ထဝ်ႈယိင်း ဢႃယု 87 ပီ ဢၼ်ၸပ်းၸိူဝ်ႉမႅင်းၶူဝ်ႊဝိတ်ႉ – 19 တီႈမူႇၸေႊ ၸိုင်ႈတႆးပွတ်းႁွင်ႇၼၼ်ႉ မေႃယႃ လႆႈသူင်ႇၵူတ်ႇထတ်းတူၺ်းတၢင်းပဵၼ် မၼ်းၼၢင်း 2 ပွၵ်ႈ၊ ဢွၵ်ႇၶေႃႈတွပ်ႇမႃး ပဵၼ် Negative ဢမ်ႇထူပ်းႁၼ်ၸိူဝ်ႉမႅင်းသေ ယူႇတီႈမေႃယႃ ၶဝ်လႆႈပၼ်ၶႂၢင်ႉလူင်းႁူင်းယႃယဝ်ႉ ဝႃႈၼႆ။
မၼ်းၼၢင်းၼႆႉလႆႈလူင်းႁူင်းယႃ မိူဝ်ႈဝၼ်းတီႈ 9/5/2020 ။
ၻွၵ်ႊတိူဝ်ႊ ႁၢၼ်ႇၼၢႆႇၸူဝ်း ၽူႈၵွၼ်းႁူင်းယႃမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ လႆႈသူင်ႇ ၵူတ်ႇထတ်းထႅင်ႈ 2 ပွၵ်ႈသေ တင်း 2 ပွၵ်ႈ ဢွၵ်ႇၶေႃႈတွပ်ႇမႃးပဵၼ် Negative ။ ပၢႆးယူႇလီၵေႃႈ ၶႅမ်ႉမႃးယဝ်ႉလႄႈ ၸင်ႇပၼ်ၶႂၢင်ႉလူင်းႁူင်းယႃ ” ဝႃႈၼႆ။
ၵူၺ်းၵႃႈ တေလႆႈသိုပ်ႇၵုမ်းတူဝ် Quarantine တီႈႁူင်းႁႅမ်း 7 ဝၼ်း၊ တီႈႁိူၼ်းထႅင်ႈ 7 ဝၼ်း ႁူမ်ႈၵၼ်တင်းမူတ်း 14 ဝၼ်း။ ၼႂ်း 14 ဝၼ်းၼၼ်ႉ တေၵူတ်ႇထတ်းတၢင်းပဵၼ်ထႅင်ႈသေ ၸင်ႇတေ ပၼ်ၶႂၢင်ႉဢွၵ်ႇၼွၵ်ႈႁိူၼ်းယေး ႁူပ်ႉပီႈၼွင်ႉ ၵူၼ်းၼႂ်းပိုၼ်ႉတီႈလႆႈ ဝႃႈၼႆ။
ၸၢႆးႁိၼ်လဵၵ်း ၸုမ်းသိုဝ်ႇၶၢဝ်ႇထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈယဝ်ႉၶႃႈ ထဝ်ႈယိင်း တီႈပွၵ်ႉၵၢတ်ႇၼၼ်ႉ လႆႈလူင်းႁူင်းယႃယဝ်ႉၶႃႈ။ မိူဝ်ႈဝႃး ႁဝ်းၶႃႈဝႃႈ ပႆႇလူင်းႁူင်းယႃ တေပႂ်ႉတူၺ်းထႅင်ႈ 14 ဝၼ်းၵွၼ်ႇ၊ ပေႃးယဝ်ႉ ယူႇတီႈမေႃယႃၶဝ်တေဢုပ်ႇၵၼ်သေ ၸင်ႇတေပၼ်လူင်း ဝႃႈၼႆ၊ ၵူၺ်းၵႃႈ တီႈႁူင်းယႃသမ်ႉ မီးလွင်ႈလႅၵ်ႈလၢႆႈသေ ၸင်ႇလႆႈ လူင်းႁူင်းယႃၵႂႃႇမိူဝ်ႈဝႃးၶႃႈဢေႃႈ” ဝႃႈၼႆ။
တေႃႈလဵဝ် တီႈႁူင်းယႃၵူၼ်းမိူင်း ၸႄႈဝဵင်းမူႇၸေႊၼႆႉ ၵူၼ်းထၢင်ႇထိူမ်မိူၼ်ၵူၼ်းၸပ်းတၢင်းပဵၼ်ဝႆႉမီး 6 ၵေႃႉ။ ၼႂ်း 6 ၵေႃႉၼၼ်ႉ တႃႇ 3 ၵေႃႉ လႆႈသူင်ႇၵူတ်ႇထတ်းတၢင်းပဵၼ်သေ ဢွၵ်ႇၶေႃႈတွပ်ႇမႃး ပဵၼ် Negative ။ ၵိုတ်းထႅင်ႈ 3 ၵေႃႉၼၼ်ႉတႄႉ တိုၵ်ႉသူင်ႇၼမ်ႉလၢႆး ဢၢင်ႈဢၢၵ်ႇ ၶဝ်ၵူတ်ႇထတ်းဝႆႉယူႇ ဝႃႈၼႆ။
ထဝ်ႈယိင်း မူႇၸေႊၼႆႉ ႁွင်ႈၵၢၼ်ပၢႆးယူႇလီ မိူင်းႁူမ်ႈတုမ်ပိုၼ်ၽၢဝ်ႇ ၵူတ်ႇထတ်းႁၼ်ၺႃးၸိူဝ်ႉမႅင်းတၢင်းပဵၼ် မိူဝ်ႈဝၼ်းတီႈ 24/4/2020 ယၢမ်းၵၢင်ၶမ်ႈ 8 မူင်း ။ မၼ်းၼၢင်းၼႆႉ ၸင်ႇႁႃၵႂႃႇဢႅဝ်ႇမိူင်းတူႊပၢႆႊ မႃးမိူဝ်ႈလိူၼ်မၢတ်ႉၶျ်ၼၼ်ႉၵူၺ်း။ မၼ်းၼၢင်းပဵၼ်ဢႆ ၶေႃးၸဵပ်းလႄႈ ၼႅတ်ႈၵႂႃႇႁူင်းယႃ ၵူတ်ႇထတ်းတူၺ်း ၸင်ႇလႆႈႁူႉဝႃႈ ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ