ပလိၵ်ႈမၢၼ်ႈ သိုၵ်းမၢၼ်ႈ ၵူတ်ႇထတ်း ရူတ်ႉၵႃးလမ်းၼိုင်ႈ ၼႂ်းဝဵင်းမူႇၸေႊ တီႉလႆႈ မၢၵ်ႇမႅင်း(မၢၵ်ႇပွမ်း) သႂ်ႇဝႆႉၼႂ်းၵႃး 4 လုၵ်ႈ၊ ၶူၼ်ႉသွၵ်ႈ တီႉလႆႈပႃးၵွင်ႈပွတ်းတင်း ၸၢၵ်ႈလၢတ်ႈ ၸိူဝ်းၼႆႉထႅင်ႈ။

ဝၼ်းတီႈ 26/5/2020 ယၢမ်းဝၢႆးဝၼ်းၼၼ်ႉ ယူႇတီႈပလိၵ်ႈမၢၼ်ႈ တင်း သိုၵ်းမၢၼ်ႈ ႁွၼ်ႈထဝ်ႇ ၶူၼ်ႉသွၵ်ႈ ၼႂ်းၸႄႈဝဵင်း မူႇၸေႊ ၸိုင်ႈတႆးပွတ်းႁွင်ႇ၊ ႁႄႉၵႃးၵူၼ်းမိူင်းလမ်းၼိုင်ႈ ၵူတ်ႇထတ်းထူပ်းႁၼ် ၼႂ်းၵႃးၼၼ်ႉ မီးမၢၵ်ႇမႅင်း(မၢၵ်ႇပွမ်း) 4 လုၵ်ႈ၊ လႆႈၸွမ်းၵႂႃႇၵူတ်ႇထတ်းတီႈႁၢၼ်ႉ KTV ပွၵ်ႉၵွင်းမူးတူင်ႈထႅင်ႈသေ ထူပ်းႁၼ် ၵွင်ႈပွတ်း၊ မၢၵ်ႇၵွင်ႈလႄႈ ၸၢၵ်ႈလၢတ်ႈ ၸိူဝ်းၼႆႉထႅင်ႈ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်းလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ“ ၵူၼ်းႁဵတ်းၵၢၼ်တီႈ Moon Light KTV ၵေႃႉၼိုင်ႈ ႁေႃႈၵႃးမႃးသေ ၵူတ်ႇထတ်းတီႉလႆႈ ၼႂ်းၵႃးၼၼ်ႉ မီးမၢၵ်ႇပွမ်း 4 လုၵ်ႈ။ ယဝ်ႉၵေႃႈ ယူႇတီႈ ပလိၵ်ႈမၢၼ်ႈ သိုၵ်းမၢၼ်ႈ ၶဝ် ၸွမ်းၵႂႃႇၵူတ်ႇထတ်းထႅင်ႈတီႈႁၢၼ်ႉ Moon Light KTV တီႈပွၵ်ႉၵွင်းမူးတူင်ႈ တၢင်းလႅၼ်ဝၢၼ်ႈ ႁူဝ်ၼႃးၼၼ်ႉထႅင်ႈ ထူပ်းႁၼ် ၵွင်ႈပွတ်း၊ မၢၵ်ႇၵွင်ႈလႄႈ ၸၢၵ်ႈလၢတ်ႈထႅင်ႈ” ဝႃႈၼႆ။

ဢိင်ၼိူဝ်လွင်ႈၼႆႉသေ ယူႇတီႈ ၽူႈမီးပုၼ်ႈၽွၼ်းပလိၵ်ႈၶဝ် လႆႈၵုမ်းတူဝ်ပိုတ်ႇလိူင်ႈၵူၼ်းႁဵတ်းၵၢၼ် တီႈႁၢၼ်ႉ KTV ဢၼ်ၵဵဝ်ႇၶွင်ႈၸွမ်းၼၼ်ႉဝႆႉတီႈႁူင်းပလိၵ်ႈ ဝဵင်းမူႇၸေႊ ။

မိူဝ်ႈဝၼ်းတီႈ 26/5/2020 ယၢမ်းဝၢႆးဝၼ်း မွၵ်ႈ 1 မူင်းၼၼ်ႉၵေႃႈ မၢၵ်ႇတႅၵ်ႇတီႈပွၵ်ႉၸွၼ်ႊၸူဝ်ႇ ၸႄႈဝဵင်းမူႇၸေႊ 2 လုၵ်ႈ ထပ်းၵၼ်၊ ဝၢႆးမၢၵ်ႇတႅၵ်ႇယဝ်ႉၼၼ်ႉ ပလိၵ်ႈမၢၼ်ႈ တင်း သိုၵ်းမၢၼ်ႈ ႁူမ်ႈၵၼ်သေ ပႂ်ႉတင်ႈလၢၼ်ႇၵူတ်ႇထတ်း ၼႂ်းၸႄႈဝဵင်းမူႇၸေႊ ႁၢဝ်ႈႁႅင်း ။