ၵူၼ်းမိူင်းမၢၼ်ႈ ၸိူဝ်းၺႃးတူတ်ႈတၢမ်ႇၶွၵ်ႈဝႆႉၼႂ်းမိူင်းၶႄႇသေ ပူၼ်ႉတူတ်ႈဢွၵ်ႇမႃးၶိုၼ်းၼၼ်ႉ လူင်ပွင်ၸိုင်ႈၶႄႇ သူင်ႇမွပ်ႈ ပၼ်ၶိုၼ်းတီႈလူင်ပွင်ၸိုင်ႈမိူင်းႁူမ်ႈတုမ် တႃႇ 260 ပၢႆ ။
ဢၼ်ၸဝ်ႈၼႃႈတီႈၶႄႇ သူင်ႇၶိုၼ်းႁႅင်းၵၢၼ်မၢၼ်ႈမိူဝ်ႈဝၼ်းတီႈ 7/5/2020 ယၢမ်းၵၢင်ၼႂ် ၼၼ်ႉ ႁႅင်းၵၢၼ်ၸိူဝ်းၵႂႃႇ တူၵ်းၶွၵ်ႈ တီႈမိူင်းဝူႊႁၢၼ်ႉ (တီႈဢၼ်တႄႇပဵၼ်တၢင်းပဵၼ် ၶူဝ်ႊဝိတ်ႉ 19) ၼၼ်ႉၵေႃႈပႃး။ ၸိုင်ႈမိူင်းၶႄႇ လႆႈသူင်ႇ မွပ်ႈပၼ် တီႈလူင်ပွင်ၸိုင်ႈမိူင်းႁူမ်ႈတုမ် တီႈၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ ။
ဢူးတူႇရိင်ႇ ၽူႈၵွၼ်းၸႄႈဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ၶႄႇ သူင်ႇမွပ်ႈပၼ်မႃး ၵူၼ်းတူၵ်းၶွၵ်ႈ 260 ၵေႃႉၼႆႉ ပဵၼ်ၵူၼ်းတူၵ်းၶွၵ်ႈတီႈမိူင်းဝူႊႁၢၼ်ႉ 141 ၵေႃႉ။ လိူဝ်ၼၼ်ႉပဵၼ်ၵူၼ်းတူၵ်းၶွၵ်ႈတီႈ တၢင်ႇၸႄႈမိူင်း ၼႂ်းမိူင်းၶႄႇ။ မိူဝ်ႈသိုၼ်း ဝၼ်းတီႈ 6/5/2020 ၼၼ်ႉၵေႃႈ သူင်ႇမွပ်ႈပၼ်ယဝ်ႉ 58 ၵေႃႉ” ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်ထုၵ်ႇတီႉၺွပ်းၶင်တူဝ်ၸိူဝ်းၼၼ်ႉ ၵမ်ႈၼမ် ပဵၼ်ယွၼ်ႉတၢင်းၽိတ်း ဢမ်ႇၼႄလႆႈဝႂ်ႁပ်ႉႁွင်းၶဝ်ႈမိူင်း ၊ ၶေႃႈမုလ်းဢမ်ႇတဵမ်ထူၼ်ႈၸဵမ်ၸိူဝ်းၼႆႉ ဝႃႈၼႆ။
ဢူးတူႇရိင်ႇ သိုပ်ႇလၢတ်ႈဝႃႈ “ ၵူၼ်းတူၵ်းၶွၵ်ႈၸိူဝ်းၼႆႉ ၽႅဝ်မႃး မိူဝ်ႈဝႃး ယၢမ်းၵၢင်ၼႂ် ။ ၾၢႆႇႁဝ်း ၶႃႈၵေႃႈ လႆႈၵူတ်ႇထတ်းတူၺ်းပၼ်ပၢႆးယူႇလီၶဝ် ။ ၾင်ႇမိူင်းၶႄႇၵေႃႈ ႁဵတ်းဝႂ် ႁပ်ႉႁွင်းပၢႆးယူႇလီ ပၼ်မႃးၸွမ်း ယူႇၶႃႈ။ ၵူၼ်းတူၵ်းၶွၵ်ႈၸိူဝ်းၼၼ်ႉ လႆႈၵုမ်းတူဝ် Quarantine မႃးယဝ်ႉလီငၢမ်း” ဝႃႈၼႆ။
ယူႇတီႈတၢင်းၾင်ႇမိူင်းၶႄႇ မွပ်ႈသူင်ႇၵူၼ်းတူၵ်းၶွၵ်ႈမႃးတၢင်းၾင်ႇမိူင်းတႆးၼႆႉ လႆႈၵူတ်ႇထတ်းပၢႆးယူႇလီ လွင်ႈဝႃႈ မီးလူမ်းမႆႈၼၢဝ် ဢမ်ႇၼၢဝ် ၸိူဝ်းၼႆႉ၊ လိူဝ်သေၼၼ်ႉ ၵူတ်ႇထတ်းပႃး တၢင်းပဵၼ် HIV/ AIDS ၸွမ်းထႅင်ႈ ဝႃႈၼႆ။
ၵူၼ်းတူၵ်းၶွၵ်ႈဢၼ် မွပ်ႈသူင်ႇမႃးၼႆႉ ပဵၼ်ၵူၼ်းမိူင်းတႆး 120 ၵေႃႉ၊ လိူဝ်ၼၼ်ႉ ပဵၼ်ၵူၼ်းမိူင်းတၢင်းတိူင်းတႃႈၵုင်ႈ၊ ဝဵင်းလိူဝ်ႇ၊ ဢေႊရႃႇဝတီႊ၊ ၸႄႈၵႅင်း၊ ၸႄႈမိူင်းၶျၢင်းလႄႈ ရၶႅင်ႇ ၸိူဝ်းၼႆႉ။
ဢူးတူႇရိင်ႇ လၢတ်ႈထႅင်ႈဝႃႈ “ ၵူၼ်းမိူင်းႁဝ်းၶႃႈတႄႉ သိုပ်ႇၵုမ်းတူၺ်းတၢင်းပဵၼ်ဝႆႉပၼ်ထႅင်ႈယူႇ။ လိူဝ်ၼၼ်ႉၵေႃႈ လႆႈသွပ်ႇထၢမ်တီႈယူႇတၼ်းသဝ်းသေ ၶိုင်ပၼ်တႃႇသူင်ႇပွၵ်ႈမိူဝ်းၶိုၼ်း ယူႇ ” ဝႃႈၼႆ။
ၵူၼ်းတူၵ်းၶွၵ်ႈ ဢၼ်လုၵ်ႉတၢင်းမိူင်းဝူႊႁၢၼ်ႉမႃးၼႆႉ ပဵၼ်ဢၼ်လီမႆႈၸႂ်တႄႉ၊ ယွၼ်ႉၼၼ် ႁႂ်ႈၵူတ်ႇထတ်းပၢႆးယူႇလီ ပၼ်ၶႅမ်ႉၶႅမ်ႉ ႁႂ်ႈသူင်ႇၼမ်ႉလၢႆး၊ ဢၢင်ႇဢၢၵ်ႇ ၸိူဝ်းၼႆႉ ၵူတ်ႇထတ်းပႃးၸွမ်း ၵူၼ်းမူႇၸေႊလၢတ်ႈၼႄ ၼင်ႇၼႆ။
တၢင်းပဵၼ်ၶူဝ်ႊဝိတ်ႉ -19 ၼႆႉ တႄႇပဵၼ်တီႈမိူင်းဝူႊႁၢၼ်ႉ ၸိုင်ႈမိူင်ႈၶႄႇမႃး မိူဝ်ႈႁၢင်ပီ 2019 ၼၼ်ႉသေ တေႃႈလဵဝ် တုမ်ႉတိူဝ်ႉၼႂ်းမိူင်းႁူမ်ႈတုမ် ပတ်းပိုၼ်ႉ ႁဵတ်းႁႂ်ႈၵၢၼ်ပၢႆးမၢၵ်ႈမီး၊ ၵၢၼ်ဢွၵ်ႇၶၢဝ်းတၢင်း ၵူႈၸိူဝ်ႉၵူႈလွင်ႈ ထိုင်တီႈပေႃးလႆႈ ၵိုတ်းယင်ႉ ႁၢမ်ႈတပ်ႉဝႆႉၵေႃႈမီး ဝႃႈၼႆ။
တွၼ်ႈတႃႇ ၵူၼ်းတူၵ်းၶွၵ်ႈၸိူဝ်းၼၼ်ႉ ပေႃးတေပွၵ်ႈမိူဝ်းဢွင်ႈတီႈၽႂ်မၼ်းၼၼ်ႉ ယူႇတီႈႁွင်ႈၵၢၼ်လူင်ပွင်ၸိုင်ႈ တီႈမူႇၸေႊ၊ ၸုမ်းတူင်ႉၼိုင်မူႇၸေႊ လႄႈ ၸုမ်းပရႁိတ ၶပ်းၶိုင်တေႃႉသူင်ႇပၼ် ဝႃႈၼႆ။
ၽၵ်းတူလႅၼ်လိၼ်တႆး – ၶႄႇ တီႈမူႇၸေႊ ၸိုင်ႈတႆးပွတ်းႁွင်ႇၼႆႉ တႄႇပိၵ်ႉဢိုတ်းမႃး မိူဝ်ႈဝၼ်းတီႈ 1/4/2020 ယွၼ်ႉတၢင်းပဵၼ်ၶူဝ်ႊဝိတ်ႉ -19 ၼႆႉ ဝႃႈၼႆ။
