ၵူၼ်းမိူင်းၶႄႇ 3 ၵေႃႉ ၶဝ်ႈၸူၼ်ႁၢၼ်ႉၶၢႆၶမ်း၊ ၶႃႈႁႅမ်ပႃး ၸဝ်ႈၶွင်လၢၼ်ႉၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ လႄႈ ယူႇတီႈၸဝ်ႈၼႃႈတီႈဝႃႉ ပၼ်တၢမ်ႇတၢႆၸွမ်းၼင်ႇ ပၵ်းပိူင်မၢႆမီႈ ၼႂ်းပိုၼ်ႉတီႈမီးဝႆႉၼၼ်ႉ။
မိူဝ်ႈဝၼ်းတီႈ 3/5/2020 ၼၼ်ႉ ၵူၼ်းမိူင်းၶႄႇ 3 ၵေႃႉ ၶဝ်ႈၸူၼ်ႁၢၼ်ႉၶၢႆၶမ်း တီႈၸႄႈဝဵင်းၼမ်ႉတိုၵ်း ၼႃႈလိၼ်ၽွင်းငမ်းတူဝ်ၵဝ်ႇဝႃႉ ၸိုင်ႈတႆးပွတ်းဢွၵ်ႇၶူင်း။ လိူဝ်သေၸူၼ်ႁိမ်ဢဝ်ၶမ်းယဝ်ႉ ၶႃႈႁႅမ်ပႃး ၸဝ်ႈၶွင်ႁၢၼ်ႉၶၢႆၶမ်း ထႅင်ႈသေ ယူႇတီႈၸဝ်ႈၼႃႈတီႈဝႃႉ တႅပ်းတတ်းပၼ်တူတ်ႈတၢမ်ႇတၢႆ ၽူႈပူၼ်ႉပႅၼ် 3 ၵေႃႉ ၸွမ်းၼင်ႇပၵ်းပိူင်မၢႆမီႈ ၼႂ်းပိုၼ်ႉတီႈမီးၼၼ်ႉ ဝႃႈၼႆ။
ၾဵတ်ႉၿုၵ်ႉ ၶွင်ဢူးၺီႇလၢၼ်း ၽူႈမီးပုၼ်ႈၽွၼ်း ၼင်ႈလုမ်းၵပ်းသၢၼ်ဝႃႉ UWSA တႅမ်ႈတၢင်ႇဝႆႉဝႃႈ “ မိူဝ်ႈဝၼ်းတီႈ 3 ၼၼ်ႉ တီႉလႆႈၵူၼ်းပူၼ်ႉပႅၼ် ၸၢဝ်းၶႄႇ 2 ၵေႃႉ။ ထိုင်မႃး ဝၼ်းတီႈ 5 တီႉလႆႈထႅင်ႈ 1 ၵေႃႉ” ဝႃႈၼႆ။
ထိုင်မႃး ဝၼ်းတီႈ 14/5/2020 ၼၼ်ႉ လႆႈထဵတ်ႈထၢမ် တင်း 3 ၵေႃႉသေ ၸင်ႇပူင်ၵႂၢမ်း တႅပ်းတတ်းပၼ် တူတ်ႈတၢမ်ႇတၢႆ တင်း 3 ၵေႃႉ။
ၸၢဝ်းၶႄႇ 3 ၵေႃႉၼၼ်ႉ ယွၼ်ႉဝႃႈ ပဵၼ်ၵူၼ်းမိူင်းၶႄႇသေ ၶဝ်ႈမႃးႁဵတ်းၵၢၼ်ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ ၵူၺ်းဢမ်ႇၵႃး ပဵၼ်ၵူၼ်းပူၼ်ႉပႅၼ် ပၵ်းပိူင်မၢႆမီႈၼႂ်းပိုၼ်ႉတီႈ။ ၵွပ်ႈၼႆလႄႈ ၸင်ႇလႆႈပၼ်တူတ်ႈတၢမ်ႇ ၸွမ်းၼင်ႇပၵ်းပိူင်မၢႆမီႈ မီးၼၼ်ႉ ဝႃႈၼႆ။
ၵူၼ်းပိုၼ်ႉတီႈ ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ ၼၢင်းယိင်းၵေႃႉၼိုင်ႈ လၢတ်ႈၼႄဝႃႈ “ တီႈၼႆႈၼႆႉ သင်ပဵၼ် ၵူၼ်းပူၼ်ႉပႅၼ်ၼႆ ၶဝ်တေဢဝ်လဵပ်ႈဝဵင်း ႁႂ်ႈၵူၼ်းမိူင်းႁၼ်သေၵွၼ်ႇ ၸင်ႇတေပၼ်တၢမ်ႇတၢႆ၊ ၼႆႉၵေႃႈ မိူၼ်ၵၼ်ၶႃႈယဝ်ႉ ပၼ်ႇလဵပ်ႈဝဵင်းသေၵွၼ်ႇ ၸင်ႇတေပၼ်တၢမ်ႇတၢႆ” ဝႃႈၼႆ။
ၵူၼ်းပူၼ်ႉပႅၼ်ႁဵတ်းၽိတ်း သၢမ်ၵေႃႉၼၼ်ႉ ၸဝ်ႈၼႃႈတီႈဢဝ်ပၼ်ႇလဵပ်ႈဝဵင်း ၼိုင်ႈႁွပ်ႈသေ ၸင်ႇဢဝ်ၵႂႃႇယိုဝ်းတၢႆ တီႈၵွင်းၶႃႈႁႅမ်ၵူၼ်း တေႃႇၼႃႈၵူၼ်းမိူင်းတၢင်းလၢႆ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ