မၢၵ်ႇၶိူဝ်သူမ်ႈၼႂ်းၼွင်ႁၢႆးယႃႈ ၶၢႆဢမ်ႇပေႃးလႆႈၶၼ်ၵႃႈ ယွၼ်ႉတၢင်းပဵၼ်ၶူဝ်ႊဝိတ်ႉ – 19 ၸဝ်ႈသူၼ် လူႉသုမ်းတင်းၼမ် လၢႆ။

ၼႂ်းပီ 2020 ၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ – 19လႄႈ ၸဝ်ႈသူၼ်မၢၵ်ႇၶိူဝ်သူမ်ႈ ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ယၢပ်ႇၽိုတ်ႇယွၼ်ႉ မၢၵ်ႇၶိူဝ်သူမ်ႈ ၶၢႆဢမ်ႇလႆႈ ၶၼ်သုင် ၊ ဢွၼ်ၵၼ်လူႉသုမ်းတင်းၼမ်လၢႆ၊ မၢင်ၵေႃႉ ဢမ်ႇလႆႈၶိုၼ်းၵႃႈတိုၼ်းလၢင်း(ၵေးလၢင်း) ၵေႃႈမီး၊ ၼႆႉ လႆႈဢဝ်ၶၼ်ၶၢႆမၼ်း တူၵ်းလူင်းႁႅင်း ဝႃႈၼႆ။

ဢူးဝိၼ်းၼၢႆႇ ၸဝ်ႈသူၼ်မၢၵ်ႇၶိူဝ်သူမ်ႈ ဝၢၼ်ႈၵေႇလႃႇ ၼႂ်းၼွင်ႁၢႆးယႃႈ လၢတ်ႈတီႈၽူႈတွႆႇႁွၵ်ႈဝႃႈ “ ပေႃးမႃးတူၺ်း ငဝ်းလၢႆး ပီၼႆႉတႄႉ ၵႃႈၶၼ်မၢၵ်ႇၶိူဝ်သူမ်ႈၼႆႉ တူၵ်းလိူဝ်ႁႅင်းၶႃႈ။ ၸဝ်ႈသူၼ်ႁဝ်းၶႃႈယင်းပႆႇလႆႈၵႃႈတိုၼ်းလၢင်းမၼ်းၶႃႈ။ မိူဝ်ႈပီပူၼ်ႉတႄႉ ၵႃႈၶၼ်လီဢေႃႈ။ ပီၼႆႉ ၸဝ်ႈသူၼ်ႁဝ်း မွၵ်ႈ 90 %ၼႆႉ ဢွၼ်ၵၼ်လူႉသုမ်းဢေႃႈ” ဝႃႈၼႆ။

ပီၼႆႉ တင်ႈဢဝ် မၢၵ်ႇၶိူဝ်သူမ်ႈဢွၵ်ႇမႃးၼႆႉလႆႈၶၢႆ ၼိုင်တၢင်( မီးၼမ်ႉၼၵ်း 30 ၸွႆႉ) တူၵ်းမႅၼ်ႈငိုၼ်းယူႇ 3,000 ပျႃး ထိုင် 3,500 ပျႃးၵႃႈၼႆႉၵူၺ်း၊ လႆႈၶိုၼ်းၵႃႈႁႅင်းၵူၼ်းႁဵတ်းၵၢၼ်ၵူၺ်း။ ဢမ်ႇလႆႈၶိုၼ်းၵႃႈ ၾုၼ်ႇ၊ ယႃႈၶႃႈမူင်ႈမႅင်း ၸိူဝ်းၼႆႉပႃးလႄႈ လႆႈဝႃႈ လူႉသုမ်းၼမ် ဝႃႈၼႆ။

ဢူးဝိၼ်းၼၢႆႇ သိုပ်ႇလၢတ်ႈဝႃႈ “ မိူဝ်ႈပူၼ်ႉမႃး ၶၢဝ်းတၢင်း 2 ဝၼ်းၼၼ်ႉ ၶၼ်မၢၵ်ႇၶိူဝ်သူမ်ႈ ၶိုၼ်ႈသုင်မႃးၶိုၼ်း ဢိတ်းၼိုင်ႈ ။ ၼိုင်ႈတၢင်လႆႈယူႇမွၵ်ႈ10,000 ပျႃးၼႆႉ။ ၵူၺ်းၵႃႈ ပႆႇလႆႈၶိုၼ်းတိုၼ်းလၢင်းမၼ်း” ဝႃႈၼႆ။

မိူဝ်ႈပီပူၼ်ႉမႃး မၢၵ်ႇၶိူဝ်သူမ်ႈၼိုင်တၢင်လႂ်လႆႈၶၢႆ 25,000 ထိုင် 30,000 ပျႃးၸိူဝ်းၼႆႉ ဝႃႈၼႆ။

“ၽွင်းမၢၵ်ႇၶိူဝ်သူမ်ႈဢွၵ်ႇၼမ်ၼၼ်ႉ ဢမ်ႇမီးၶၼ်ၶၢႆမၼ်းၶႃႈ ။ ၵမ်းၼႆႉ ၶၼ်ၶၢႆမၼ်းလီၶိုၼ်ႈမႃးၵေႃႈ မၢၵ်ႇၶိူဝ်သူမ်ႈသမ်ႉ ဢမ်ႇဢွၵ်ႇလီ ႁဵတ်းၼႆၶႃႈဢေႃႈ၊ ယွၼ်ႉၼၼ်လႄႈ ႁဝ်းၶႃႈဢွၼ်ၵၼ်သုမ်းၶႃႈယဝ်ႉ” ၸဝ်ႈသူၼ်ၵေႃႉၼိုင်ႈ လၢတ်ႈၼႄၼင်ႇၼႆ။

မၢၵ်ႇၶိူဝ်သူမ်ႈဢၼ်ဢွၵ်ႇၼႂ်းၼွင်ႁၢႆးယႃႈၼႆႉ လႆႈတၢင်ႇၶၢႆတင်းမိူင်းႁူမ်ႈတုမ်ပတ်းပိုၼ်ႉ၊ ၵူၺ်းၵႃႈ မၢၵ်ႇၶိူဝ်သူမ်ႈ ဝႆႉႁိုင်ဢမ်ႇလႆႈ၊ ပီၼႆႉ ၽွင်းၶၢဝ်းတၢင်းပဵၼ်ၶူဝ်ႊဝိတ်ႉ – 19 ၼႆႉ တွၼ်ႈတႃႇတေသိုပ်ႇတေႃႉၶၢႆၵႂႃႇ တၢင်ႇတီႈ ၸိူဝ်းၼၼ်ႉၵေႃႈ ရူတ်ႉၵႃး ဢမ်ႇပေႃးလႅၼ်ႈယဝ်ႉလႄႈ ထိုင်တီႈပေႃးလႆႈသုမ်းၵၼ်တင်းၼမ်လၢႆ။

တွၼ်ႈတႃႇၵူၼ်းသိုဝ်ႉၵိၼ်ၼႂ်းၵၢတ်ႇတႄႉ မၢၵ်ႇၶိူဝ်သူမ်ႈၼႆႉ မိူဝ်ႈလိူၼ်ပူၼ်ႉမႃး သိုဝ်ႉၶၢႆၼိုင်ႈၸွႆႉလႂ် 300 ပျႃးၵူၺ်းသေတႃႉ ၼႂ်းဝူင်ႈၼႆႉ ၶၼ်မၼ်းၶိုၼ်ႈမႃးထိုင်ၼိုင်ႈၸွႆႉလႂ် 500 ပျႃးယဝ်ႉ ဝႃႈၼႆ။