ၵူၼ်းမိူင်းတႆး 2 ၵေႃႉ ဢၼ်လႆႈတုမ်ႉတိူဝ်ႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ ၵေႃႉထူၼ်ႈ 182 ၼၼ်ႉ သူင်ႇၵူတ်ႇထတ်းတၢင်းပဵၼ် လႆႈၺူႉၵႂၢမ်းတွပ်ႇဝႃႈ ဢမ်ႇၸပ်းၸိူဝ်ႉမႅင်း ၼင်ႇၵၼ်။
ၵူၼ်းမိူင်းတႆး 2 ၵေႃႉ ဢၼ်တုမ်ႉတိူဝ်ႉၸွမ်း ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ – 19 ၵေႃႉထူၼ်ႈ 182 ဢၼ်လုၵ်ႉမိူင်းမလေးသျိူဝ်ႊမႃးၼၼ်ႉ ပဵၼ်ၽူႈၸၢႆးတင်းသွင်ၵေႃႉ။ ၵေႃႉၼိုင်ႈပဵၼ်ၵူၼ်း ၸႄႈဝဵင်းပိၼ်းတယ (ပင်းတရႃႉ) ၸိုင်ႈတႆးပွတ်းၸၢၼ်း၊ ထႅင်ႈၵေႃႉၼိုင်ႈ ပဵၼ်ၵူၼ်းတၢင်ႉယၢၼ်း ၸိုင်ႈတႆးပွတ်းႁွင်ႇ-ၼႆယဝ်ႉ။
Dr. ၼိၼ်းဢိၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ပၢႆးယူႇလီ ၸႄႈမိူင်း လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းမိူင်းတႆး ဢၼ်တုမ်ႉတိူဝ်ႉၸွမ်း ၵူၼ်းပဵၼ်ၵေႃႉထူၼ်ႈ 182 ၼၼ်ႉ တင်း 2 ၵေႃႉ ဢွၵ်ႇမႃးၵႂၢမ်းတွပ်ႇ ဢမ်ႇတိတ်းၸပ်းၸိူဝ်ႉမႅင်း” ဝႃႈၼႆ။
ၵူၼ်းမိူင်းတႆး ဢၼ်တုမ်ႉတိူဝ်ႉၸွမ်းၵူၼ်းပွၵ်ႈမိူင်းမလေးသျိူဝ်ႊမႃးၼၼ်ႉ တင်းမူတ်းမီး 3 ၵေႃႉ။ တႃႇ 2 ၵေႃႉတႄႉ ၵူတ်ႇထတ်းပၢႆးယူႇလီယဝ်ႉတူဝ်ႈသေ ဢွၵ်ႇမႃးပဵၼ် Negative ၊ ထႅင်ႈတႃႇၵေႃႉၼိုင်ႈတႄႉ တေႃႈလဵဝ် လႆႈၵုမ်းတူဝ် Quarantine Center ဝႆႉတီႈတႃႈၵုင်ႈ ဝႃႈၼႆ။
“ၵူၼ်းတၢင်ႉယၢၼ်းၼၼ်ႉ လႆႈႁူႉၵႂၢမ်းတွပ်ႇ ဢမ်ႇတိတ်းၸပ်းၸိူဝ်ႉမႅင်း မိူဝ်ႈဝၼ်းတီႈ 20 (20/5/2020) ၼႆႉ။ ၵူၼ်းပိၼ်းတယသမ်ႉ လႆႈႁူႉၵႂၢမ်းတွပ်ႇ ဢမ်ႇတိတ်းၸပ်းၸိူဝ်ႉမႅင်း မိူဝ်ႈဝၼ်းတီႈ 19 ပူၼ်ႉမႃးၼႆႉ” Dr. ၼိၼ်းဢိၽိဝ်ႇ သိုပ်ႇလၢတ်ႈၼႄၼင်ႇၼႆ။
ၽွင်းတၢင်းပဵၼ်ၶူဝ်ႊဝိတ်ႉ 19 လၢမ်းၽႄႈယူႇၼႆႉ ယူႇတီႈၸဝ်ႈၼႃႈတီႈမိူင်းမလေးသျိူဝ်း လႆႈတီႉၺွပ်းပၼ်တူတ်ႈတၢမ်ႇ ႁႅင်းၵၢၼ်ယၢၼ်မိူင်း ၵူၼ်းမိူင်းႁူမ်ႈတုမ် 390 ၵေႃႉ လူၺ်ႈလွင်ႈတၢင်းသေဢၼ်ဢၼ်၊ ထိုင်မႃးဝၼ်းတီႈ 11/5/2020 ၼၼ်ႉ ယူႇတီႈလူင်ပွင်ၸိုင်ႈမိူင်းမလေးသျိူဝ်း ၶပ်းၶိုင်ႁၢင်ႈႁႅၼ်း ၶိူင်ႈမိၼ် Malaysia Airlines သွင်လမ်းသေ သူင်ႇၵူၼ်းမိူင်းႁူမ်ႈတုမ်ၸိူဝ်းၼၼ်ႉ ပွၵ်ႈၶဝ်ႈမႃးတၢင်းတႃႈၵုင်ႈ ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈမီးပုၼ်ႈၽွၼ်း ၾၢႆႇၵူတ်ႇထတ်းၵူၼ်းၶဝ်ႈမိူင်းလႄႈ ၾၢႆႇပၢႆးယူႇလီ လႆႈၵူတ်ႇထတ်းတၢင်းပဵၼ်သေ ႁၢင်ႈႁႅၼ်းသူင်ႇတူဝ်ပွၵ်ႈမိူဝ်း ဢွင်ႈတီႈယူႇၽႂ်မၼ်းၵႂႃႇ-ၼႆယဝ်ႉ။
