ၸိုင်ႈတႆးပွတ်းဢွၵ်ႇၶူင်း တီႈဝဵင်းတႃႈၶီႈလဵၵ်း ၼၼ်ႉ ၸဝ်ႈၼႃႈတီႈၾၢႆႇယူႇလီ ထူပ်းႁၼ်ၵူၼ်း ဢၼ်မီးၾၢင်ႁၢင်ႈ မိူၼ်ၸပ်းတၢင်းပဵၼ် ၶူဝ်ႊဝိတ်ႉ – 19 ဝႆႉထႅင်ႈၵေႃႉၼိုင်ႈ။
ဝၼ်းတီႈ 3/5/2020 (မိူဝ်ႈဝႃးၼႆႉ) ၾၢႆႇယူႇတီႈ တီႈဝဵင်းတႃႈၶီႈလဵၵ်း ႁူပ်ႉႁၼ် ၽူႈၸၢႆးၵေႃႉၼိုင်ႈ ဢႃယု 30 ပၢႆမီးလူမ်းၼၢဝ်၊ ဢႆလႄႈ ၶေႃးၸဵပ်း၊ ဢွၵ်ႇၾၢင်ႁၢင်ႈ မိူၼ်ၵူၼ်းၸပ်း တၢင်းပဵၼ်ၶူဝ်ႊဝိတ်ႉ – 19 လႄႈ ယၢမ်းလဵဝ် ၵုမ်းၵမ်တူဝ် ပႂ်ႉတူၺ်းပၢႆးယူႇလီဝႆႉတီႈ ႁူင်းယႃလူင် ဝဵင်းတႃႈၶီႈလဵၵ်း လႅၼ်လိၼ်တႆး – ထႆးဝႆႉ ဝႃႈၼႆ။
ၻွၵ်ႊတိူဝ်ႊ သူၺ်ႇဝိၼ်း ႁူင်းယႃ ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ- “ တီႈႁူင်းယႃ ၼႆႉတႄႉ ထူပ်းႁၼ်ဝႆႉ ၵူၼ်းထၢင်ႇထိူမ်ဝႆႉ ၵေႃႉၼိုင်ႈ။ ပဵၼ်ၵူၼ်းၵႂႃႇႁဵတ်းၵၢၼ်တၢင်းမိူင်းထႆးသေ ပွၵ်ႈမႃးဢေႃႈ။ ယၢမ်းလဵဝ်တႄႉ လႆႈဢဝ် ၼမ်ႉမုၵ်ႈ၊ ၼမ်ႉလၢႆး ၸိူဝ်းၼႆႉ သူင်ႇၵူတ်ႇထတ်း တီႈတႃႈၵုင်ႈ ယဝ်ႉ”- ဝႃႈၼႆ။
ဝၼ်းတီႈ 18/4/2020 ပူၼ်ႉမႃးၼႆႉ ၶူးမေႃယႃ တင်း ၼၢင်းမေႃယႃ ဢၼ်ႁၢပ်ႇၼႃႈတီႈပုၼ်ႈ ၽွၼ်းဝႆႉ တီႈ ႁူင်းယႃ လူင် ဝဵင်းတႃႈၶီႈလဵၵ်း ၸပ်းတၢင်းပဵၼ်ၶူဝ်ႊဝိတ်ႉ 19 လႄႈ လႆႈသူင်ႇယူတ်းယႃတူဝ်တီႈ ႁူင်းယႃလူင်ဝဵင်းၵဵင်းတုင်။ ၵွပ်ႈၼၼ်ႉ ၵူၼ်းႁၢပ်ႇၵၢၼ်ၼႂ်းႁူင်းယႃ 20 ပၢႆ လႆႈထုၵ်ႇၵုမ်းတူဝ် 21 ဝၼ်း သေ ပႂ်ႉတူၺ်းပၢႆးယူႇလီ – ၵူၺ်းၵႃႈ ၾၢႆႇယူႇလီ ပိုၼ်ၽၢဝ်ႇဝႃႈ ၵူတ်ႇထတ်းပၢႆးယူႇလီယဝ်ႉ ၶဝ်ၸိူဝ်းၼႆႉ ဢမ်ႇၸပ်းတၢင်းပဵၼ်သေၵေႃႉ။
ၻွၵ်ႊတိူဝ်ႊ သူၺ်ႇဝိၼ်း သိုပ်ႇလၢတ်ႈဝႃႈ “တေႃႈလဵဝ် တီႈႁူင်းယႃတႄႉ ငဝ်းလၢႆးၶႅမ်ႉလႅပ်ႈလီ မူတ်းယဝ်ႉ။ ၵႂႃႇမႃးလႆႈၶိုၼ်း မိူၼ်ၵဝ်ႇယဝ်ႉ။ ယဝ်ႉၵေႃႈ Fever Clinic ၵေႃႈ ပိုတ်ႇပၼ်ဝႆႉထႅင်ႈ” ဝႃႈၼႆ။
တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်းမီးၵႂႃႇ 155 ၵေႃႉ၊ တၢႆ 6 ၵေႃႉ ယႃၶႅၼ်း 43 ၵေႃႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႆႉ။