ႁႅင်းၵၢၼ်မိူင်းႁူမ်ႈတုမ် ဢၼ်ထုၵ်ႇၵုမ်းတူဝ် Quarantine ဝႆႉတီႈဝဵင်းလၢဝ်ႇၵၢႆး ၼႂ်းၼႃႈလိၼ်ၶိုၵ်ႉတွၼ်း ၵူဝ်းၵၢင်ႉ(ၵဝ်ႈၵၢင်ႉ) ၼၼ်ႉ တဵမ်ဝၼ်းၵုမ်းတူဝ်ယဝ်ႉလႄႈ ၸဝ်ႈၼႃႈတီႈသူင်ႇပွၵ်ႈမိူဝ်းဢွင်ႈတီႈယူႇ ၽႂ်မၼ်း မီးႁူဝ်ၵူၼ်း 300 ပၢႆ။
ၼႂ်းၸႄႈဝဵင်းလၢဝ်ႇၵၢႆး ၼၼ်ႉသုၼ်ၵုမ်းတူဝ် Quarantine Center တင်းမူတ်း မီး 8 တီႈ။ ပဵၼ်ႁႅင်းၵၢၼ်မိူင်းႁူမ်ႈတုမ် ဢၼ်လုၵ်ႉ တၢင်းမိူင်းၶႄႇသေ ပွၵ်ႈၶဝ်ႈမႃး တင်းမူတ်းမီးႁူဝ်ၵူၼ်း 840 ၵေႃႉ။ ၼႂ်းၼၼ်ႉ တႃႇ 3 ဢွင်ႈတီႈ ႁႅင်းၵၢၼ်မိူင်းႁူမ်ႈတုမ် ၵုမ်းတူဝ် တဵမ် 21 ဝၼ်းယဝ်ႉလႄႈ လႆႈသူင်ႇပွၵ်ႈၶိုၼ်းဝၢၼ်ႈၽႂ်ဝဵင်းမၼ်း တႃႇႁူဝ်ၵူၼ်း 300 ပၢႆ ဝႃႈၼႆ။
ၽူႈမီးပုၼ်ႈၽွၼ်း လူင်ပွင်ၸိုင်ႈၵေႃႉၼိုင်ႈ တီႈဝဵင်းလၢဝ်ႇၵၢႆး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ႁႅင်းၵၢၼ် ဢၼ်ပွၵ်ႈတၢင်းမိူင်းၶႄႇၶဝ်ႈမႃးသေ ထုၵ်ႇပႂ်ႉတူၺ်း Quarantine တဵမ် 21 ဝၼ်းၼၼ်ႉ မီး 358 ၵေႃႉ။ တင်းမူတ်းၼႆႉ တေသူင်ႇပွၵ်ႈမိူဝ်းဢွင်ႈတီႈၽႂ်မၼ်းမူတ်းယဝ်ႉ” ဝႃႈၼႆ။
ႁႅင်းၵၢၼ်မိူင်းႁူမ်ႈတုမ် ဢၼ်လုၵ်ႉတၢင်းမိူင်းၶႄႇ ၶဝ်ႈမႃးတၢင်းလၢဝ်ႇၵၢႆးၼႆႉ ၵမ်ႈၼမ် ပဵၼ်ၵူၼ်းတၢင်းတိူင်းမၵူၺ်း၊ တိူင်းၸႄႈၵႅင်းလႄႈ ဝဵင်းလိူဝ်ႇ ၸိူဝ်းၼႆႉ။
“ႁႅင်းၵၢၼ်ၸိူဝ်းတေပွၵ်ႈမိူဝ်းၶိုၼ်းတီႈၽႂ်မၼ်းၼၼ်ႉ ႁဝ်းၶႃႈလႆႈၵႂႃႇၵမ်ႉၸွႆႈလူႇတၢၼ်းပၼ်ငိုၼ်း ၼိုင်ႈၵေႃႉၼိုင်ႈမိုၼ်ႇပျႃး။ ၸဝ်ႈၼႃႈတီႈတေၶပ်းၶိုင်ပၼ် လုၵ်ႉတီႈ လၢဝ်ႇၵၢႆး သေတေသူင်ႇထိုင်လႃႈသဵဝ်ႈ လုၵ်ႉလႃႈသဵဝ်ႈသေ ႁႂ်ႈၶဝ်ႁၢင်ႈႁႅၼ်းပွၵ်ႈၶိုၼ်းတီႈယူႇၽႂ်မၼ်း” ၽူႈမီးပုၼ်ႈၽွၼ်းတီႈလၢဝ်ႇၵၢႆး လၢတ်ႈၼႄၼင်ႇၼႆ။
ၾၢႆႇၼိုင်ႈတၢင်းၼိုင်ႈ တၢင်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ၵေႃႈမိူၼ်ၵၼ် ႁႅင်းၵၢၼ်မိူင်းႁူမ်ႈတုမ် ဢၼ်လႆႈၵုမ်းတူဝ် Quarantine တဵမ် 21 ဝၼ်းယဝ်ႉၼၼ်ႉ လႆႈသူင်ႇပွၵ်ႈၶဝ်ႈမႃးတၢင်းၵဵင်းတုင်သေ ယူႇတီႈၶွမ်ႊမတီႊၸႄႈတွၼ်ႈၵဵင်းတုင်ၵေႃႈ ႁၢင်ႈႁႅၼ်းၶပ်းၶိုင်သူင်ႇပွၵ်ႈမိူဝ်းတီႈယူႇၽႂ်မၼ်း ဝႃႈၼႆ။
