ၸုမ်းပျီႇတူႉၸိတ်ႉ မိူင်းပေႃႈ မႃးယွၼ်းတွင်းပၢၼ်ႇၶိုၼ်း လွင်ႈလႆႈပူၼ်ႉပႅၼ်ပေႃႉထုပ်ႉၵူၼ်းဝၢၼ်ႈလႄႈ ယိုဝ်းၵွင်ႈလွၵ်ႇငိုတ်ႈၵူၼ်းဝၢၼ်ႈ တီႈဝၢၼ်ႈမေႃႈတွင်း ဝဵင်းမူႇၸေႊၼၼ်ႉ ဝႃႈၼႆ။
ဝၼ်းတီႈ 25/5/2020 ယၢမ်းၵၢင်ၼႂ် 9 မူင်းထိုင် 11 မူင်းၶိုင်ႈ ၽူႈမီးပုၼ်ႈၽွၼ်း ၵူၼ်းလူင် ၼႂ်းၸုမ်းပျီႇတူႉၸိတ်ႉ မိူင်းပေႃႈ 3-4 ၵေႃႉ ႁူမ်ႈၵၼ်သေ မႃးယွၼ်းတွင်းပၢၼ်ႇၶိုၼ်း လွင်ႈလႆႈပူၼ်ႉပႅၼ်ပေႃႉထုပ်ႉၵူၼ်းဝၢၼ်ႈ ၸၢႆးၼုမ်ႇလႅင်း ဢႃယု 17 ပီ လႄႈ လႆႈယိုဝ်းၵွင်ႈလွၵ်ႇထႅင်ႈလၢႆလၢႆၵမ်း တီႈၼႃႈႁိူၼ်း ၸၢႆးၼုမ်ႇလႅင်း ဝၢၼ်ႈမေႃႈတွင်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၽူႈယႂ်ႇၵူၼ်းလူင် ၼႂ်းပျီႇတူႉၸိတ်ႉ မိူင်းပေႃႈ ဢၼ်တူၵ်းပုၼ်ႈၽွၼ်းဝႆႉတီႈ ဝၢၼ်ႈမေႃႈတွင်းၼၼ်ႉ 3-4 ၵေႃႉ မႃးယွၼ်းၼွမ်း တွင်းပၢၼ်ႇၶိုၼ်းယဝ်ႉ။ လွင်ႈၵူၼ်းၸုမ်းၶဝ် မႃးပေႃႉထုပ်ႉၵူၼ်းဝၢၼ်ႈ ၸၢႆးၼုမ်ႇလႅင်းလႄႈ ယိုဝ်းၵွင်ႈလွၵ်ႇငိုတ်ႈၸိူဝ်းၼၼ်ႉ၊ မႃးသုၵ်ႈၼႃႈမႄးတႃသေ သၢႆႈတႅၼ်းပၼ်ၸဝ်ႈႁိူၼ်း ဢၼ်ထုၵ်ႇပေႃႉထုပ်ႉၼၼ်ႉ တႃႇငိုၼ်း 24 သႅၼ်ပျႃး။ လိူဝ်သေၼၼ်ႉ သုၵ်ႈၼႃးမႄးတႃ တႃႇဝၢၼ်ႈမေႃႇတွင်းထႅင်ႈ ႁူမ်ႈၵၼ်တင်းမူတ်းတေပဵၼ်ငိုၼ်းယူႇ 30 သႅၼ်ပျႃးၼႆႉ” ဝႃႈၼႆ။
တီႈပၢင်ဢုပ်ႇဢူဝ်းၵၼ်ၼၼ်ႉ မီးၽူႈယႂ်ႇၵူၼ်းလူင် ပျီႇတူႉၸိတ်ႉ မိူင်းပေႃႈ၊ ၽူႈၵွၼ်းဢိူင်ႇ၊ ၽူႈၵွၼ်းဝၢၼ်ႈ၊ ႁူဝ်မၢဝ်ႇ၊ ၾၢႆႇၶႄၾႆးမေႃႈတွင်း၊ ၸုမ်းပျီႇတူႉၸိတ်ႉသႅင်ၵႅဝ်ႉ ၸိူဝ်းၼႆႉ လႆႈမႃးဢုပ်ႇဢူဝ်းငူပ်ႉငီႉၵၼ်သေ တင်းသွင်ၾၢႆႇ ၸင်ႇတေလူင်းလၢႆးမိုဝ်းၵိၼ်ၵႅၼ်ႇတေႃႇၵၼ်ဝႃႈ သိုပ်ႇၵႂႃႇတေဢမ်ႇႁႂ်ႈပဵၼ်ထႅင်ႈ ၸိူဝ်းၼႆႉသေ ယဝ်ႉတူဝ်ႈၵႂႃႇလီငၢမ်း ဝႃႈၼႆ။
ၸၢႆးႁိၼ်လဵၵ်း သိုပ်ႇလၢတ်ႈဝႃႈ “ တီႈပၢင်ဢုပ်ႇဢူဝ်းၵၼ်ၼၼ်ႉ ယူႇတီႈၽူႈၵွၼ်းဢိူင်ႇ/ ဝၢၼ်ႈ မေႃႈတွင်းၶဝ် တဵင်ၵႂၢမ်း ဝႆႉဝႃႈထႅင်ႈ သင်ဝႃႈ ၸုမ်းပျီႇတူႇၸိတ်ႉ ႁဵတ်းပူၼ်ႉပႅၼ်တေႃႇၵူၼ်းဝၢၼ်ႈထႅင်ႈၸိုင် တေဢဝ်လိူင်ႈမၢပ်ႇမႂ်သေဢမ်ႇၵႃး တေလိုပ်ႈဢွၵ်ႇဝၢၼ်ႈၵႂႃႇ ဢမ်ႇပၼ်မႃးပၵ်းသဝ်းတီႈဝၢၼ်ႈၼႆႉ” ဝႃႈၼႆ။
မိူဝ်ႈဝၼ်းတီႈ 24/5/2020 ယၢမ်းႁူဝ်ၶမ်ႈ မွၵ်ႈ 6 မူင်းၶိုင်ႈၼၼ်ႉ ပျီႇတူႇၸိတ်ႉမိူင်းပေႃႈ 4 ၵေႃႉ ၶဝ်ႈမႃးပေႃႉထုပ်ႉ ၸၢႆးၼုမ်ႇလႅင်း ဢႃယု 17 ပီ တီႈၼႃႈႁိူၼ်းမၼ်းၸၢႆး ဝၢၼ်ႈမေႃႈတွင်း 3-4 ၵမ်း၊ ပေႃႉထုပ်ႉတီႈ ၵွင်ႇၵေႃႈမၼ်းၸၢႆးသေ ယိုဝ်းၵွင်ႈလွၵ်ႇငိုတ်ႈပႃးထႅင်ႈ 3-4 ၵမ်း ၼႆယဝ်ႉ။
ၸုမ်းပျီႇတူႉၸိတ်ႉ ဢၼ်မႃးပူၼ်ႉပႅၼ်ပေႃႉထုပ်ႉၵူၼ်းဝၢၼ်ႈလႄႈ ယိုဝ်ႈၵွင်ႈလွၵ်ႇငိုတ်ႈၼၼ်ႉ ပဵၼ် မွင်ႇလၢဝ်းၶၢႆႉ၊ ၸၢႆးယီႈပူႉ၊ မွင်ႇၵျေႃႇဢူးလႄႈ မွင်ႇတဵင်းဢွင်ႇ ၸိူဝ်းၼႆႉ။
တီႈမူႇၸေႊၼႆႉ ပၢင်တေႃႇလွင်းၵေႃႈၼမ်၊ ယႃႈမဝ်းၵမ်ၵေႃႈၼမ်၊ ၵူၼ်းလၵ်ႉၵူၼ်းၸူၼ်ၵေႃႈၼမ်၊ ၵူၼ်းၶႃႈႁႅမ်ၵၼ် ၸိူဝ်းၼႆႉၵေႃႈ ၵႆႉမီး။ မၢင်ပွၵ်ႈမၢင်လႂ် မၢၵ်ႇတႅၵ်ႇၸိူဝ်းၼႆႉသေ ၵူၼ်းမူႇၸေႊ ၶၢင်းဝႃႈ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ။
ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ် တႆး-ၶႄႇဝဵင်းၼိုင်ႈၵေႃႈၸႂ်ႈ၊ ပဵၼ်ဝဵင်းၵႃႉၶၢႆ ပၢႆးမၢၵ်ႈမီးၵေႃႈပဵၼ်သေ ၸုမ်းယိပ်းၵွင်ႈၵၢင်ႇ တူင်ႉၼိုင် ယူႇသဝ်းၵေႃႈၼမ်။
