ၸုမ်းတူင်ႉၼိုင်တူင်ႇဝူင်းတႆး ၼႂ်းၵဵင်းတုင် လၢႆမူႇၸုမ်း ႁူမ်ႈၵၼ်ၶွတ်ႇၽွတ်ႈ ၸုမ်းပၼ်တၢင်းႁူႉ လၢႆးႁႄႉၵင်ႈတၢင်းပဵၼ် ၶူဝ်ႊဝိတ်ႉ – 19 လႄႈ လူင်းပိုၼ်ႉတီႈၸွႆႈထႅမ်ၵူၼ်းမိူင်း ၼႂ်းၸိုင်ႈတႆး ပွတ်းဢွၵ်ႇၶူင်း။

မိူင်းတႆးပွတ်းဢွၵ်ႇၶူင်း တီႈဝဵင်းၵဵင်းတုင်ၼၼ်ႉ ယၢမ်းလဵဝ် ပႃႇတီႇၵၢၼ်မိူင်း၊ ၸုမ်းၵူၼ်းၼုမ်ႇလႄႈ ၸုမ်းတူင်ႇဝူင်းတႆး ႁူမ်ႈၵၼ် ၶွတ်ႇၽွတ်ႈၸုမ်းပၼ်တၢင်းႁူႉ ၵႅတ်ႇၵင်ႈတၢင်းပဵၼ်ၶူဝ်ႊဝိတ်ႉ-19 ။ မူၸုမ်းဢၼ်လၢႆၾၢႆႇၶဝ်ႈပႃးၼႆႉ လူင်းပိုၼ်ႉတီႈ ၸွႆႈထႅမ်ၵူၼ်းမိူင်း ၼႂ်းၸႄႈဝဵင်းၵဵင်းတုင်သေ ဢမ်ႇၵႃး လူင်းထိုင် ပႃး တၢင်း ၸႄႈဝဵင်းမိူင်းၽျၢၵ်ႈ၊ မိူင်းယွင်း ပႃးၸဵမ် ပွတ်း မိူင်းၶၢၵ်ႇ ၊ မိူင်းယၢင်းၸိူဝ်းၼႆႉ ဝႃႈၼႆ။

ၼၢင်းသီလႃး ၽူႈၵပ်းသၢၼ်လႄႈၾၢႆႇသဵၼ်ႈမၢႆ ၸုမ်းပၼ်တၢင်းႁူႉ ၸႄႈဝဵင်းၵဵင်းတုင် လၢတ်ႈတီႈ ၽူႈတွႆႇႁွၵ်ႈဝႃႈ- “ ၼႂ်းၵဵင်းတုင် 11 ႁူဝ်ႁွႆႉလႄႈ 5 ၶဵတ်ႇတႄႉ လူင်းပိုၼ်ႉတီႈၵႂႃႇမူတ်းယဝ်ႉ။ လိူဝ်ၼၼ်ႉ တၢင်းမိူင်းၶၢၵ်ႇ မိူင်းယၢင်းၵေႃႈ လူင်းပိုၼ်ႉတီႈၵႂႃႇၶႃႈယဝ်ႉ။ တေႃႈလဵဝ် ယူႇတီႈၸုမ်း ႁဝ်းၶႃႈ မီးၽႅၼ် ၵၢၼ်တေလူင်းပိုၼ်ႉတီႈၵႂႃႇတၢင်း မိူင်းၽျၢၵ်ႈ၊ မိူင်းယွင်းထႅင်ႈ၊ ယၢမ်းလဵဝ် တိုၵ်ႉၶွၼ်ႈတုမ်ငိုၼ်း တၢင်းၵိၼ် ၶူဝ်းၶွင်ၵမ်ႉၸွႆႈ ၶိူင်ႈၵမ်ႉထႅမ် ၵဵဝ်ႇလူၺ်ႈတၢင်းပဵၼ်ဝႆႉယူႇ” ဝႃႈၼႆ။

လိူဝ်သေၼၼ်ႉ ယူႇတီႈၸုမ်းပၼ်တၢင်းႁူႉ လၢႆးႁႄႉၵင်ႈတၢင်းပဵၼ်ၶူဝ်ႊဝိတ်ႉ – 19 လႄႈ ၸွႆႈထႅမ် ၵူၼ်းမိူင်း ၸိုင်ႈတႆးပွတ်းဢွၵ်ႇ ဝဵင်းၵဵင်းတုင် မီးၽႅၼ်ၵၢၼ်ႁၢင်ႈႁႅၼ်း တႃႇၸွႆႈထႅမ် ၶဝ်ႈၼမ်ႉ တၢင်းၵိၼ် ႁႅင်းၵၢၼ်မိူင်းႁူမ်ႈတုမ် ၸိူဝ်းလုၵ်ႉတၢင်းမိူင်းလႃး ပွၵ်ႈၶဝ်ႈမႃး တၢင်းၵဵင်းတုင်- ဝႃႈၼႆ။

လွင်ႈတၢင်းလႆႈၶွတ်ႇၽွတ်ႈမႃးမူႇၸုမ်းၼႆႉ ယိူင်းဢၢၼ်း ပိူဝ်ႈတႃႇလူင်းပိုၼ်ႉတီႈပၼ်တၢင်းႁူႉ ၵူၼ်းမိူင်း လွင်ႈလွၵ်းလၢႆးႁႄႉၵင်ႈတၢင်းပဵၼ်၊ ၸႅၵ်ႇဝႂ်ပိဝ် ပၼ်တၢင်းႁူႉ၊ ၸႅၵ်ႇၽႃႈတူမ်းသူပ်း၊ ၼမ်ႉလၢင်ႉမိုဝ်း၊ ပၼ်ႁႅင်းၸႂ် ၵူၼ်းပိုၼ်ႉတီႈ၊ ၸွႆႈထႅမ်လွင်ႈၵိၼ်ယႅမ်ႉ။ လၢတ်ႈၼႄပႃးလွင်ႈ ပေႃးထူပ်းႁၼ် ၵူၼ်းထၢင်ႇထိူမ်ငမ်းငဝ်းၼႆ တေလႆႈၵပ်းသိုပ်ႇ ႁွင်ႈၵၢၼ်ပၢႆးယူႇလီၸိူင်ႉႁိုဝ် ၸဵမ်ၸိူဝ်းၼႆႉ။

ထိုင်မႃး ဝၼ်းတီႈ 4/5/2020 ၼႆႉ ၼႂ်းမိူင်းႁူမ်ႈတုမ် ၵူၼ်းမိူင်းၸပ်းတၢင်းပဵၼ် တင်းမူတ်းမီး 155 ၵေႃႉ၊ တၢႆ 6 ၵေႃႉ၊ ယႃၶႅၼ်း 106 ၵေႃႉ။ ၼႂ်းၼၼ်ႉ ပႃးၵူၼ်းမိူင်းတႆး 7 ၵေႃႉ၊ ပွတ်းႁွင်ႇ 2 ၵေႃႉ၊ ၵျွၵ်ႉမႄး 1 ၵေႃႉ (လူင်းႁူင်းယႃယဝ်ႉ)၊ ပွတ်းၸၢၼ်း 2 ၵေႃႉလႄႈ ပွတ်းဢွၵ်ႇၶူင်း 3 ၵေႃႉ ယူႇတီႈႁွင်ႈၵၢၼ်ပၢႆး ယူႇလီလႄႈ ၾၢႆႇလဵၼ်ႈႁႅင်းပိုၼ်ၽၢဝ်ႇဢွၵ်ႇဝႆႉ။