ၵူၼ်းတိတ်ႉၸပ်းၸိူဝ်ႉမႅင်း ၶူဝ်ႊဝိတ်ႉ – 19 ၵေႃႉထူၼ်ႈ 112 ဢၼ်မီးတီႈႁူင်းယႃၵဵင်းတုင် ၼၼ်ႉ ၵူတ်ႇထတ်းတၢင်းပဵၼ် ဢွၵ်ႇ ၵႂၢမ်းတွပ်ႇမႃးဝႃႈ ဢမ်ႇမီးမႅင်း (ပဵၼ် Negative ) ယဝ်ႉ ဝႃႈၼႆ။
ဝၼ်းတီႈ 22/5/2020 ပူၼ်ႉမႃးၼႆႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၵေႃႉထူၼ်ႈ 112 ဢၼ်ယူတ်းယႃတူဝ်ဝႆႉ တီႈႁူင်းယႃလူင် ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းၼၼ်ႉ လႆႈၵူတ်ႇထတ်းတူၺ်းမႅင်းထႅင်ႈၵမ်း႞ ၶေႃႈတွပ်ႇဢွၵ်ႇမႃးပဵၼ် Negative (ဢမ်ႇမီးမႅင်း)ယဝ်ႉလႄႈ ယူႇတီႈမေႃယႃၶဝ် လႆႈႁၢင်ႈႁႅၼ်းၶၢႆႉႁွင်ႈယူတ်းယႃဝႆႉထႅင်ႈတီႈၼိုင်ႈသေ တေပႂ်ႉတူၺ်းၼႂ်းၶၢဝ်းတၢင်းထႅင်ႈ 14 ဝၼ်း၊ သင်ဝႃႈ ဢမ်ႇပဵၼ်သင်ၸိုင် တေပၼ်ၶႂၢင်ႉလူင်းႁူင်းယႃယဝ်ႉ ဝႃႈၼႆ။
ၻွၵ်ႊတိူဝ်ႊ လႃႉထေးမိၼ်း ၽူႈၵွၼ်းႁူင်းယႃ ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပဵၼ်ၵေႃႉထူၼ်ႈ 112 ၼၼ်ႉ တေပႂ်ႉတူၺ်းထႅင်ႈ ၶၢဝ်းတၢင်း 14 ဝၼ်း။ ပေႃးပႂ်ႉတူၺ်း တဵမ် 14 ဝၼ်းယဝ်ႉၵေႃႈ တေပၼ်ၶႂၢင်ႉလူင်းႁူင်းယႃယဝ်ႉ” ဝႃႈၼႆ။
ၵူၺ်းၵႃႈ တီႈႁူင်းယႃလူင် ၵဵင်းတုင်ၼႆႉ ၵိုတ်းထႅင်ႈၵေႃႉၼိုင်ႈ ၵူၼ်းပဵၼ်ၵေႃႉထူၼ်ႈ 64 ၼၼ်ႉ ၵူတ်ႇထတ်းတၢင်းပဵၼ် ဢွၵ်ႇမႃးၵႂၢမ်းတွပ်ႇ တိုၵ်ႉပဵၼ် Positive (မီးမႅင်း)ဝႆႉယူႇ။ ၵူၼ်းပဵၼ် ၵေႃႉထူၼ်ႈ 64 ၼႆႉ လႆႈသူင်ႇၵူတ်ႇထတ်းတၢင်းပဵၼ် တင်းမူတ်းမီး 7 ပွၵ်ႈယဝ်ႉ ဝႃႈၼႆ။
ၼႂ်းၸႄႈဝဵင်းၵဵင်းတုင်ၼႆႉ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်းမီး 3 ၵေႃႉ။ ၵူၼ်းပဵၼ်ၵေႃႉထူၼ်ႈ 96 (ပဵၼ်မေႃယႃ) ၼၼ်ႉတႄႉ လႆႈၶႂၢင်ႉလူင်းႁူင်းယႃ မိူဝ်ႈဝၼ်းတီႈ 20/5/2020 ပူၼ်ႉမႃးၼႆႉ။ ၵေႃႉထူၼ်ႈ 112 (ၼၢင်းမေႃယႃလုမ်းလႃး Nurse) ၼၼ်ႉတႄႉ တေပႂ်ႉတူၺ်း ထႅင်ႈငဝ်းလၢႆးတၢင်းပဵၼ် 14 ဝၼ်း။ ၵူၼ်းပဵၼ် ၵေႃႉထူၼ်ႈ 64 (ၵူၼ်းမိူင်းၽျၢၵ်ႈ) ၼၼ်ႉတႄႉ တိုၵ်ႉမီးၸိူဝ်ႉမႅင်း ယူႇ ဝႃႈၼႆ။
ၼႂ်းမိူင်းတႆးၼႆႉ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ – 19 တင်းမူတ်းမီး 8 ၵေႃႉ။ ပွတ်းၸၢၼ်း 3 ၵေႃႉ၊ ပွတ်းႁွင်ႇ 2 ၵေႃႉလႄႈ ပွတ်းဢွၵ်ႇၶူင်း 3 ၵေႃႉ။ ၼႂ်းၵူၼ်းပဵၼ် 8 ၵေႃႉၼၼ်ႉ ဢၼ်ၵူတ်ႇထတ်းဢွၵ်ႇမႃး ပဵၼ် Negative တင်းမူတ်းမီး 6 ၵေႃႉ။ တႃႇ 2 ၵေႃႉတႄႉ တိုၵ်ႉပဵၼ် Positive ဝႆႉယူႇ ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်းမီး 203 ၵေႃႉ၊ လူႉတၢႆ 6 ၵေႃႉ၊ ယႃၶႅၼ်း 123 ၵေႃႉလႄႈ တိုၵ်ႉယူတ်းယႃ 74 ၵေႃႉ ဝႃႈၼႆ။
