ၵူၼ်းၼႂ်းၸိုင်ႈတႆးပွတ်းၸၢၼ်း 9 ၵေႃႉ မီးၾၢင်ႁၢင်ႈမိူၼ်တၢင်းပဵၼ် ၶူဝ်ႊဝိတ်ႉ 19 လႄႈ ထုၵ်ႇၵူတ်ႇထတ်းတၢင်းပဵၼ် ၵူၺ်း ၵႃႈ ဢမ်ႇႁၼ်မီးမႅင်းသေၵေႃႉ။
မိူဝ်ႈဝၼ်းတီႈ 20/5/2020 ၼၼ်ႉ ယူႇတီႈၾၢႆႇမေႃယႃၶဝ် လႆႈဢဝ်ၼမ်ႉမုၵ်ႈ ၼမ်ႉလၢႆး တင်းမူတ်းၵူၼ်း 9 ၵေႃႉၼၼ်ႉ သူင်ႇၵႂႃႇ ၵူတ်ႇထတ်းတီႈႁွင်ႈၵၢၼ်ပၢႆးယူႇလီ တီႈတႃႈၵုင်ႈ၊ ၵႂၢမ်းတွပ်ႇဢွၵ်ႇမႃးဝႃႈ တင်းမူတ်း ပဵၼ် Negative ဝႃႈၼႆ။
Dr. ၼိၼ်းဢီးၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ပၢႆးယူႇလီ ၸႄႈမိူင်း လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းထၢင်ႇထိူမ် 9 ၵေႃႉၼၼ်ႉ ပဵၼ်ၵူၼ်းလွႆလႅမ် တင်းမွၵ်ႇမႆႇ။ ၶဝ်တင်း 9 ၵေႃႉၼၼ်ႉတႄႉ ဢမ်ႇထူပ်းႁၼ် ၸိူဝ်ႉမႅင်းသေၵေႃႉၶႃႈ” ဝႃႈၼႆ။
ၼႂ်းၸႄႈမိူင်းတႆးၼႆႉ တင်းမူတ်းၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 မီး 7 ၵေႃႉ။ တႃႇၼႂ်းၸိုင်ႈတႆးပွတ်းၸၢၼ်းလႄႈ ပွတ်းႁွင်ႇတႄႉ ဢမ်ႇမီးသေၵေႃႉယဝ်ႉ လႆႈၶႂၢင်ႉလူင်းႁူင်းယႃၵၼ်မူတ်းယဝ်ႉ။ ၵူၺ်းၵႃႈ တၢင်းပွတ်းဢွၵ်ႇၶူင်းတႄႉ တိုၵ်ႉၵိုတ်းဝႆႉ 2 ၵေႃႉ တေႃႈလဵဝ် တိုၵ်ႉသိုပ်ႉယူတ်းယႃတူဝ်ဝႆႉတီႈ ႁူင်းယႃလူင် ၵဵင်းတုင်ယူႇ ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ် တင်းမူတ်းမီးၵႂႃႇ 201 ၵေႃႉ၊ လူႉတၢႆ 6 ၵေႃႉ၊ ယႃၶႅၼ်း 116 ၵေႃႉလႄႈ တိုၵ်ႉသိုပ်ႇယူတ်းယႃဝႆႉယူႇ 79 ၵေႃႉ။
