ၽၵ်းတူလႅၼ်လိၼ်တႆး – ထႆး (ၶူဝ်မႄႈသၢႆ – တႃႈၶီႈလဵၵ်း) လႆႈပိၵ်ႉဢိုတ်းမႃး မီးၶၢဝ်းတၢင်းလိူၼ်ပၢႆယဝ်ႉ တေႃႇထိုင်မိူဝ်ႈလဵဝ် ပႆႇပိုတ်ႇ၊ လွင်ႈတေပိုတ်ႇဢမ်ႇပိုတ်ႇဢၼ်ဝႃႈၼၼ်ႉ ဢိင်ၼိူဝ်တၢင်းၾင်ႇမိူင်းထႆးၵူၺ်း ဝႃႈၼႆ။
ၶူဝ်လႅၼ်လိၼ်တႆး – ထႆး တႃႈၶီႈလဵၵ်း – မႄႈသၢႆၼႆႉ လႆႈပိၵ်ႉဢိုတ်းမႃးပဵၼ်တၢင်းၵၢၼ် မိူဝ်ႈဝၼ်းတီႈ 23/3/2020 ၊ ယူႇတီႈလူင်ပွင်ၸိုင်ႈမိူင်းထႆး ၸီႉသင်ႇႁႂ်ႈပိၵ်ႉဢိုတ်းဝႆႉၸူဝ်ႈၶၢဝ်း ယွၼ်ႉတၢင်းပဵၼ်ၶူဝ်ႊဝိတ်ႉ – 19 လၢမ်ႈၽႄႈႁၢဝ်ႈႁႅင်း။ ၵွပ်ႈၼႆလႄႈ ၽၵ်းတူၶူဝ်လႅၼ်လိၼ် တႃႈၶီႈလဵၵ်း – မႄႈသၢႆၼႆႉ ပိၵ်ႉဢိုတ်းမႃး ၸမ် 2 လိူၼ်ယဝ်ႉ ႁဵတ်းႁႂ်ႈတုမ်ႉတိူဝ်ႉ ၵၢၼ်ၵႃႉၶၢႆ ၵူၼ်းမိူင်း ၼႂ်းပိုၼ်ႉတီႈႁၢဝ်ႈႁႅင်း ဝႃႈၼႆ။
ၸၢႆးၼုမ်ႇတုၺ်ႈ ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ တီႈၶူဝ်တႃႈၶီႈလဵၵ်း – မႄႈသၢႆ ၼႆႉတႄႉ တၢင်းၾင်ႇထႆးၶဝ် သင်ႇပိၵ်ႉဢိုတ်းဢွၼ်တၢင်းၶႃႈယဝ်ႉ။ တႃႇတေပိုတ်ႇၵေႃႈ ယူႇတၢင်းၾင်ႇမိူင်းထႆးၵူၺ်း။ ငိၼ်းဝႃႈတႄႉ လိူၼ်ႁႃႈ (လိူၼ်မေႊ)ၼႆႉယဝ်ႉ ၸင်ႇတေဝူၼ်ႉတႃႇပိုတ်ႇၼႆ။ လွင်ႈတေပိုတ်ႇ ဢမ်ႇပိုတ်ႇဢၼ်ဝႃႈၼၼ်ႉ လႅပ်ႈပဵၼ်ဝၢႆးလိူၼ်ႁႃႈၼႆႉယဝ်ႉ ၸင်ႇတေႁူႉ၊ တေႃႈလဵဝ်ၼႆႉ ပႆႇၸၢင်ႈဝူၼ်ႉၸိူင်ႉႁိုဝ် ပႆႇလႆႈငိၼ်းဝႃႈႁိုဝ်” ဝႃႈၼႆ။
ဢိင်ၼိူဝ်လွင်ႈတၢင်းပဵၼ်ၶူဝ်ႊဝိတ်ႉ – 19 ၼႆႉသေ လူင်ပွင်ၸိုင်ႈမိူင်းထႆး ၸီႉသင်ႇပိၵ်ႉဢိုတ်းၽၵ်းတူ ၶဝ်ႈဢွၵ်ႇ ပဵၼ်တၢင်းၵၢၼ် ဢမ်ႇပဵၼ်တၢင်းၵၢၼ် ၸွမ်းလႅၼ်လိၼ် တႆး – ထႆး ၸိူဝ်းၼၼ်ႉ ၵူႈတီႈ ႁႂ်ႈပိၵ်ႉဢိုတ်းၸူဝ်ႈၶၢဝ်းဝႆႉၵွၼ်ႇ ယွၼ်ႉၼၼ် လႄႈ တုမ်ႉတိူဝ်ႉၵၢၼ်ပၢႆးမၢၵ်ႈမီး ၵူၼ်းယူႇၸွမ်းလႅၼ်လိၼ်ႁၢဝ်ႈႁႅင်း ဝႃႈၼႆ။
ၼၢင်းႁွမ် ၸဝ်ႈၵုၼ်ၵႃႉၶၢႆ လႅၼ်လိၼ်တႆး – ထႆး တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ်ၼႆႉ ၶူဝ်လႅၼ်လိၼ်ၼႆႉ ပိုတ်ႇဝႆႉ တၢင်းၶူဝ်မၢႆ 2 ၵူၺ်း။ လွင်ႈၶူဝ်းၵုၼ်ႇတေႃႉၶဝ်ႈမႃးၶၢႆတၢင်းတႃႈၶီႈလဵၵ်းၼႆႉ ၶွၼ်ႇမၼ်းၵႃႈႁႅင်းၼႃႇ၊ ယၢမ်းလဵဝ်ၼႆႉ ဢၼ်ၶၢမ်ႈလႆႈပဵၼ်ၶူဝ်းၵုၼ်ႇၵူၺ်း၊ ၵူၼ်းမိူင်းၶၢမ်ႈၵႂႃႇမႃးဢမ်ႇလႆႈ။ လိူဝ်ၼၼ်ႉ တႃႇတေပိုတ်ႇ ၶူဝ်မၢႆ 1 ပၼ်ၵူၼ်းမိူင်းၶဝ်ႈဢွၵ်ႇၵႂႃႇမႃးၼၼ်ႉ ဢမ်ႇပႆႇႁၼ်သၢႆငၢႆမႃး ၊ တေပိုတ်ႇမိူဝ်ႈလႂ် ၸိူဝ်းၼႆႉ ပႆႇလႆႈၶေႃႈတွပ်ႇသင်” ဝႃႈၼႆ။
လိူဝ်ၼၼ်ႉ ၼႂ်းၸႄႈဝဵင်းတႃႈၶီႈလဵၵ်းၵေႃႈ မီးလွင်ႈၶဵင်ႈၶႅင်ၼႂ်းပိုၼ်ႉတီႈ လွင်ႈၵူၼ်းၵႂႃႇမႃး ၶွၼ်ႈတုမ်ၵၼ် ႁၢဝ်ႈႁႅင်း။
မိူဝ်ႈပူၼ်ႉမႃးပႆႇႁိုင်ၼၼ်ႉ ၵူၼ်းမိူင်းႁူမ်ႈတုမ် လၵ်ႉၶၢမ်ႈၼမ်ႉသၢႆ မႃးတၢင်းၾင်ႇတႃႈၶီႈလဵၵ်းသေ ၵႂႃႇလိုဝ်ႈသဝ်းဝႆႉ တီႈႁူင်းႁႅမ်း တီႈၼိုင်ႈ ၼႂ်းဝဵင်းတႃႈၶီႈလဵၵ်း ၊ မီးလူမ်းမႆႈလူမ်းၼၢဝ် မိူၼ်ဢွၵ်ႇၾၢင်ႁၢင်ႈတၢင်းပဵၼ်ဝႆႉသေ လႆႈၵုမ်းတူဝ် ပႂ်ႉတူၺ်းဝႆႉ၊ တႄႇဢဝ်ၼၼ်ႉမႃး ၼႂ်းၸႄႈဝဵင်းတႃႈၶီႈလဵၵ်းၵေႃႈ ယူႇတီႈၽူႈမီးပုၼ်ႈၽွၼ်းၶဝ် လႆႈၶဵင်ႈၶႅင်ၶိုၼ်ႈမႃးထႅင်ႈ ၵူၼ်းပိုၼ်ႉတီႈ တႃႈၶီႈလဵၵ်းလၢတ်ႈၼင်ႇၼႆ။
“မိူဝ်ႈဢွၼ်တၢင်းတႄႉ လူမ်ၵႂႃႇၵမ်းၼိုင်ႈ၊ ၽိူဝ်ႇလႆႈႁူႉ ၵူၼ်းမိူင်းႁဝ်းလၵ်ႉၶၢမ်ႈၼမ်ႉသၢႆမႃးသေ လႆႈၵူတ်ႇထတ်းႁူႉဝႃႈ မီးလူမ်းမႆႈ ၼၢဝ် မိူၼ်ၵူၼ်းပဵၼ်ၼႆ လႆႈၵုမ်းတူဝ်ဝႆႉ။ ၵမ်းၼႆႉ ၵၢတ်ႇၸိူဝ်းၼႆႉၵေႃႈ လႆႈပိၵ်ႉမူတ်းၶႃႈဢေႃႈ။ ယဝ်ႉၵေႃႈ ၵူၼ်းၶၢႆၶူဝ်းၸွမ်းၶၢင်ႈတၢင်းလူင် ပိင်ႈယၢင်ႈလႄႈဢၼ်သႂ်ႇလေႃႉထူဝ်းသေၶၢႆၸိူဝ်းၼၼ်ႉၵေႃႈ ထုၵ်ႇႁၢမ်ႈၶၢႆမူတ်းယဝ်ႉ၊ ပၼ်ၶႂၢင်ႉၶၢႆ တႄႇဢဝ်ၵၢင်ၼႂ် ထိုင် 4 မူင်းဝၢႆးဝၼ်းၵူၺ်း၊ သင်ပူၼ်ႉ 4 မူင်းၵႂႃႇၵေႃႈ ယူႇတီႈၾၢႆႇလိူမ်ႈလႆႇ မႃးလိုပ်ႈၵမ်းလဵဝ်ၶႃႈယဝ်ႉ” ၼၢင်းႁွမ် သိုပ်ႇလၢတ်ႈၼႄၼင်ႇၼႆ။
ၸႄႈဝဵင်းတႃႈၶီႈလဵၵ်းၼႆႉ ပဵၼ်ဝဵင်းလႅၼ်လိၼ်တႆး – ထႆး ဝဵင်းၼိုင်ႈသေ ပဵၼ်ဝဵင်းၵႃႉၶၢႆၵေႃႈၸႂ်ႈ၊ ၵူၼ်းမိူင်း လုၵ်ႉတၢင်ႇတီႈသီႇလႅၼ် မႃးယူႇသဝ်းၵေႃႈၼမ်။ ၵမ်ႈၼမ် ပဵၼ်ၵူၼ်းတၢင်းထုင်ႉပဵင်းမႃးယူႇ။ ၽွင်းၶၢဝ်း တၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈႁၢဝ်ႈႁႅင်းၼႆႉ ၸွမ်းဝဵင်းတႃႈၶီႈလဵၵ်း ယဵၼ်သီႇလူင်ဝႆႉ ဝႃႈၼႆ။
တေႃႈလဵဝ် ၵူၼ်းၸပ်းတၢင်းပဵၼ် ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ်ၼႆႉ တင်းမူတ်းမီးၵႂႃႇ 176 ၵေႃႉ၊ လူႉတၢႆ 6 ၵေႃႉလႄႈ ယႃၶႅၼ်း 62 ၵေႃႉ၊ တိုၵ်ႉယူတ်းယႃ 108 ၵေႃႉ ယူႇတီႈႁွင်ႈၵၢၼ်ပၢႆးယူႇလီလႄႈၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႆႉ။
