ၶိူင်ႈၸၢၵ်ႈၵူတ်ႇထတ်း ၸိူဝ်ႉမႅင်းၶူဝ်ႊဝိတ်ႉ တေဝႆႉၼႂ်းမိူင်းတႆးသွင်တီႈ

ၶိူင်ႈၸၢၵ်ႈၵူတ်ႇထတ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 တေဝႆႉၼႂ်းမိူင်းတႆး 2 ၶိူင်ႈ တီႈပွတ်းႁွင်ႇလႄႈ ပွတ်းၸၢၼ်း ဝႃႈၼႆ။

ၶိူင်ႈၸၢၵ်ႈၵူတ်ႇထတ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 ၼႆႉ တေဝႆႉတီႈႁူင်းယႃလူင် ၸဝ်ႈၸၢမ်ႇထုၼ်း ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ၶိူင်ႈၼိုင်ႈလႄႈ တီႈႁူင်းယႃလူင် ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၶိူင်ႈၼိုင်ႈ ဝႃႈၼႆ။

ၻွၵ်ႊတိူဝ်ႊမဵဝ်းထုၼ်း ၽွင်းလူင်ၾၢႆႇတူင်ႇဝူင်းၵူၼ်း ၸုမ်းလူင်ပွင်ၸိုင်ႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် တိုၵ်ႉႁၢင်ႈႁႅၼ်းဢွင်ႈတီႈတႃႇတေဝႆႉၶိူင်ႈၸၢၵ်ႈမၼ်းယူႇဢေႃႈ။ တီႈလႃႈသဵဝ်ႈၵေႃႈမိူၼ်ၵၼ်ၶႃႈယဝ်ႉ ယူႇတီႈႁွင်ႈၵၢၼ်ပၢႆး ယူႇလီၶဝ် တိုၵ်ႉၶပ်းၶိုင်ႁၢင်ႈႁႅၼ်းဝႆႉယူႇ” ဝႃႈၼႆ။

တႃႇတေၵူတ်ႇထတ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 တိုၵ်ႉၵႂႃႇထတ်းတီႈဝဵင်းတႃႈၵုင်ႈ၊ ၾၢႆႇၼိုင်ႈ ပေႃးတင်ႈၶိူင်ႈယဝ်ႉ တႃႇမေႃယႃ တေမေႃၵူတ်ႇထတ်းၼၼ်ႉ မေႃယႃၵမ်ႈၽွင်ႈတိုၵ်ႉၵႂႃႇလဵပ်ႈႁဵၼ်း တီႈ တႃႈၵုင်ႈယူႇ။ တႃႇႁူင်းယႃတီႈ ဝဵင်းလႃႈသဵဝ်ႈၵေႃႈ မိူၼ်ၵၼ် ဝႃႈၼႆ။

ၻွၵ်ႊတိူဝ်ႊမဵဝ်းထုၼ်း သိုပ်ႇလၢတ်ႈဝႃႈ “ၶိူင်ႈၸၢၵ်ႈၼႆႉတႄႉ ယူႇတီႈႁွင်ႈၵၢၼ်လူင်ၾၢႆႇပၢႆးယူႇလီ လူင်ပွင်ၸိုင်ႈၵၢင် ပၼ်မႃး။ ၵႃႈတေႃႉတၢင်ႇ တေႉ ယူႇတီႈလူင်ပွင်ၸိုင်ႈမိူင်းတႆး တေလႆႈဢွၵ်ႇ” ဝႃႈၼႆ။

ၶိူင်ႈၸၢၵ်ႈဢၼ်ၵူတ်ႇထတ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 ၼႆႉ ၼိုင်ႈၶိူင်ႈလႂ် တူၵ်းမႅၼ်ႈငိုၼ်းမၢၼ်ႈယူႇ 1,264 သႅၼ်ပျႃး။ တႃႇတိတ်းတင်ႈလႄႈ ၶိူင်ႈၸႂ်ႉယွႆႈယႅမ်း တႃႇမေႃ ၸႂ်ႉသွႆ ၸိူဝ်းၼႆႉၵေႃႈ တူၵ်းမႅၼ်ႈၼမ် မိူၼ်ၵၼ် ဝႃႈၼႆ။

တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းတႆးၼႆႉ တင်းမူတ်းမီး 7 ၵေႃႉ။ တႃႇ 5 ၵေႃႉတႄႉ လႆႈၶႂၢင်ႉလူင်း ႁူင်းယႃယဝ်ႉ။ ၵူၼ်းပဵၼ် တီႈဝဵင်းၵဵင်းတုင်သွင်ၵေႃႉ တေႉ တႃႇၵေႃႉၼိုင်ႈ ၵူတ်ႇထတ်း ဢမ်ႇႁၼ်ၸိူဝ်ႉမႅင်းယဝ်ႉလႄႈ တေလႆႈပႂ်ႉတူၺ်းထႅင်ႈ တႃႇၶၢဝ်းတၢင်း 14 ဝၼ်းယဝ်ႉ ၸင်ႈလႆႈၶႂၢင်လူင်းႁူင်းယႃ ယဝ်ႉ ဝႃႈၼႆ။

ၼႂ်းမိူင်းႁူမ်ႈတုမ် ၵူၼ်းၸပ်းၸိူဝ်ႉမႅင်းတၢင်းပဵၼ် တင်းမူတ်း 206 ၵေႃႉ၊ လူႉတၢႆ 6 ၵေႃႉ၊ ယႃၶႅၼ်း 124 ၵေႃႉလႄႈ ယူတ်းယႃ 76 ၵေႃႉ။