ၸဝ်ႈသူၼ်ပွတ်းထုင်ႉမၢဝ်း ဢဝ်ၶဝ်ႈၶႄႇသႂ်ႇထူဝ်ႈ ၸႅၵ်ႇပၼ်ပီႈၼွင်ႉဢူၺ်းၵေႃႉ

ၸဝ်ႈသူၼ်ဢမ်ႇၸၢင်ႈၶၢႆၶဝ်ႈၵၢပ်ႇပၼ်မိူင်းၶႄႇလႄႈ တၢင်ႇထူဝ်ႈမႃးၸႅၵ်ႇ ပၼ်ပီႈၼွင်ႉၼႂ်းဝဵင်းမူႇၸေႊ ဢမ်ႇယွမ်း 50 လမ်း ဝႃႈၼႆ။

တႄႇဢဝ် ႁူဝ်လိူၼ်မေႊ 2020 ၼႆႉမႃး ၸဝ်ႈသူၼ် ပွတ်းထုင်ႉမၢဝ်း ၵမ်ႈၼမ် ဢွၼ်ၵၼ်ဢဝ်ၶဝ်ႈၶႄႇသႂ်ႇထူဝ်ႈသေ ၵႂႃႇၸႃႇၵႃႉ ၶဝ်ႈၵၢပ်ႇ ယိုၼ်ႈပၼ်ႁိူၼ်းပီႈၼွင်ႉ ဢူၺ်းၵေႃႉ ဢူၺ်းသေႈလႄႈ ၵူၼ်းမိုတ်ႈၵိုတ်းႁူႉၸၵ်းၵၼ် ၼႂ်းၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ။ ယွၼ်ႉၸဝ်ႈၼႃႈတီႈၶႄႇ ဢမ်ႇပၼ်ၶဝ်ႈၵၢပ်ႇ တေႃႉၶဝ်ႈၵႂႃႇၶၢႆ တၢင်းၾင်ႇမိူင်းၶႄႇၵၼ်သေ ႁဵတ်းႁႂ်ႈၸဝ်ႈသူၼ် ၶဝ်ႈၵၢပ်ႇလူႉသုမ်းတင်းၼမ်လၢႆၵၼ် ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸဝ်ႈသူၼ်ႁဝ်း ဢွၼ်ၵၼ်တေႃႉၶဝ်ႈၾႃႉ သႂ်ႇထူဝ်ႈသေ မႃးတွၼ်ႈပီႈၼွင်ႉၼႂ်းဝဵင်းမူႇၸေႊၶႃႈ။ တႄႇဢဝ်လိူၼ်ၼႆႉမႃး ထူဝ်ႈတၢင်ႇမႃးၸႅၵ်ႇ ၸႃႇၵႃႉပၼ်ၶဝ်ႈၵၢပ်ႇ ဢမ်ႇယွမ်း 50 လမ်းၼႆႉ။ ၸႅၵ်ႇပၼ်ႁိူၼ်းပီႈႁိူၼ်းၼွင်ႉသေဢမ်ႇၵႃး ၵူၼ်းႁူႉၸၵ်းၵၼ် ဢူၺ်းၵေႃႉဢူၺ်းသေႈၸိူဝ်းၼႆႉ ၵေႃႈၸႅၵ်ႇပႃး” ဝႃႈၼႆ။

ၸဝ်ႈသူၼ်မၢင်ၵေႃႉ ပၢႆၵိုတ်းထူဝ်ႈၸွမ်းၶၢင်ႈတၢင်းသေ ၸႅၵ်ႇပၼ်ၵူၼ်းၵႂႃႇမႃး ၸွမ်းသဵၼ်ႈတႃႈသၢႆတၢင်း ၸိူဝ်းၼႆႉ ၵေႃႈမီး ဝႃႈၼႆ။

ၸၢႆးႁိၼ်လဵၵ်း သိုပ်ႇလၢတ်ႈဝႃႈ “ ၸဝ်ႈသူၼ်ႁဝ်း ၸိူဝ်းၸႅၵ်ႇၵေႃႈၸႅၵ်ႇ၊ ၸိူဝ်းတၢင်ႇၵႂႃႇပႅတ်ႈၼႂ်းၼမ်ႉမၢဝ်းၵေႃႈမီး၊ ၸိူဝ်းထွၵ်ႇပႅတ်ႈ ပဵၼ်ၵေႃႇပဵၼ်ၵွင်ၵေႃႈမီး၊ လူႉသုမ်းၵၼ်ၼမ်တႄႉတႄႉဝႃႈဝႃႈၶႃႈယဝ်ႉ။ တၢင်းပွတ်းထုင်ႉမၢဝ်း ႁဝ်းၶႃႈၼႆႉ ဢၼ်ၽုၵ်ႇၶဝ်ႈၾႃႉၼႆႉ တင်းမူတ်းတေဢမ်ႇယွမ်း 1 မိုၼ်ႇဢေႊၶိူဝ်ႊၼႆႉၶႃႈယဝ်ႉ။ ဢေးလူၵၼ်ၶႃႈဢေႃႈ ယွၼ်ႉတၢင်းပဵၼ်ၶူဝ်ႊဝိတ်ႉ – 19 ၼႆႉသေ တၢင်းၾင်ႇမိူင်းၶႄႇၶဝ် တင်ႈၸႂ်ပိၵ်ႉဢိုတ်းပႅတ်ႈ ဢမ်ႇပၼ်ၵူၼ်းၶဝ်ႈဢွၵ်ႇ၊ ယွၼ်ႉၼၼ် ၸင်ႇတုမ်ႉတိူဝ်ႉ ၸဝ်ႈသူၼ်ႁဝ်းၶႃႈ” ဝႃႈၼႆ။

ဢိင်ၼိူဝ်လွင်ႈၸဝ်ႈၼႃႈတီႈၶႄႇ ဢမ်ႇပၼ်ၵူၼ်းတၢင်းၾင်ႇမိူင်းတႆး ၶဝ်ႈၵႂႃႇၶၢႆၶဝ်ႈၵၢပ်ႇ တၢင်းၾင်ႇမိူင်းၶႄႇၼၼ်ႉ ႁဵတ်းႁႂ်ႈ ၸဝ်ႈသူၼ်ႁူပ်ႉလွင်ႈယၢပ်ႇၽိုတ်ႇလိူဝ်ႁႅင်း၊ ယူႇတီႈၸဝ်ႈသူၼ် ႁူမ်ႈၵၼ်တုၵ်းယွၼ်းထိုင်ၸဝ်ႈၼႃႈတီႈၶႄႇ ၊ ၾၢႆႇၼိုင်ႈယူႇတီႈၶွမ်ႊမတီႊၸႄႈတွၼ်ႈမူႇၸေႊၵေႃႈႁဵတ်းလိၵ်ႈသူင်ႇၸူးတၢင်းမိူင်းၶႄႇ လၢႆၵမ်းယဝ်ႉ ဢမ်ႇပႆႇတွပ်ႇလၢတ်ႈသင်မႃး ဝႃႈၼႆ။

“လွင်ႈပိုတ်ႇပၼ် ၵူၼ်းထုင်ႉမၢဝ်းႁဝ်းၶႃႈ ပေႃးတေၸၢင်ႈၵႂႃႇၶၢႆၶဝ်ႈၵၢပ်ႇၸူးမိူင်းၶႄႇၼၼ်ႉ တေႃႈလဵဝ် လႆႈငိၼ်းဝႃႈ ၸဝ်ႈၼႃႈတီႈတၢင်းၾင်ႇမိူင်းၶႄႇ ဢိူင်ႇတႂ်ႈၶူင်းတေလူင်းမႃးထတ်းတူၺ်းၼႆ၊ ၵူၺ်းၵႃႈ တေမႃးမိူဝ်ႈလႂ် တေႁဵတ်းႁိုဝ် ဢၼ်ဝႃႈၼၼ်ႉ ပႆႇႁူႉႁူဝ်ယွႆႈမၼ်းၶႃႈ လႆႈငိၼ်းဝႆႉၸိူင်ႉၼႆၵူၺ်း” ၸၢႆးႁိၼ်လဵၵ်းလၢတ်ႈၼႄၼင်ႇၼႆ။

ၽၵ်းတူမိူင်း ၶဝ်ႈဢွၵ်ႇ ၼႂ်းၸႄႈတွၼ်ႈမူႇၸေႊၼႆႉ ယူႇတီႈတၢင်းၾင်ႇမိူင်းၶႄႇ ၸီႉသင်ႇဢိုတ်းတင်ႈတႄႇ ဝၼ်းတီႈ 1/4/2020 မႃး တေႃႇထိုင်ဝၼ်းမိူဝ်ႈၼႆႉ ပႆႇပိုတ်ႇၶိုၼ်း ဝႃႈၼႆ။