တႃႈၶီႈလဵၵ်း လူတ်းယွၼ်ႇပၼ် ၶၢဝ်းဢွၵ်ႇၼွၵ်ႈႁိူၼ်းၵၢင်ၶိုၼ်း

ၸႄႈတွၼ်ႈတႃႈၶီႈလဵၵ်း တေလူတ်းယွၼ်ႇယၢၼ်းပၼ် ၶၢဝ်းယၢမ်း ဢွၵ်ႇၼွၵ်ႈႁိူၼ်းယေးပၼ် 2 ၸူဝ်ႈမူင်း ဝႃႈၼႆ။

တႄႇဢဝ် ဝၼ်းတီႈ 15/5/2020 မိူဝ်ႈၼႆႉၵႂႃႇ ယူႇတီႈၽူႈၵွၼ်းၸႄႈတွၼ်ႈတႃႈၶီႈလဵၵ်း တေလူတ်းယွၼ်ႇယၢၼ်းပၼ် ၶၢဝ်း ယၢမ်းဢွၵ်ႇၼွၵ်ႈႁိူၼ်း ယၢမ်းၵၢင်ၶိုၼ်း 10 မူင်း ထိုင် 4 မူင်းၵၢင်ၼႂ်ၼၼ်ႉ။ တေႃႈလဵဝ် လႅၵ်ႈလၢႆႈပဵၼ် ယၢမ်းၵၢင်ၶိုၼ်း 12 မူင်း ထိုင် 4 မူင်းၵၢင်ၼႂ်ယဝ်ႉ တွၼ်ႈတႃႇ ၼႂ်းၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ဝႃႈၼႆ။

ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ။ တႄႇမိူဝ်ႈၼႆႉ ဝၼ်းတီႈ 15/5/2020 တေႃႇထိုင် လိူၼ်တေမႃး ဝၼ်းတီႈ 22/6/2020 ၼႆၶႃႈ” ဝႃႈၼႆ။

ၼႂ်းၸႄႈတွၼ်ႈတႃႈၶီႈလဵၵ်းၼႆႉ ၶဝ်ႈပႃးဝႆႉ ၸႄႈဝဵင်းမိူင်းၽျၢၵ်ႈ မိူင်းယွင်းလႄႈ တႃႈၶီႈလဵၵ်း ၸိူဝ်းၼႆႉ။

မိူဝ်ႈဝၼ်းတီႈ 20/4/2020 ၼၼ်ႉ ယူႇတီႈလူင်ပွင်ၸိုင်ႈမိူင်းႁူမ်ႈတုမ် ပိုၼ်ၽၢဝ်ႇ ႁၢမ်ႈၵူၼ်းမိူင်းဢွၵ်ႇၼွၵ်ႈႁိူၼ်း ၶၢဝ်းယၢမ်းၵၢင်ၶိုၼ်း 10 မူင်း ထိုင် 4 မူင်းၵၢင်ၼႂ် တႃႇၶၢဝ်းတၢင်း 1 လိူၼ်။ ၶေႃႈႁၢမ်ႈၼႆႉ ပႃးၼႂ်းမိူင်းတႆး တႃႇ 49 ၸႄႈဝဵင်း။ ယိူင်းဢၢၼ်းတႃႇၵႅတ်ႇၶႄႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 ၼင်ႇႁိုဝ် ပေႃးတေဢမ်ႇလၢမ်းၽႄႈႁၢဝ်ႈႁႅင်း ၼႂ်းမိူင်းတႆး ဝႃႈၼႆ။

ၵဵဝ်ႇၵပ်းလွင်ႈ လူတ်းယွၼ်ႇမၢႆမီႈၶၢဝ်းယၢမ်းဢွၵ်ႇၼွၵ်ႈႁိူၼ်းၼႆႉသေ ဢူးၽဵဝ်းမိၼ်းထၢႆႉ ၽူႈၵွၼ်းၸေႈဝဵင်းတူၼ်ႈတီး ၵေႃႈလၢတ်ႈတီႈၽူႈတွႆႇႁွၵ်ႈဝႃႈ – “တီႈဝဵင်းတူၼ်ႈတီး ၵေႃႈ လူတ်းဢေႃႈ။ ႁၢမ်ႈၵေႃႈ မိူဝ်ႈၵူႈပွၵ်ႈ ၵူၼ်းၵႂႃႇမႃးမီးယူႇၶႃႈ ။ ပႃးတင်းလိၵ်ႈၵမ်ႉသေဢေႃႈ။ လိၵ်ႈၵမ်ႉၵၢင်ႉၵႄႇ၊ လိၵ်ႈၵမ်ႉပၢႆးယူႇလီၸိူဝ်းၼႆႉဢေႃႈ” – ဝႃႈၼႆ။

လိူဝ်ၼၼ်ႉ တၢင်းၼေႇပျီႇတေႃႇ၊ ဝဵင်းလိူဝ်ႇၸိူဝ်းၼႆႉၵေႃႈ လူတ်းယွမ်းလူင်းပၼ်ၵမ်ႈၽွင်ႈသေ တၢင်ႇတိူင်းလႄႈ တၢင်ႇၸႄႈမိူင်းတႄႉ တေလူတ်းယွၼ်ႇယၢၼ်းပၼ်ၵမ်ႈၽွင်ႈၵေႃႈ တေမီးယူႇ ၼႆယဝ်ႉ။