ၸဝ်ႈၼႃႈတီႈလူင်ပွင်ၸိုင်ႈမၢၼ်ႈတီႈမူႇၸေႊ တီႉလႆႈၵူၼ်းမိူင်းၶႄႇ လၵ်ႉၶဝ်ႈမိူင်း 8 ၵေႃႉ တီႉလႆႈပႃးၶိူင်ႈၵွင်ႈၵၢင်ႇထႅင်ႈ ဝႃႈၼႆ။

ဝၼ်းတီႈ 21/5/2020 ယၢမ်းၵၢင်ၶိုၼ်းမွၵ်ႈ 11 မူင်းၼႆႉ ၸဝ်ႈၼႃႈတီႈလူင်ပွင်ၸိုင်ႈမၢၼ်ႈ ပႂ်ႉၵူတ်ႇထတ်းတီႈႁိမ်းတူဝ်းၵဵတ်ႉ တၢင်းၶဝ်ႈဝဵင်းမူႇၸေႊ ၼိူဝ်သဵၼ်ႈတၢင်းလူင် မိူင်းႁူမ်ႈတုမ်။ ၵူတ်ႇထတ်းၵႃးႁပ်ႉသူင်ႇၵူၼ်းလမ်းၼိုင်ႈ ဢၼ်လုၵ်ႉတၢင်းမူႇၸေႊ တေဢွၵ်ႇၵႂႃႇတၢင်း 105 လၵ်း၊ ၼႂ်းၵႃးၼၼ်ႉတီႉလႆႈၵူၼ်းၸၢဝ်းၶႄႇ 8 ၵေႃႉ ပဵၼ်ၵူၼ်းလၵ်ႉၶဝ်ႈမိူင်း ၼႆယဝ်ႉ။

ၽွင်းၸဝ်ႈၼႃႈတီႈၵူတ်ႇထတ်းယူႇၼၼ်ႉ ၵူၼ်းႁေႃႈၵႃးသမ်ႉလႅၼ်ႈပၢႆႈလႄႈထိုင်မႃးဝၼ်းတီႈ 22 ယၢမ်းဝၢႆးဝၼ်းမွၵ်ႈ 2 မူင်းၸင်ႇတီႉလႆႈ ၸဝ်ႈၵႃး ႁွင်ႈၵၢၼ်ပိုၼ်ၽၢဝ်ႇ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဝႆႉၼင်ႇၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ လၢတ်ႈတီႈၽူႈတွႆႇႁွၵ်ႈဝႃႈ “ယူႇတီႈႁဝ်းၶႃႈ ထတ်းသၢင်တႄႉ တေႃႈလဵဝ် ၵူၼ်းၶႄႇၼႆႉ ဢမ်ႇၸၢင်ႈပွၵ်ႈမိူဝ်းမိူင်းၶဝ်၊ ၶဝ်ၶဝ်ႈမႃးယဝ်ႉ ယွၼ်ႉဝႃႈ ၸွမ်းတႃႈႁိူဝ်း၊ ၽၵ်းတူ ၵူႈတီႈၼႆႉ ပိၵ်ႉဝႆႉမူတ်းယဝ်ႉ၊ မၼ်းဢမ်ႇၸၢင်ႈၶဝ်ႈဢွၵ်ႇလႆႈသေဢိတ်းယဝ်ႉ။ ယွၼ်ႉၼၼ် ဢၼ်ၶဝ်တီႉလႆႈၼၼ်ႉ လႅပ်ႈပဵၼ်ၶႄႇ ဢၼ်မႃးၶမ်ဝႆတၢင်းမူႇၸေႊ၊ တၢင်းပၢင်ႇသၢႆး ၸိူဝ်းၼၼ်ႉၵူၺ်းၶႃႈ၊ ယွၼ်ႉဝႃႈ တၢင်းၾၢႆႇပၢင်ႇသၢႆးၼၼ်ႉ ပၢင်တေႃႇလွင်းမီးတၢင်းၼမ်ၶႃႈယဝ်ႉ” ဝႃႈၼႆ။

လိူဝ်ၼၼ်ႉ လွင်ႈၶိူင်ႈၵွင်ႈၵၢင်ႇဢၼ်တီႉလႆႈၼၼ်ႉ လႅပ်ႈတေပဵၼ်ၶွင်ၸုမ်းပျီႇတူႉၸိတ်ႉၵူၺ်း၊ ၵမ်ႈၼမ်ပဵၼ်ပျီႇတူႉၸိတ်ႉ ၵူၺ်းဢၼ်ယိပ်းၵွင်ႈၵႂႃႇမႃးယူႇၼႆႉ၊ ဢၼ်ႁဵတ်းႁႂ်ႈဝၢၼ်ႈမိူင်းလူႉ ဢမ်ႇၼိမ်သဝ်းၼႆႉၵေႃႈ ပဵၼ်ပျီႇတူႉၸိတ်ႉၼၼ်ႉ ၶႃႈယဝ်ႉ ပေႃးဢမ်ႇမီးၸုမ်းပျီႇတူႉၸိတ်ႉၸိူဝ်းၼၼ်ႉၸိုင် တီႈမူႇၸေႊၼႆႉ တေလႆႈယူႇၼိမ်သဝ်းၵႃႈႁိုဝ် ဢမ်ႇႁူႉ ၵူၼ်းမူႇၸေႊ လၢတ်ႈၼင်ႇၼႆ။

မိူဝ်ႈဝၼ်းတီႈ 22 ၼၼ်ႉၵေႃႈ ၸဝ်ႈၼႃႈတီႈၶဝ်ႈၵူတ်ႇထတ်းတီႈႁိူၼ်းတိူၵ်ႈၵဝ်ႇလင်ၼိုင်ႈ ဢၼ်မီးႁိမ်းသဵၼ်ႈတၢင်းမိူင်းႁူမ်ႈတုမ် ၼႂ်းၵႄႈမူႇၸေႊ လႄႈ 105 လၵ်း၊ မိူဝ်ႈၼၼ်ႉၵေႃႈ ထူပ်းႁၼ် ၶိူင်ႈၵွင်ႈၵၢင်ႇသႂ်ႇဝႆႉၼႂ်းထူင် ပဵၼ်ၵွင်ႈ 3 လဝ်း၊ မၢၵ်ႈၵွင်ႈ 69 လုၵ်ႈ မၢၵ်ႇမႅင်း 1 လုၵ်ႈ ဝႃႈၼႆ။

ၼႂ်းဝၼ်းတီႈ 22 ၼၼ်ႉၵူၺ်းၼင်ႇၵဝ်ႇ တီႉလႆႈထႅင်ႈ ၵူၼ်းၸၢဝ်းၶႄႇ လၵ်ႉၶဝ်ႈမိူင်း ဢမ်ႇပဵၼ်တၢင်းၵၢၼ်ထႅင်ႈ 6 ၵေႃႉလႄႈ ၵူၼ်းမိူင်းမၢၼ်ႈ ဢၼ်လၵ်ႉတေႃႉသူင်ႇ ထႅင်ႈ 2 ၵေႃႉ တီႈႁိမ်းတၢင်းၶဝ်ႈဝဵင်းမူႇၸေႊ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၾၢႆႇလူင်ပွင်ၸိုင်ႈပိုၼ်ၽၢဝ်ႇဝႆႉၼင်ႇၼႆ။