တပ်ႉသိုၵ်းမၢၼ်ႈတီႉလႆႈၶိူင်ႈၵွင်ႈၵၢင်ႇလႄႈ ၶူဝ်းသိုၵ်းတဢၢင်း တီႈမူႇၸေႊ

သိုၵ်းလူင်ပွင်ၸိုင်ႈမၢၼ်ႈ ၶဝ်ႈၵူတ်ႇထတ်းႁိူၼ်းၵူၼ်းဝၢၼ်ႈ တီႈမူႇၸေႊသွင်လင် တီႉလႆႈၶိူင်ႈၵွင်ႈၵၢင်ႇလႄႈ ၶူဝ်းသိုၵ်းတဢၢင်း ၸုမ်ႇၼိုင်ႈ။

ဝၼ်းတီႈ 27/5/2020 ယၢမ်းၵၢင်ၼႂ် 10 မူင်းပၢႆၼၼ်ႉသိုၵ်းလူင်ပွင်ၸိုင်ႈမၢၼ်ႈ ၶဝ်ႈၶူၼ်ႉသွၵ်ႈ ၵူတ်ႇထတ်း ႁိူၼ်းၵူၼ်းဝၢၼ်ႈၼမ်ႉႁွႆ ဢိူင်ႇမိူင်းယူႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ၊ ၾၢႆႇသိုၵ်းမၢၼ်ႈတီႉလႆႈ ၶိူင်ႈၵွင်ႈၵၢင်ႇလႄႈ ၶူဝ်းသိုၵ်း ဢၼ်မီးမိၵ်ႈမၢႆ တပ်ႉသိုၵ်းတဢၢင်း TNLA ၸုမ်ႇၼိုင်ႈ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ သိုၵ်းမၢၼ်ႈ ၵႂႃႇ ၶူၼ်ႉသွၵ်ႈ ၵူတ်ႇထတ်း ၼႂ်းဝၢၼ်ႈၼမ်ႉႁွႆ တၢင်း 105 လၵ်းၼၼ်ႉ။ တီႉလႆႈ ၵွင်ႈ၊ မၢၵ်ႇၵွင်ႈ၊ မၢၵ်ႇပွမ်း ၸိူဝ်းၼႆႉယဝ်ႉၵေႃႈ ၵႂႃႇၵူတ်ႇထတ်း ထႅင်ႈႁိူၼ်းလင်ၼိုင်ႈ၊ တီႈၼၼ်ႈသမ်ႉ တီႉလႆႈ ၶူဝ်းသိုၵ်း ဢၼ်မီးမိၵ်ႈသိုၵ်းတဢၢင်းၸုမ်ႇၼိုင်ႈ” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ ႁွင်ႈၵၢၼ်ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ဢွၵ်ႇဝႆႉတႄႉ တီႉလႆႈမၢၵ်ႇပွမ်း၊ မႅၵ်ႉၵွင်ႈ၊ မၢၵ်ႇၵွင်ႈ၊ ၵွင်ႈ M-22 ၸိူဝ်းၼႆႉသေ ပႃးသိူဝ်ႈၶူဝ်းတပ်ႉသိုၵ်းတဢၢင်းထႅင်ႈ။ ၵဵဝ်ႇၵပ်းလွင်ႈၼႆႉ လႆႈမွပ်ႈပၼ်ၼႂ်းမိုဝ်း ၽူႈမီးပုၼ်ႈၽွၼ်းပလိၵ်ႈၶဝ်သေ ၸႅင်ႈၵႂၢမ်းတေႃႇ ၵူၼ်းၸိူဝ်းၵဵဝ်ႇၶွင်ႈဝႆႉ – ဝႃႈၼႆ။

ၼႂ်းၸႄႈဝဵင်းမူႇၸေႊၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးၼမ်၊ ၸုမ်းပျီႇတူႉၸိတ်ႉၵေႃႈၼမ် ၵၢၼ်လၵ်ႉ၊ ၵၢၼ်ၸူၼ်၊ ၵၢၼ်ၶႃႈႁႅမ်ၵၼ်လႄႈ ၵၢၼ်ၵဝ်းသုၵ်ႉယုင်ႈ ပွႆႇမၢၵ်ႇတႅၵ်ႇၸွမ်းၼႂ်းဝဵင်းၸိူဝ်းၼႆႉ မီးယူႇတႃႇသေႇ။ ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်းပလိၵ်ႈၶဝ် ဢမ်ႇတွၼ်ႉတီႈလႆႈတူဝ်ၵူၼ်းႁၢႆႉမႃးသေပွၵ်ႈ ၵူၼ်းမိူင်းမူႇၸေႊ လၢတ်ႈၼႄၼင်ႇၼႆ။

မိူဝ်ႈဝၼ်းတီႈ 26/5/2020 ယၢမ်းဝၢႆးဝၼ်း မွၵ်ႈ 1 မူင်းၼၼ်ႉ မၢၵ်ႇတႅၵ်ႇတီႈပွၵ်ႉၸွၼ်ႊၸူဝ်ႇ 2 လုၵ်ႈထပ်းၵၼ်။ ယဝ်ႉၵေႃႈ ၼႂ်းဝၼ်းတီႈ 26 ယၢမ်းဝၢႆးဝၼ်းၼၼ်ႉၵူၺ်းၼင်ႇၵဝ်ႇ ယူႇတီႈပလိၵ်ႈမၢၼ်ႈ တင်း သိုၵ်းမၢၼ်ႈ ႁွၼ်ႈထဝ်ႇၶူၼ်ႉသွၵ်ႈ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ၊ ႁႄႉၵႃးၵူၼ်းမိူင်းလမ်းၼိုင်ႈ ၵူတ်ႇထတ်းထူပ်းႁၼ် ၼႂ်းၵႃးၼၼ်ႉ မီးမၢၵ်ႇမႅင်း(မၢၵ်ႇပွမ်း) 4 လုၵ်ႈ၊ ၶူၼ်ႉသွၵ်ႈတီႈႁၢၼ်ႉ KTV ပွၵ်ႉၵွင်းမူးတူင်ႈ တီႈၼၼ်ႈၵေႃႈ ၾၢႆႇသိုၵ်းမၢၼ်ႈ တီႉလႆႈၵွင်ႈပွတ်း၊ မၢၵ်ႇၵွင်ႈလႄႈ ၸၢၵ်ႈလၢတ်ႈ ၸိူဝ်းၼႆႉထႅင်ႈ ၼႆယဝ်ႉ။