ထဝ်ႈယိင်း ဢႃယု 87 ပီ ဢၼ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၵူၼ်းမူႇၸေႊၼၼ်ႉ ယူႇတီႈမေႃယႃၶဝ် လႆႈသူင်ႇၵူတ်ႇထတ်းတၢင်းပဵၼ်ထႅင်ႈ ဢွၵ်ႇမႃးၵႂၢမ်းတွပ်ႇပဵၼ် Negative ပွၵ်ႈၵမ်းသွင်။
ၶေႃႈၵူတ်ႇထတ်းၵမ်းတီႈ 2 ၼႆႉ ၶေႃႈတွပ်ႇမၼ်းဢွၵ်ႇမႃးဝၼ်းတီႈ 8/5/2020 ။
ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ မူႇၸေႊ ႁၢႆးငၢၼ်းလၢတ်ႈၼႄတီႈၽူႈတွႆႇႁွၵ်ႈဝႃႈ “ ယူႇတီႈမေႃယႃ မူႇၸေႊ လၢတ်ႈ ဝႃႈ ထဝ်ႈယိင်း တီႈပွၵ်ႉၵၢတ်ႇ ဢၼ်တိတ်းၸပ်းၸိူဝ်ႉမႅင်းဝႆႉၼၼ်ႉ လႆႈၵူတ်ႇထတ်းတၢင်းပဵၼ် ထႅင်ႈၵမ်းၼိုင်ႈၼႆႉ ထူပ်းႁၼ်ပဵၼ် Negative ထႅင်ႈ။ ၵူၺ်းၵႃႈ တေၶၢႆႉလၢႆႈပၼ်ႁွင်ႈယူႇသဝ်းသေ တေသိုပ်ႇပႂ်ႉတူၺ်းထႅင်ႈ တႃႇၶၢဝ်းတၢင်း 14 ဝၼ်း၊ ၼႂ်းၶၢဝ်းတၢင်း 14 ဝၼ်းၼၼ်ႉ တေ သူင်ႇၵူတ်ႇထတ်းတၢင်းပဵၼ်ထႅင်ႈ” ဝႃႈၼႆ။
သင်ဝႃႈ သူင်ႇၵူတ်ႇထတ်းတၢင်းပဵၼ်ထႅင်ႈသေ ဢမ်ႇထူပ်းႁၼ်ၸိူဝ်ႉမႅင်းယဝ်ႉၸိုင် တႃႇတေပွႆႇလူင်းႁူင်းယႃသေ ပွႆႇပွၵ်ႈမိူဝ်းႁိူၼ်းၼၼ်ႉ တေဢုပ်ႇၵၼ်ထႅင်ႈၵမ်းၼိုင်ႈ ဝႃႈၼႆ။
တင်ႈတႄႇ မီးၵူၼ်း မူႇၸေႊ တိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 မႃးၼႆႉ တီႈပွၵ်ႉၵၢတ်ႇ တီႈဢၼ်မၼ်းၼၢင်းယူႇသဝ်းၼၼ်ႉၵေႃႈ Lockdown (ႁၢမ်ႈၵူၼ်းၶဝ်ႈဢွၵ်ႇၵႂႃႇမႃး) ဝႆႉ။ လိူဝ်သေၼၼ်ႉ ၵၢတ်ႇမူႇၸေႊ မၢႆၼိုင်ႈၵေႃႈ လႆႈဢိုတ်းဝႆႉ တေႃႇထိုင်ယၢမ်းလဵဝ် ပႆႇပိုတ်ႇ ။
လုင်းသႅင်ၶမ်းႁိူင်း ၵူၼ်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ တီႈပွၵ်ႉၵၢတ်ႇႁဝ်းၶႃႈတႄႉ သဵၼ်ႈတႃႈသၢႆတၢင်း ဢိုတ်းဝႆႉမူတ်းယဝ်ႉ တေႃႇထိုင်ယၢမ်းလဵဝ် ပႆႇပႃႈပိုတ်ႇ။ ယဝ်ႉၵေႃႈ ၵၢတ်ႇမူႇၸေႊ မၢႆၼိုင်ႈၵေႃႈ မီးတေႃႇၼႃႈၵၼ်တင်းႁိူၼ်းၵူၼ်းၸပ်းတၢင်းပဵၼ်လႄႈတေႃႇထိုင်ယၢမ်းလဵဝ်ယင်းပႆႇပိုတ်ႇ။” ဝႃႈၼႆ။
တေႃႈလဵဝ် ထဝ်ႈယိင်း ဢႃယု 87 ပီ ဢၼ်ယူတ်းယႃတူဝ်ဝႆႉတီႈႁူင်းယႃမူႇၸေႊၼၼ်ႉ ငဝ်းလၢႆး ပၢႆးယူႇလီ ၶႅမ်ႉလႅပ်ႈလီယူႇ။ ၵူၺ်းၵႃႈ မၼ်းၼၢင်းမီးတၢင်းပဵၼ်ယဵဝ်ႈဝၢၼ် ပႃးထႅင်ႈလႄႈ မေႃယႃတိုၵ်ႉၶတ်းၸႂ်တူၺ်းထိုင် လုမ်းလႃးဝႆႉယူႇ မေႃယႃမူႇၸေႊ ၵေႃႉၼိုင်ႈလၢတ်ႈၼႄၼင်ႇၼႆ။
ထဝ်ႈယိင်း မူႇၸေႊၼႆႉ ႁွင်ႈၵၢၼ်ပၢႆးယူႇလီ မိူင်းႁူမ်ႈတုမ်ပိုၼ်ၽၢဝ်ႇ ၵူတ်ႇထတ်းႁၼ်ၺႃးၸိူဝ်ႉမႅင်းတၢင်းပဵၼ် မိူဝ်ႈဝၼ်းတီႈ 24/4/2020 ယၢမ်းၵၢင်ၶမ်ႈ 8 မူင်း ။ မၼ်းၼၢင်းၼႆႉ ၸင်ႇႁႃၵႂႃႇဢႅဝ်ႇမိူင်းတူႊပၢႆႊ မႃးမိူဝ်ႈလိူၼ်မၢတ်ႉၶျ်ၼၼ်ႉၵူၺ်း။ မၼ်းၼၢင်းပဵၼ်ဢႆ ၶေႃးၸဵပ်းလႄႈ ၼႅတ်ႈၵႂႃႇႁူင်းယႃ ၵူတ်ႇထတ်းတူၺ်း ၸင်ႇလႆႈႁူႉဝႃႈ ၸပ်ႉၸိူဝ်းမႅင်းတၢင်းပဵၼ်ၶူဝ်ႊဝိတ်ႉ – 19 ဝႃႈၼႆ။
ဝၼ်းတီႈ 8/5/2020 ယၢမ်းၵၢင်ၶိုၼ်း 10 မူင်း ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇ ထူပ်းႁၼ် ၵူၼ်းၸပ်းတၢင်းပဵၼ်ထႅင်ႈ 1 ၵေႃႉ။ တေႃႈလဵဝ် ၼႂ်းမိူင်းႁူမ်ႈတုမ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်းမီး 177 ၵေႃႉ၊ လူႉတၢႆ 6 ၵေႃႉ၊ ယႃၶႅၼ်း 67 ၵေႃႉလႄႈ တိုၵ်ႉယူတ်းယႃဝႆႉယူႇ 104 ၵေႃႉ။
ၼႂ်းမိူင်းတႆးသမ်ႉ ၵူၼ်းတိတ်းၸပ်းတၢင်းပဵၼ် တင်းမူတ်း 7 ၵေႃႉ။ ပွတ်းဢွၵ်ႇ 3 ၵေႃႉ၊ ပွတ်းႁွင်ႇ 2 ၵေႃႉလႄႈ ပွတ်းၸၢၼ်း 2 ၵေႃႉ။
