ႉၸိူဝ်းၼၼ်ႉ ၵွပ်ႈသင်လႄႈ ဢမ်ႇလႆႈႁပ်ႉ။ ယဝ်ႉၵေႃႈ ႁႂ်ႈႁဵတ်းပၼ်ၽႂ်းဢိတ်းၼိုင်ႈ။ လိူဝ်ၼၼ်ႉ တွၼ်ႈတႃႇ ၵူၼ်းၸိူဝ်းဢမ်ႇမီးဝႂ်ႁပ်ႉႁွင်း(ပရႃႊၵၼ်သင်ၶူမ်း) ၸိူဝ်းၼၼ်ႉသမ်ႉ တေၸတ်းၵၢၼ်ပၼ်ၶဝ်လႆႈၸိူင်ႉႁိုဝ် ၸိူဝ်းၼႆႉ” ဝႃႈၼႆ။

ၼႂ်းၶေႃႈတုၵ်းယွၼ်းၼၼ်ႉပႃးဝႆႉထႅင်ႈဝႃႈ ႁႂ်ႈၽူႈမီႈပုၼ်ႈၽွၼ်း ၸတ်းပၼ်ပၵ်းပိူင်မၢႆမီႈ တႃႇႁႅင်းၵၢၼ်ၵႂႃႇႁပ်ႉသုၼ်ႇလႆႈ ၼႂ်းပရႃႊၵၼ်သင်ၶူမ်း ၽွင်းတိုၵ်ႉတေႃႇထႅဝ် ၶဝ်ႈထႅဝ် တႃႇတေႁပ်ႉဢဝ်လွင်ႈသုၼ်ႇလႆႈ ငိုၼ်းၸွႆႈလိူဝ်။ ႁႂ်ႈၽူႈမီးပုၼ်ႈၽွၼ်း လၢတ်ႈၸႃတေႃႇႁႅင်းၵၢၼ်လီလီ။ ႁႂ်ႈမီးလၢမ်ႈ(ၵူၼ်းပိၼ်ႇၽႃသႃ) ပၼ်ပႃး – ၸဵမ်ၸိူဝ်းၼႆႉ ။

ယွၼ်ႉတၢင်းပဵၼ်ၶူဝ်ႊဝိတ်ႉ – 19 သေ ႁႅင်းၵၢၼ်မိူင်းႁူမ်ႈတုမ် လႆႈႁၢမ်းၵၢၼ်ငၢၼ်း ဢမ်ႇလႆႈႁဵတ်းၵၢၼ်လႄႈ ဢမ်ႇမီးငိုၼ်းၶဝ်ႈၵေႃႈ မီးတင်းၼမ်။ မၢင်ၵေႃႉ ဢမ်ႇလႆႈႁဵတ်းၵၢၼ် မီးၶၢဝ်းတၢင်း 2-3 လိူၼ်ယဝ်ႉ ဝႃႈၼႆ။

“ႁႅင်းၵၢၼ်ယၢၼ်မိူင်းႁဝ်းၶႃႈၼႆႉ လႆႈတူၵ်းၵၢၼ်ငၢၼ်းမႃး တေမီး 2-3 လိူၼ်ၼႆႉယဝ်ႉ မၢင်ၵေႃႉမီးဝႆႉဝႂ်ႁပ်ႉႁွင်း (ပရႃႊၵၼ်သင်ၶူမ်း) ယူႇၵေႃႈ ဢမ်ႇလႆႈႁပ်ႉသုၼ်ႇ ငိုၼ်းၸွႆႈလိူၼ်ၸိူဝ်းၼႆၵေႃႈမီးၼမ်လႄႈ ႁႂ်ႈၽူႈမီးပုၼ်းၽွၼ်းၶဝ် သပ်းလႅင်းပၼ် ႁႅင်းၵၢၼ်ႁဝ်း ႁႂ်ႈၶဝ်ပေႃးလႆႈပွင်ႇၸႂ် ဝႃႈႁဵတ်းသင်လႄႈ ႁႅင်းၵၢၼ်ၶဝ် ဢမ်ႇလႆႈငိုၼ်းၶိုၼ်း၊ ၵွပ်ႈသင်လႄႈ ဢမ်ႇလႆႈ ႁႂ်ႈသပ်းလႅင်းပၼ်ၽႃသႃ ႁႅင်းၵၢၼ် ႁႂ်ႈပွင်ႇၸႂ်၊ ပေႃးဝႃႈဢမ်ႇပွင်ႇၸႂ်ၸိူဝ်းၼႆႉ ႁႂ်ႈၸၢင်ႈလၢမ်ႈၵႂႃႇပိၼ်ႇပၼ် လႆႈတုၵ်းယွၼ်းဝႆႉၼင်ႇၼႆ” ထွင်းၶမ်း သပ်းလႅင်းလၢတ်ႈၼႄ။

လိူဝ်ၼၼ်ႉ တွၼ်ႈတႃႇႁႅင်းၵၢၼ် ၸိူဝ်းဢမ်ႇမီးဝႂ် ႁပ်ႉႁွင်း (ပရႃႊၵၼ်သင်ၶူမ်း) တူၵ်းၵၢၼ်/ ငၢၼ်း ၽွင်းတၢင်းပဵၼ် ၶူဝ်ႊဝိတ်ႉ – 19 ၸိူဝ်းၼၼ်ႉတႄႉ ပဵၼ်ဢၼ်ယၢပ်ႇၽိုတ်ႇဝႆႉ ယွၼ်ႉဝႃႈ လွင်ႈၼႆႉ မၼ်းပဵၼ်ၸၼ်ႉလုမ်ႈၾႃႉယဝ်ႉလႄႈ လွင်ႈၸိူဝ်းၼႆႉ တေလႆႈတၢင်ႇၶိုၼ်ႈၵႂႃႇတၢင်းၼိူဝ်ထႅင်ႈၵွၼ်ႇ ဝႃႈၼႆ။

ထႅင်ႈလွင်ႈၼိုင်ႈ မိူၼ်ၼင်ႇ ပေႃႈလဵင်ႉၼၢႆးၸၢင်ႈ ဢမ်ႇသူၼ်ၸႂ် လွင်ႈတၢင်ႇယွၼ်းပၼ် ဝႂ်ႁပ်ႉႁွင်း(ပရႃႊၵၼ်သင်ၶူမ်း) ပၼ်ႁႅင်းၵၢၼ် ၸိူဝ်းတူၵ်းၵၢၼ်/ ငၢၼ်းၸိူဝ်းၼၼ်ႉ ႁႂ်ႈႁႅင်းၵၢၼ်သူင်ႇပၼ်လၢႆးၸိုဝ်ႈလႄႈ ဢွင်ႈတီႈႁဵတ်းၵၢၼ်ၼၼ်ႉ သူင်ႇမႃး၊ ယူႇတီႈၽူႈမီးပုၼ်ႈၽွၼ်း ၾၢႆႇပရႃႊၵၼ်သင်ၶူမ်း တေၸတ်းၵၢၼ်ၵႂႃႇပၼ်ၵူၺ်း ထွမ်းၶမ်းလၢတ်ႈၼႄၼင်ႇၼႆ။

ၸွမ်းၼင်ႇ သဵၼ်ႈသၢႆမၢႆ ႁွင်ႈၵၢၼ်ၾၢႆႇႁႅင်းၵၢၼ် ဢွၵ်ႇဝႆႉတႄႉ တေႃႈလဵဝ်ႁႅင်းၵၢၼ်ယၢၼ်မိူင်း ၸိူဝ်းၶဝ်ႈႁဵတ်းၵၢၼ် ၼႂ်းမိူင်းထႆး တင်းမူတ်းမီးမွၵ်ႈ 3 လၢၼ်ႉပၢႆ။ ၼႂ်းၼၼ်ႉ ႁႅင်းၵၢၼ်မိူင်းႁူမ်ႈတုမ် မီးၼမ်လိူဝ်ပိူၼ်ႈ ဝႃႈၼႆ။