ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႈလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ တေလူင်းပိုၼ်ႉတီႈ ၸႅၵ်ႇဝႂ်ပိဝ် ပၼ်တၢင်းႁူႉရေႃးၵႃႇ ၶူဝ်ႊဝိတ်ႉ – 19 ၼႂ်းလၢႆလၢႆ ၸႄႈဝဵင်း မိူင်းတႆးပွတ်းႁွင်ႇ ဝႃႈၼႆ။
ၽွင်းႁၢင်လိူၼ်မေႊ 2020 ၼႆႉ ယူႇတီႈၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ တေလူင်းပိုၼ်ႉတီႈ ၸႅၵ်ႇဝႂ်ပိဝ်/ ၽိုၼ်ၶၢဝ်ႇၽူႈတႅၼ်း ပၼ်ၵူၼ်းမိူင်း ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ တေပၼ်လွင်ႈပိုၼ်ႉႁူႉ ရေႃးၵႃႇ တၢင်းပဵၼ်ၶူဝ်ႊဝိတ်ႉ – 19 ၼင်ႇႁိုဝ် ၵူၼ်းမိူင်းပိုၼ်ႉတီႈ ပေႃးတေလႆႈႁပ်ႉႁူႉလႄႈ ၵႅတ်ႇၶႄႁႄႉၵင်ႈၵၼ် ဝႃႈၼႆ။
ၸၢႆးဝၼ်းလႅင်းၶမ်း လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၶႃႈႁဝ်းသေ ႁဵတ်းဢွၵ်ႇမႃး ၽိုၼ်ၶၢဝ်ႇ ပၼ်တၢင်းႁူႉ လွင်ႈတၢင်းပဵၼ်ၶူဝ်ႊဝိတ်ႉၼႆႉ ပိူင်ယႂ်ႇမၼ်း ၶႂ်ႈႁႂ်ႈပီႈၼွင်ႉ ႁူႉလွင်ႈၶူဝ်ႊဝိတ်ႉ၊ ယဝ်ႉၵေႃႈ ႁဝ်းၶႃႈၽူႈတႅၼ်းၵေႃႈ ဢမ်ႇလူင်လိုမ်းပီႈၼွင်ႉၵူၼ်းမိူင်းၼႆၼၼ်ႉ ၶႂ်ႈႁႂ်ႈပီႈၼွင်ႉႁဝ်း ႁူႉထိုင်ဝႆႉသေ လႆႈပၼ်ဝႆႉမၢႆၾူၼ်းတီႈၵပ်းသိုပ်ႇ၊ ႁႂ်ႈၸၢင်ႈလႆႈၵွင်ႉသၢၼ်ၵၼ်တႃႇသေႇ” ဝႃႈၼႆ။
လိူဝ်ၼၼ်ႉ ၽူႈတႅၼ်းသၽႃး မၢင်ၵေႃႉၵေႃႈ ယိူင်းဢၢၼ်းဝႆႉ တေႁဵတ်းဝႂ်ပိဝ်/ ၽိုၼ်ၶၢဝ်ႇၽူႈတႅၼ်း လွင်ႈပၼ်ပိုၼ်ႉႁူႉ တၢင်းပဵၼ်ၶူဝ်ႊဝိတ်ႉ – 19 ၼႆႉ ၸႅၵ်ႇပၼ်ၵူၼ်းမိူင်းၵႂႃႇ ၼင်ႇႁိုဝ် ၵူၼ်းမိူင်းပိုၼ်ႉတီႈ ပေႃးတေလႆႈႁပ်ႉႁူႉၶေႃႈမုလ်း လွင်ႈလွၵ်းလၢႆးႁႄႉၵင်ႈတၢင်းပဵၼ်ၵၼ်ၵႂႃႇ ဝႃႈၼႆ။
လိၵ်ႈၽိုၼ်ၶၢဝ်ႇၽူႈတႅၼ်းၼႆႉ ယူႇတီႈ National Democratic Institute – NDI ၵမ်ႉၸွႆႈမႃး၊ တေႁဵတ်းဢွၵ်ႇၽႃသႃ လိၵ်ႈတႆးသေ တေ တႄႇ ၸႅၵ်ႇၵႂႃႇ ၼႂ်းၸႄႈဝဵင်းလႃႈသဵဝ်ႈၵႂႃႇ တႃႇ 1,000 ၽိုၼ် ဝႃၼႆ။
တၢင်းပဵၼ်ၶူဝ်ႊဝိတ်ႉ 19 ၼႆႉ ၽႄႈႁၢဝ်ႈႁႅင်းတၢင်းလုမ်ႈၾႃႉ၊ ၵူၼ်းမိူင်းမၢၼ်ႈ တိတ်းၸပ်း 206 ၵေႃႉ။ လူႉတၢႆ 6 ၵေႃႉ၊ ယႃၶႅၼ်း 124 ၵေႃႉ ၵူၼ်းမိူင်းတႆး တေႉ ၸပ်း 8 ၵေႃႉ။ လူႉတၢႆ တေႉဢမ်ႇမီး။
