ၽၵ်းတူ/ ၶူဝ်လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) ပိၵ်ႉဢိုတ်းမႃး ၶွပ်ႈတဵမ် 2 လိူၼ်ယဝ်ႉ မီးလွင်ႈတုမ်ႉတိူဝ်ႉၵၢၼ်ၵႃႉၶၢႆပၢႆးမၢၵ်ႈမီးလႄႈ ၵူၼ်းႁဵတ်းၵိၼ်ၵၢၼ်ၸွမ်းဝၼ်း ႁၢဝ်ႈႁႅင်း။

ၽၵ်းတူ/ ၶူဝ်လႅၼ်လိၼ်တႆး – ထႆး (တႃႈၶီႈလဵၵ်း – မႄႈသၢႆ) ၼႆႉ ယွၼ်ႉၽေးတၢင်းပဵၼ် ၶူဝ်ႊဝိတ်ႉ – 19 သေ ယူႇတီႈလူင်ပွင်ၸိုင်ႈမိူင်းထႆး ၸီႉသင်ႇပိၵ်ႉဢိုတ်းမႃး တင်ႈတႄႇ ဝၼ်းတီႈ 23/3/2020 သေ တေႃႇထိုင် ဝၼ်းတီႈ 23/5/2020 ၼႆႉ မီးၶၢဝ်းတၢင်း 2 လိူၼ်ယဝ်ႉ၊ လွင်ႈၼႆႉႁဵတ်းႁႂ်ႈ တုမ်ႉတိူဝ်ႉၵၢၼ်ပၢႆးမၢၵ်ႈမီး ၵူၼ်းပိုၼ်ႉတီႈ တူၵ်းၵၢၼ်တူၵ်းငၢၼ်းၵၼ်ၼမ် ဝႃႈၼႆ။

ၸၢႆးၼုမ်ႇတုၺ်ႈ ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈယဝ်ႉၶႃႈ ၶွပ်ႈတဵမ် 2 လိူၼ် မိူဝ်ႈၼႆႉယဝ်ႉ။ တီႈတၢင်းၾင်ႇတႃႈၶီႈလဵၵ်းၼႆႉတႄႉ တုမ်ႉတိူဝ်ႉၵူၼ်းႁဵတ်းၵၢၼ် ၵိၼ်ၸွမ်းဝၼ်းတႄႉတႄႉ ၶႃႈဢေႃႈ။ ၵွပ်ႈပိူဝ်ႈပိၵ်ႉၶူဝ်သေ ၵၢၼ်ငၢၼ်းၵေႃႈလႆႈဢိုတ်းၵႂႃႇၵမ်ႈၽွင်ႈ၊ ၵူၼ်းႁဵတ်းၵၢၼ် ၵိၼ်ၸွမ်းလၢႆးဝၼ်းတႄႉ ၵိၼ်းၸႂ် ယၢပ်ႇၽိုတ်ႇၵၼ်ၶႃႈဢေႃႈ” ဝႃႈၼႆ။

ၵူၼ်းပိုၼ်ႉတီႈ ဢၼ်ႁဵတ်းၵၢၼ်ၵိၼ်ၸွမ်းလၢႆးဝၼ်းတႄႉ ၵမ်ႈၼမ် ၵိၼ်ၸၢင်ႈႁပ်ႉတေႃႉသူင်ႇၶူဝ်းၵုၼ်ႇသိၼ်ၵႃႉ ၵူၼ်းၶဝ်ႈဢွၵ်ႇ ၸွမ်းလႅၼ်လိၼ်။ မိူဝ်ႈပႆႇမီးၽေးၶူဝ်ႊဝိတ်ႉၼၼ်ႉ မၢင်ၵေႃႉ လုၵ်ႉတၢင်းၾင်ႇတႃႈၶီႈလဵၵ်းၶဝ်ႈၵႂႃႇ ႁဵတ်းၵိၼ်ၵၢၼ်ၸွမ်းလၢႆးဝၼ်း တၢင်းၾင်ႇမႄႈသၢႆ ၸိူဝ်းၼႆႉၵေႃႈမီးတင်းၼမ်၊ ပေႃးဝႃႈၽၵ်းတူ ၶူဝ်လႅၼ်လိၼ် ပိၵ်ႉဢိုတ်းဝႆႉယဝ်ႉၵေႃႈ ဢွၼ်ၵၼ်တူၵ်းၵၢၼ်တူၵ်းငၢၼ်းၵၼ် ၵမ်ႈၼမ် ဝႃႈၼႆ။

လိူဝ်ၼၼ်ႉ တွၼ်ႈတႃႇၶူဝ်းၵုၼ်ႇ ၶွင်ၵိၼ်ၸိူဝ်းၼႆႉတႄႉ သူင်ႇၶဝ်ႈဢွၵ်ႇၵႂႃႇမႃးယူႇ တီႈၶူဝ်မိုတ်ႈၵိုဝ်းမၢႆ 2 လႅၼ်လိၼ်တႆး – ထႆး (မႄႈသၢႆ – တႃႈၶီႈလဵၵ်း)။

ၸၢႆးၼုမ်ႇတုၺ်ႈ သိုပ်ႇလၢတ်ႈဝႃႈ “ ၶူဝ်းၵုၼ်ႇ ၶွင်ၵိၼ်ယႅမ်ႉတႄႉ သူင်ႇၶဝ်ႈဢွၵ်ႇၵႂႃႇမႃး တီႈၶူဝ်မၢႆ 2 ယူႇ၊ မီးၵူၼ်းမိူင်းၵူၺ်း ဢမ်ႇပၼ်ၶဝ်ႈဢွၵ်ႇၵႂႃႇမႃး။ ၵၢၼ်ပၢႆးမၢၵ်ႈမီး ဢၼ်တုမ်ႉတိူဝ်ႉၵႂႃႇႁၢဝ်ႈႁႅင်းတႄႉ မိူၼ်ၼင်ႇ ႁူင်းႁႅမ်းၸိူဝ်းၼႆႉ လႆႈဢိုတ်းဝႆႉၵမ်းၼိုင်ႈ၊ ယဝ်ႉၵေႃႈ လႅင်းၵႃး ႁပ်ႉတေႃႉသူင်ႇၵူၼ်းၸိူဝ်းၼႆႉ” ဝႃႈၼႆ။

ၼွၵ်ႈလိူဝ်ၼၼ်ႉ ၵူၼ်းမိူင်းတႆး ၸိူဝ်းၶမ်ဝႆႉတၢင်းၾင်ႇမႄႈသၢႆသေ ဢမ်ႇၸၢင်ႈပွၵ်ႈၶၢမ်ႈၶဝ်ႈမႃးၼၼ်ႉ တႄႇဢဝ် မိူဝ်ႈၼႆႉၵႂႃႇ ယူႇတီႈၽူႈမီးပုၼ်ႈၽွၼ်းၶဝ် တေၵဵပ်းသဵၼ်ႈမၢႆယဝ်ႉ သူင်ႇပွၵ်ႈၶဝ်ႈမႃးတၢင်းၾင်ႇတႃႈၶီႈလဵၵ်းၶိုၼ်း ဝႃႈၼႆ။

“တႄႇဢဝ် ဝၼ်းတီႈ 23 ၼႆႉၵႂႃႇ ၵူၼ်းမိူင်းတႆး ဢၼ်ၶဝ်ႈၵႂႃႇသေ ၶမ်ဝႆႉတၢင်းၾင်ႇမႄႈသၢႆၼၼ်ႉ ယူႇတီႈၽူႈမီး ပုၼ်ႈၽွၼ်းၶဝ် တေၵဵပ်းသၢႆမၢႆသေ သူင်ႇပွၵ်ႈၶဝ်ႈမႃး တင်းတႃႈၶီႈလဵၵ်းၶိုၼ်း ၼႂ်းဝူင်ႈၼႆႉႁႂ်ႈယဝ်ႉၶႃႈ။ လိူဝ်ၼၼ်ႉ ႁႅင်းၵၢၼ် ဢၼ်ပၼ်သဵၼ်ႈမၢႆ တၢင်ႇဝႆႉတီႈလုမ်းၽွင်းတၢင်မၢၼ်ႈ တီႈၵုင်းထဵပ်ႈ ၵဵင်းမႆႇ ၸိူဝ်းၼၼ်ႉၵေႃႈ ၼႂ်းၶၢဝ်းတၢင်း 15 ဝၼ်းၼႆႉ ယူႇတီႈ ၽူႈမီးပုၼ်ႈၽွၼ်းၶဝ် တေၶတ်းၸႂ်သူင်ႇပွၵ်ႈမႃး ႁႂ်ႈယဝ်ႉၶႃႈ၊ လွင်ႈၶူဝ် တေပိုတ်ႇ ဢမ်ႇပိုတ်ႇ ဢၼ်ဝႃႈၼၼ်ႉ မၼ်းယူႇတီႈ တၢင်းလူင်ပွင်ၸိုင်ႈထႆးၶဝ်ၵူၺ်းၶႃႈ။ မိူဝ်ႈပိၵ်ႉၶူဝ်ၼၼ်ႉၵေႃႈ ယူႇတီႈလူင်ပွင်ၸိုင်ႈထႆးၶဝ် ၵေႃႉသင်ႇပိၵ်ႉၶႃႈလူး ယွၼ်ႉၼၼ်လႄႈ ယူႇတီႈတၢင်းၾင်ႇမိူင်းထႆးၵူၺ်းၶႃႈ” ၸၢႆးၼုမ်ႇတုၺ်ႈ လၢတ်ႈၼႄၼင်ႇၼႆ။

ယွၼ်ႉပိူဝ်ႈၸိူဝ်ႉမႅင်း ၶူဝ်ႊဝိတ်ႉ 19 လၢမ်းၽႄႈၸပ်းဝႆး တင်းလုမ်ႈၾႃႉလႄႈ ၵူႈမိူင်းမိူင်းဢွၼ်ၵၼ်ပိၵ်ႉၽၵ်းတူလႅၼ်လိၼ်၊ Lock Down မိူင်းႁင်းၽႂ်မၼ်း။ လူင်ပွင်ၸိုင်ႈထႆးၵေႃႈ သင်ႇပိၵ်ႉၽၵ်းတူမိူင်းၸဵမ်မိူဝ်ႈႁၢင်လိူၼ် မၢတ်ႉၶျ် ပူၼ်ႉမႃး။ ဢမ်ႇပၼ်ၽႂ်ၶၢမ်ႈၶဝ်ႈဢွၵ်ႇ လႄႈ တုမ်ႉတိူဝ်ႉ ၵူၼ်းယူႇလႅၼ်လိၼ် ၸဵမ်ၵူၼ်းႁဵတ်းၵၢၼ်ပၢႆးမၢၵ်ႈမီးတေႃႇထိုင် ၵူၼ်းၵႃႉယွႆႈၵူႈၵေႃႉ။