ထဝ်ႈယိင်း ဢႃယု 87 ပီ ဢၼ်တိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ – 19 တီႈမူႇၸေႊၼၼ်ႉ ယူႇတီႈမေႃယႃၶဝ် လႆႈသူင်ႇၵူတ်ႇထတ်းတၢင်းပဵၼ်ထႅင်ႈသေ ဢွၵ်ႇမႃးၵႂၢမ်းတွပ်ႇပဵၼ် Negative ၵမ်းႁႅၵ်ႈ ဝႃႈၼႆ။

ဝၼ်းတီႈ 6/5/2020 လႆႈႁူႉဝႃႈ ၽွၼ်းၵၢၼ် (တၢင်းပဵၼ်) ဢၼ်လႆႈၵူတ်ႇထတ်းၸိူဝ်ႉမႅင်းၶူဝ်ႊဝိတ်ႉ – 19 တီႈထဝ်ႈယိင်း ဢႃယု 87 ပီ၊ ၵူၼ်းပွၵ်ႉၵၢတ်ႇ ဝဵင်းမူႇၸေႊ၊ ဢၼ်ယူတ်းယႃတူဝ်ဝႆႉတီႈႁူင်းယႃမူႇၸေႊ ၸိုင်ႈတႆးပွတ်းႁွင်ႇၼၼ်ႉ ဢွၵ်ႇမႃးၵႂၢမ်းတွပ်ႇပဵၼ် Negative ဝႆႉယဝ်ႉ ဝႃႈၼႆ။

ၸၢႆးႁိၼ်လဵၵ်း ၸုမ်းၶၢဝ်ႇထုင်ႉႁူၺ်ႈလီ မူႇၸေႊ ႁၢႆးငၢၼ်းလၢတ်ႈၼႄတီႈၽူႈတွႆႇႁွၵ်ႈဝႃႈ- “ ႁဝ်းၶႃႈ လႆႈဢုပ်ႇၵၼ် တင်းမေႃယႃ တီႈႁူင်းယႃမူႇၸေႊ သေ ယူႇတီႈမေႃယႃႁဝ်းၶႃႈလၢတ်ႈၼႄဝႃႈ ထဝ်ႈယိင်း ဢႃယု 87 ပီၼၼ်ႉ လႆႈသူင်ႇၵူတ်ႇထတ်း တၢင်းပဵၼ်ထႅင်ႈ မိူဝ်ႈဝၼ်းတီႈ 4/5/2020 ၼၼ်ႉသေ ထိုင်မႃးဝၼ်းတီႈ 6/5/2020 လႆႈႁူႉၵႂၢမ်းတွပ်ႇ ဝႃႈ ပဵၼ် Negative (ဢမ်ႇမီးၸိူဝ်ႉမႅင်း) ယဝ်ႉ” ဝႃႈၼႆ။

ဢိင်ၼိူဝ်လွင်ႈၼႆႉ ၼင်ႇႁိုဝ် ပေႃးတေမၼ်ႈၸႂ်ထႅင်ႈၼၼ်ႉ မိူဝ်ႈၼႆႉ ဝၼ်းတီႈ 7/5/2020 လႆႈသူင်ႇၵူတ်ႇ ထတ်းတၢင်းပဵၼ် ထႅင်ႈ။ သင်ဝႃႈ ၶေႃႈတွပ်ႇဢွၵ်ႇမႃးထႅင်ႈ Negative ၼႆၸိုင် တေၸၢင်ႈလႆႈလူင်းႁူင်းယႃ ပွၵ်ႈႁိူၼ်းၶိုၼ်း ဝႃႈၼႆ။

ထဝ်ႈယိင်း ဢႃယု 87 ပီၼႆႉ ယၢမ်းလဵဝ်ပၢႆးယူႇလီမၼ်းၼၢင်း ၶႅမ်ႉလႅပ်ႈ ယူႇလီယူႇၼႆသေတႃႉ မၼ်းၼၢင်းမီးတၢင်းပဵၼ်ယဵဝ်ႈဝၢၼ် ပႃးထႅင်ႈလႄႈ မေႃယႃတိုၵ်ႉၶတ်းၸႂ်တူၺ်းထိုင်လုမ်းလႃးဝႆႉ ယူႇ ၸၢႆးႁိၼ်လဵၵ်းလၢတ်ႈၼႄၼင်ႇၼႆ။

ထဝ်ႈယိင်း မူႇၸေႊၼႆႉ ႁွင်ႈၵၢၼ်ပၢႆးယူႇလီ မိူင်းႁူမ်ႈတုမ်ပိုၼ်ၽၢဝ်ႇ ၵူတ်ႇထတ်းႁၼ်ၺႃးၸိူဝ်ႉမႅင်းတၢင်းပဵၼ် မိူဝ်ႈဝၼ်းတီႈ 24/4/2020 ယၢမ်းၵၢင်ၶမ်ႈ 8 မူင်း ။မၼ်းၼၢင်းၼႆႉ ၸင်ႇႁႃၵႂႃႇဢႅဝ်ႇမိူင်းတူႊပၢႆႊ မႃးမိူဝ်ႈလိူၼ်မၢတ်ႉၶျ်ၼၼ်ႉၵူၺ်း ။ မၼ်းၼၢင်းပဵၼ်ဢႆ ၶေႃးၸဵပ်းလႄႈ ၼႅတ်ႈၵႂႃႇႁူင်းယႃ ၵူတ်ႇထတ်းတူၺ်း ၸင်ႇလႆႈႁူႉဝႃႈ ၸပ်ႉၸိူဝ်းမႅင်းတၢင်းပဵၼ်ၶူဝ်ႊဝိတ်ႉ – 19 ဝႃႈၼႆ။

တေႃႈလဵဝ် ၼႂ်းမိူင်းတႆးၼႆႉ ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ – 19 မီး 7 ၵေႃႉ။ ၼႂ်းၼၼ်ႉ ၵူၼ်းပွတ်းဢွၵ်ႇၶူင်း တႃႈၶီႈလဵၵ်း 2 ၵေႃႉ၊ မိူင်းၽျၢၵ်ႈ 1 ၵေႃႉၼိုင်ႈ ယၢမ်းလဵဝ် သူင်ႇယူတ်းယႃဝႆႉတီႈ ႁူင်းယႃလူင် ၵဵင်းတုင်။ ပွတ်းၸၢၼ်းသမ်ႉ ၵူၼ်းတူၼ်ႈတီး 2 ၵေႃႉ။ တႃႇၵေႃႉၼိုင်ႈလႆႈၶႂၢင်ႉလူင်းႁူင်းယႃယဝ်ႉ တႃႇၵေႃႉၼိုင်ႈ တိုၵ်ႉသိုပ်ႇယူတ်းယႃတူဝ်ဝႆႉတီႈႁူင်းယႃၸဝ်ႈၸၢမ်ႇထုၼ်း။ ပွတ်းႁွင်ႇ 2 ၵေႃႉ၊ တႃႇၵေႃႉၼိုင်ႈ ၵူၼ်းၵျွၵ်ႉမႄးတႄႉ လႆႈလူင်းႁူင်းယႃယဝ်ႉ။ လိူဝ်ၼၼ်ႉ ထဝ်ႈယိင်း တီႈမူႇၸေႊၼႆႉ တိုၵ်ႉယူတ်းယႃဝႆႉတီႁူင်းယႃမူႇၸေႊယူႇ ဝႃႈၼႆ။

ၼႂ်းမိူင်းႁူမ်ႈတုမ် ယၢမ်းလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႆႉ တင်းမူတ်းမီးၵႂႃႇ 162 ၵေႃႉ။ တၢႆ 6 ၵေႃႉ၊ ယႃၶႅၼ်း 50 ၵေႃႉ၊ တိုၵ်ႉယူတ်းယႃဝႆႉ 106 ၵေႃႉ။