ႁႅင်းၵၢၼ်မိူင်းႁူမ်ႈတုမ် ပွၵ်ႈၶဝ်ႈမႃးတၢင်းၵဵင်းတုင် 2 ဝၼ်းထပ်းၵၼ် မီးႁူဝ်ၵူၼ်း 300 ပၢႆ ၸဝ်ႈၼႃႈတီႈ သူင်ႇမိူဝ်းတူၼ်ႈတီး ၵမ်းလဵဝ်ယဝ်ႉ။
ဝၼ်းတီႈ 16-17/5/2020 ၶၢဝ်းတၢင်း 2 ဝၼ်းမႃးၼႆႉ ႁႅင်းၵၢၼ်မိူင်းႁူမ်ႈတုမ် ဢၼ်လုၵ်ႉတၢင်းၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး၊ မိူင်းယူႉသေ ပွၵ်ႈၶဝ်ႈမႃး တၢင်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်းၼႆႉ တင်းမူတ်းမီးႁူဝ်ၵူၼ်းယူႇ 328 ၵေႃႉ ။
ၸၢႆးႁွမ်ၼွႆႉ ၶွမ်ႊမတီႊႁႃငိုၼ်းၵွင်ၵၢင်လႄႈ ႁႄႉၵင်ႈတၢင်းပဵၼ်ၶူဝ်ႊဝိတ်ႉ ၸႄႈတွၼ်ႈၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ၸႂ်ႈၶႃႈဢေႃႈ ပွၵ်ႈၶဝ်ႈမႃးထႅင်ႈၶႃႈ မိူဝ်ႈဝၼ်းတီႈ 16/5/2020 မႃးတၢင်းမိူင်းယူႉ ႁူဝ်ၵူၼ်း 225 ၵေႃႉ။ ဝၼ်းတီႈ 17/5/2020 သမ်ႉလုၵ်ႉတၢင်းမိူင်းလႃးမႃး 103 ၵေႃႉ ။ ႁဝ်းၶႃႈ ႁၢင်ႈႁႅၼ်းသေ သူင်ႇပွၵ်ႈတၢင်းတူၼ်ႈတီးၵမ်းလဵဝ် ယဝ်ႉ” ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်သူင်ႇပွၵ်ႈၶဝ်ႈမႃးထႅင်ႈၵမ်းၼႆႉ ထုၵ်ႇၵုမ်းတူဝ် Quarantine တဵမ် 21 ဝၼ်းယဝ်ႉသေ ၸင်ႇသူင်ႇပွၵ်ႈၶဝ်ႈမႃး၊ ၵမ်ႈၼမ်ပဵၼ်ၵူၼ်းတၢင်းပွတ်းမိူင်းရၶႅင်ႇ ဝႃႈၼႆ။
တင်ႈတႄႇ ဝၼ်းတီႈ 8 မႃး တေႃႇထိုင်ဝၼ်းမိူဝ်ႈ 14/5/2020 ၸဝ်ႈၼႃႈတီႈမိူင်းလႃး ဢဝ်ႁႅင်းၵၢၼ်မၢၼ်ႈ ၸိူဝ်းၵႂႃႇႁဵတ်း ၵၢၼ်မိူင်းၶႄႇ ပွၵ်ႈမႃးၸိူဝ်းၼၼ်ႉ မွပ်ႈ ပၼ်လူင်ပွင်ၸိုင်ႈမိူင်းတႆး မီး 916 ၵေႃႉ ယဝ်ႉ။ ဝၼ်းတီႈ 10/5/2020 မွပ်ႈပၼ်တီႈၸဝ်ႈၼႃႈတီႈဝဵင်းၵဵင်းတုင် 241 ၵေႃႉ။ ဝၼ်းတီႈ 8/5/2020 ၼၼ်ႉသမ်ႉ လုၵ်ႉတၢင်း မိူင်းလႃး သူင်ႇတၢင်းမိူင်းယူႉ – မိူင်းယွင်း 665 ၵေႃႉ၊ ယၢမ်းလဵဝ်တႄႉ သူင်ႇပွၵ်ႈမိူဝ်းတၢင်း ဝဵင်းတူၼ်ႈတီးမူတ်းယဝ်ႉ ဝႃႈၼႆ။
လိူဝ်ၼၼ်ႉ ဢၼ်ပွၵ်ႈၶဝ်ႈမႃး တၢင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း၊ တၢင်းလၢဝ်ႇၵၢႆး ၼႃႈလိၼ်ၽွင်းငမ်းတူဝ်ၵဝ်ႇၵူဝ်းၵၢင်ႉ(လၢဝ်ႇၵၢႆး) လႄႈ မူႇၸေႊ ၸိူဝ်းၼႆႉၵေႃႈ ပွၵ်ႈၶဝ်ႈမႃးမိူၼ်ၵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ