ၵူၼ်းၼုမ်ႇ ၽူႈၸၢႆး ဢႃယု 18 ပီ ၵေႃႉၼိုင်ႈ ထုၵ်ႇၾၼ်းတၢႆ ယဵပ်ႈမူၵ်းယုမ်းဝႆႉ တီႈဝဵင်းလႃႈသဵဝ်ႈ။

ဝၼ်းတီႈ 17/5/2020 ယၢမ်းႁူဝ်ၶမ်ႈ ၸုမ်းပရႁိတ ၵႂႃႇဢဝ်တူဝ်တၢႆၵူၼ်းၼုမ်ႇ ၽူႈၸၢႆး ဢႃယု 18 ပီ ၵေႃႉၼိုင်ႈ တၢႆမူၵ်းယုမ်းဝႆႉ ၼၼ်ႉဢွၵ်ႇမႃး။ တူဝ်တၢႆၽူႈၸၢႆးၵေႃႉၼႆႉ မီးၼႂ်းၵႄႈၾၢႆ ႁူးမူၼ်ႈလႄႈ  ၾၢႆၵွၵ်ႉၵူၺ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ လႆႈႁၼ်ႁွႆးမိတ်ႈ/ လႅဝ်း ၽၼ်းဝႆႉတီႈၵွၵ်း ႁူဝ် မၼ်း ။ ၵဵဝ်ႇၵပ်းလွင်ႈၼႆႉ ပဵၼ်ၼမ်ႉမိုဝ်းၽႂ် ၵေႃႉလႂ်ႁဵတ်းဢၼ်ဝႃႈၼၼ်ႉ ယူႇတီႈၽူႈမီးပုၼ်ႈၽွၼ်းၶဝ် တိုၵ်ႉ ၵူတ်ႇ ထတ်းလွင်ႈတၢင်းမၼ်းဝႆႉယူႇ။

ၸၢႆးဝတူင်ႇထုၼ်း ၸုမ်းပရႁိတ ၵူၼ်းၼုမ်ႇလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈ ႁဝ်းၶႃႈလႆႈ ငိၼ်းၶၢဝ်ႇဝႃႈ ပဵၼ်ၵူၼ်းၸူမ်ၼမ်ႉတၢႆ။ၽိူဝ်ႇ ႁဝ်းၶႃႈ ဢွၼ်ၵၼ်ၵႂႃႇတူၺ်းတႃႇဢဝ်ဢွၵ်ႇမႃးၼၼ်ႉ လႆႈႁၼ် ၸွမ်းၵွၵ်းႁူဝ်မၼ်းၸၢႆးၼၼ်ႉမီးႁွႆးမိတ်ႈ ႁွႆးၽၼ်းဝႆႉ။ ပဵၼ်လွင်ႈသင် တႄႉတႄႉၼႆ ႁဝ်းၶႃႈၵေႃႈ ဢမ်ႇလႆႈႁူႉၶႃႈ” ဝႃႈၼႆ။

ဢိင်ၼိူဝ်လွင်ႈၵူၼ်းၼုမ်ႇ ၽူႈၸၢႆး ဢႃယု 18 ပီ လူႉတၢႆၼၼ်ႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇ ပလိၵ်ႈ လႃႈသဵဝ်ႈၵေႃႈ ဢမ်ႇၵပ်းသိုပ်ႇလႆႈ။

တီႈၾၢႆႁူးမူၼ်ႈလႄႈ  ၾၢႆၵွၵ်ႉၵူၺ်းၼၼ်ႉ ၵူၼ်းၼုမ်ႇ ဢွၼ်ၵၼ်ၵႂႃႇဢႅဝ်ႈလႄႇလဵၼ်ႈၼမ်ႉၵၼ်။ ၵွပ်ႈၼၼ်လႄႈ လႅပ်ႈတေပဵၼ်ၶဝ်ၼင်ႇၵၼ်ၽိတ်းမေႃးၵၼ်သေ ထိုင်တီႈၽၼ်းၵၼ်တၢႆၵေႃႈပဵၼ်လႆႈ ၵူၼ်းလႃႈသဵဝ်ႈ လၢတ်ႈၼႄၼင်ႇၼႆ။

ၸၢႆးထုၼ်း ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းဝႃႈ ၵူၼ်းၼုမ်ႇၼင်ႇၵၼ် ၽိတ်းမေႃးၵၼ်သေ ထိုင်တီႈ ပေႃးလႆႈဢဝ်လႅဝ်းၽၼ်းၵၼ်တၢႆ။ ၵဵဝ်ႇလူၺ်ႈလွင်ႈၼႆႉ ပႆႇတႅတ်ႈတေႃးလီ လႆႈငိၼ်းဝႆႉၸိူင်ႉၼၼ်ၵူၺ်း။ ဝၢႆးလင်ၼၼ်ႉ ယဝ်ႉ ဢွင်ႈတီႈၼၼ်ႈ ဢမ်ႇမီးၵူၼ်းၵႂႃႇလႄႇၵႃႈႁိုဝ်ယဝ်ႉ” ဝႃႈၼႆ။

မိူဝ်ႈဝၼ်းတီႈ 11/5/2020 ၼၼ်ႉၵေႃႈ ၸဝ်ႈၼႃႈတီႈထူပ်းႁၼ် တူဝ်တၢႆၵူၼ်းၼုမ်ႇၵေႃႈၼိုင်ႈ တီႈဝၢၼ်ႈၼွင်ယုမ်း ဢိူင်ႇမႄႈႁၢၼ်ႇ ၸႄႈဝဵင်းလႃႈသဵဝ်ႈ တူဝ်တၢႆသမ်ႉပေႃးလၢၼ်ႈယဝ်ႉ။ ထိုင်မႃးဝၼ်းတီႈ 13 သမ်ႉထူပ်းႁၼ်ထႅင်ႈၵေႃႉၼိုင်ႈ တီႈၼၼ်ႈၵူၺ်းၼင်ႇၵဝ်ႇ။ ၵူၼ်းတၢႆ 2 ၵေႃႉၼႆႉ လႆႈသူင်ႇႁူင်း ယႃလူင် ဝဵင်းလႃႈသဵဝ်ႈယဝ်ႉ ၸၢႆးဝတူင်ႇထုၼ်း သိုပ်ႇလၢတ်ႈၼႄၼင်ႇၼႆ။

တေႃႈလဵဝ် ၼႂ်းၸႄႈဝဵင်းလႃႈသဵဝ်ႈၼႆႉ ၸူၼ်ၵၼ်၊ လၵ်ႉၵၼ်၊ ၾၼ်းၵၼ်လႄႈ ၵူၼ်းသူႇသမ်းၵိၼ်ယႃႈ ၸိူဝ်းၼႆႉ ၼမ် ၶိုၼ်ႈမႃးၵူႈဝၼ်း ဝႃႈၼႆ။