ၶွမ်ႊမတီႊႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ၸႄႈဝဵင်းမိူင်းပၼ်ႇ ပၼ်ၾၢင်ႉထိုင် ၵူၼ်းမိူင်းဝႃႈ ၽႂ်ၵေႃႉလႂ် ဢွၵ်ႇၼွၵ်ႈႁိူၼ်းတေလႆႈသႂ်ႇ ၽႃႈတူမ်းသူပ်း (Mask) ၊ ၽႂ်ဢမ်ႇသႂ်ႇ တေၺႃးတူတ်ႈတၢမ်ႇ။
တႄႇဢဝ်ဝၼ်းတီႈ 20/5/2020 ၼႆႉၵႂႃႇ ယူႇတီႈၶွမ်ႊမတီႊႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ၸႄႈဝဵင်းမိူင်းပၼ်ႇ တေလူင်းပိုၼ်ႉတီႈပႂ်ႉၵူတ်ႇထတ်း ၸွမ်းသဵၼ်ႈတႃႈသဵၼ်ႈတၢင်း ၵူႈတီႈတီႈ ၼႂ်းၸႄႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း ၼင်ႇႁိုဝ်တၢင်းပဵၼ်ၶူဝ်ႊဝိတ်ႉ – 19 တေဢမ်ႇတိတ်းၸပ်းၵၼ်ၼၼ်ႉ ၽႂ်ဢွၵ်ႇႁိူၼ်း တေလႆႈသႂ်ႇၽႃႈတူမ်းသူပ်း(Mask) ၵၼ်ၵူႈၵေႃႉ ဝႃႈၼႆ။
ပေႃႈၾႃႉမႄႈမိူင်း ၸႄႈဝဵင်းမိူင်းပၼ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈယဝ်ႉၶႃႈ။ တႄႇမိူဝ်ႈၽုၵ်ႈၵႂႃႇ တေဝႆႉ ဢယေးၼၵ်းၼၵ်းၼႃၼႃၼႆၶႃႈ။ သင်ဝႃႈ ၽႂ် ၵေႃႉလႂ် ဢွၵ်ႇႁိူၼ်း၊ ၵႂႃႇတၢင်းၼွၵ်ႈၸိုင် ႁႂ်ႈဢွၼ်ၵၼ်သႂ်ႇ ၽႃႈပိၵ်ႉသူပ်း ၵူႈၵေႃႉသေၵမ်း။ ပဵၼ်တႃႇပၢႆးယူႇလီႁဝ်းၶႃႈတင်းမူတ်းလႄႈ ထုၵ်ႇလီဝႆႉၼၵ်းသႂ်ႇၸႂ်ၵၼ်ၶႃႈ ” ဝႃႈၼႆ။
သင်ဝႃႈ ၽႂ်ၵေႃႉလႂ် ဢွၵ်ႇႁိူၼ်းတၢင်းၼွၵ်ႈႁိူၼ်းယေး ဢမ်ႇသႂ်ႇၽႃႈတူမ်းသူပ်းၵၼ်ၸိုင် တေၺႃးတူတ်ႈတၢမ်ႇ သိုဝ်ႉၽႃႈတူမ်းသူပ်း (Mask) ၵၼ်။ ပွၵ်ႈၵမ်း 1 ပၼ်တၢမ်ႇသိုဝ်ႉ ၼိုင်ႈၵေႃႉ 2 ဢၼ်။ သင်ဝႃႈ ပွၵ်ႈၵမ်း 2 ဢမ်ႇသႂ်ႇထႅင်ႈၸိုင် တေထုၵ်ႇပၼ်တူတ်ႈတၢမ်ႇ 1 ၵေႃႉ ၸႂ်ႉသိုဝ်ႉ Mask 4 ဢၼ်။ သင်ဝႃႈ ပွၵ်ႈၵမ်း 3 ဢမ်ႇသႂ်ႇထႅင်ႈ တေလႆႈၶိုၼ်ႈလုမ်း တြႃး၊ တူတ်ႈတၢမ်ႇတႄႉ ၸွမ်းၼင်ႇပၵ်းပိူင်မီးၼၼ်ႉ ဝႃႈၼႆ။
ယွၼ်ႉဝႃႈ မိူဝ်ႈဝၼ်းတီႈ 18/5/2020 ၼၼ်ႉ ၵူၼ်းၸႃႇတိ မိူင်းပၼ်ႇ ဢၼ်ၶၢႆႉၵႂႃႇယူႇတႃႈၵုင်ႈၼၼ်ႉ သမ်ႉၶႂ်ႈမႃးယူႇ မိူင်းပၼ်ႇၼႆသေ ထုၵ်ႇၵုမ်းတူဝ်တီႈႁူင်းယႃမိူင်းပၼ်ႇဝႆႉ 2 ၵေႃႉ ၵူၼ်းမိူင်းပၼ်ႇ လၢတ်ႈၼႄၼင်ႇၼႆ။
လိူဝ်ၼၼ်ႉ မိူဝ်ႈဝၼ်းတီႈ 12/5/2020 ၼၼ်ႉၵေႃႈ ယူႇတီႈၶွမ်ႊမတီႊႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ၸႄႈဝဵင်းၵဵင်းတုင် ပိုၼ်ၽၢဝ်ႇတိုၵ်းသူၼ်း ပၼ်ၾၢင်ႉထိုင် ၵူၼ်းမိူင်း ၼႂ်းၸႄႈဝဵင်းၵဵင်းတုင် ၵူႈၵေႃႉဝႃႈ ၼင်ႇႁိုဝ်တၢင်းပဵၼ်ၶူဝ်ႊဝိတ်ႉ – 19 တေဢမ်ႇတိတ်းၸပ်းၵၼ်ၼၼ်ႉ ၽႂ်ဢွၵ်ႇႁိူၼ်း တေလႆႈသႂ်ႇၽႃႈတူမ်းသူပ်း(Mask) ၊ သင်ဢမ်ႇသႂ်ႇၼႆ တေပၼ်တၢမ်ႇၸႂ်ႉသိုဝ်ႉၽႃႈတူမ်းသူပ်း ၼိုင်ႉၵေႃႉ 10 ဢၼ်။ တႃႇတူဝ်ၸဝ်ႈၵဝ်ႇသႂ်ႇၼိုင်ႈဢၼ် တႃႇ 9 ဢၼ်သမ်ႉ ၸွႆႈလူႇပၼ်ၶိုၼ်းတီႈၶွမ်ႊမတီႊႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ