ၸုမ်းတူင်ႇဝူင်းတႆးဢိၵ်ႇ ဝတ်ႉၵူႇတဝ်ႈ ၸွႆႈထႅမ်ၶူဝ်းၶွင်ၵိၼ်ယႅမ်ႉ ႁႅင်းၵၢၼ်ယၢၼ်မိူင်း

ၸုမ်းတူင်ႇဝူင်းတႆးလႄႈ ၸုမ်းၸွႆႈထႅမ်ႁႅင်းၵၢၼ် လူင်းပိုၼ်ႉတီႈၸွႆႈထႅမ် ၶဝ်ႈၼမ်ႉတၢင်းၵိၼ် ၶူဝ်းၶွင်ႁႅင်ႈ ပၼ်ႁႅင်းၵၢၼ်ယၢၼ်မိူင်း ၸိူဝ်းထူပ်းၵိၼ်းယၢပ်ႇၽိုတ်ႇလိူဝ်ႁႅင်း ၼႂ်းမိူင်းထႆး။

ဝၼ်းတီႈ 3/5/2020 ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ၊ သမႃႊၶူမ်ႊပၢႆးပၺ်ႇၺႃႇလႄႈ ၾိင်ႈငႄႈတႆး ဢိၵ်ႇလူၺ်ႈပႃး တၢင်းဝတ်ႉၵူႇတဝ်ႈ ႁူမ်ႈၵၼ်လူင်းပိုၼ်ႉတီႈၸွႆႈထႅမ်ပီႈၼွင်ႉတႆး ႁႅင်းၵၢၼ်ယၢၼ်မိူင်း ၸွမ်းပိုၼ်ႉတီႈတူင်ႇတၢင်ႇ ၼႂ်းၸႄႈဝဵင်းၵဵင်းမႆႇ (ၸိုင်ႈထႆး) ၸိူဝ်းႁူပ်ႉလွင်ႈယၢပ်ႇၽိုတ်ႇၵိၼ်းၸႂ် ၽွင်းၶၢဝ်းတၢင်းပဵၼ်ၶူဝ်ႊဝိတ်ႉ-19 လၢမ်းၽႄႈယူႇၼႆႉ။

ၸၢႆးသႅင်ယ ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ- “ႁဝ်းၶႃႈလႆႈ လူင်းပိုၼ်ႉတီႈၵႂႃႇၸွႆႈထႅမ်ႁႅင်းၵၢၼ်ယၢၼ်မိူင်း တၢင်းတူင်ႇတၢင်ႇသမိူင်း ႁၢင်ၻူင်း၊ ဝေႃႇသၢင်ႈ လႄႈ ၽၵ်းတူၵဵင်းမႆႇ တႃႇ 25 မုင်ႉႁေႃႁိူၼ်း (ၶွပ်ႈၶူဝ်း)။ တွၼ်ႈတႃႇ ႁႅင်းၵၢၼ်ယၢၼ်မိူင်း ၸိူဝ်းတူၵ်းၵၢၼ်တူၵ်းငၢၼ်း ယၢပ်ႇၽိုတ်ႇလိူဝ်ႁႅင်း ဢမ်ႇလႆႈႁဵတ်းၵၢၼ်ၵၼ်မႃးၸိူဝ်းၼၼ်ႉ”- ဝႃႈၼႆ။

ဢိင်ၼိူဝ်တၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈႁၢဝ်ႈႁႅင်းသေ တုမ်ႉတိူဝ်ႉၵၢၼ်ပၢႆးမၢၵ်ႇမီး ၵူၼ်းမိူင်းထႆး ၵူၺ်းဢမ်ႇၵႃး တုမ်ႉတိူဝ်ႉပႃးႁႅင်းၵၢၼ်ယၢၼ်မိူင်း ၸိူဝ်းၶဝ်ႈႁဵတ်းၵၢၼ်ၼႂ်းမိူင်းထႆး ဢမ်ႇလႆႈႁဵတ်းၵၢၼ် တူၵ်းၵၢၼ်တူၵ်းငၢၼ်းၵၼ်၊ မၢင်ၵေႃႉထိုင်တီႈ ဢမ်ႇမီးၶဝ်ႈၵိၼ်၊ ဢမ်ႇမီးငိုၼ်းၸႂ်ႉၸၢႆႇ ၸဵမ်ၸိူဝ်းၼႆႉၵေႃႈမီး။

ထွင်းၶမ်း ၽူႈၸွႆႈထႅမ်ႁႅင်းၵၢၼ်ယၢၼ်မိူင်း မူလၼိထိ MAP ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ- “ယွၼ်ႉဝႃႈ မႅၼ်ႈၽွင်းၶၢဝ်း တေႃႇဝတ်းဝႂ်ၵၼ်ယဝ်ႉၵႂႃႇသေ ငိုၼ်းၵဵပ်းၵေႃႈဢမ်ႇလႆႈၵဵပ်းၵၼ်၊ သမ်ႉမႃးၺႃးတၢင်းပဵၼ်ၶူဝ်ႊဝိတ်ႉၼႆႉထႅင်ႈ၊ လႆႈလိုဝ်ႈၵၢၼ်ငၢၼ်းၵၼ်တၢင်းႁိုင်သေ တႃႇတေၵိၼ်ယႅမ်ႉၵေႃႈဢမ်ႇ ၶႂ်ႈမီးငိုၼ်းၵၼ်ယဝ်ႉ၊ ၵႃႈႁွင်ႈ ၵႃႈၼမ်ႉ ၵႃႈၾႆးၸိူဝ်းၼႆႉ သမ်ႉလႆႈၸၢႆႇၵၼ်ယူႇၵူႈလိူၼ်လိူၼ်လႄႈ ၼႆႉပဵၼ်လွင်ႈယၢပ်ႇၽိုတ်ႇပီႈၼွင်ႉႁႅင်းၵၢၼ် ႁဝ်းၶႃႈတႄႉတႄႉယဝ်ႉ” -ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ႁႅင်းၵၢၼ် ၸိူဝ်းတူၵ်းၵၢၼ်ငၢၼ်း ၵမ်ႈၼမ် ပဵၼ်ၵူၼ်းႁဵတ်းၵၢၼ်ၼႂ်းႁၢၼ်ႉၶၢႆ ၶဝ်ႈၽၵ်း၊ ႁၢၼ်ႉၶၢႆၶူဝ်းၶွင်၊ မႄႈဝၢၼ်ႈၼႂ်းၶွမ်ႊပၼီႊ၊ ၼႂ်းႁၢၼ်ႉလူင်၊ ႁၢၼ်ႉၵႅတ်းၶူၼ်ႁူဝ် (ႁၢၼ်ႉႁဵတ်းႁၢင်ႈ)၊ ၵၢၼ်ၵေႃႇသၢင်ႈ၊ ၵၢၼ်သူၼ်၊ ႁူင်းႁႅမ်းလႄႈႁူင်းၵၢၼ် ၸိူဝ်းၼႆႉ။

ထိုင်မႃး ဝၼ်းတီႈ 3/5/2020 ၼႆႉ ၼႂ်းၸႄႈတွၼ်ႈၵဵင်းမႆႇ ၵူၼ်းၸပ်းတၢင်းပဵၼ်မီးၵႂႃႇ 40 ၵေႃႉ၊ တၢႆ 1 ၵေႃႉ၊ ယႃၶႅၼ်း 38 ၵေႃႉလႄႈ တိုၵ်ႉယူတ်းယႃ ယူႇတီႈႁူင်းယႃ 1 ၵေႃႉ။ လိူဝ်ၼၼ်ႉ ဝၼ်းတီႈ 4/5/2020 ယၢမ်းၵၢင်ဝၼ်း 11 မူင်းၶိုင်ႈ ၵူၼ်းပဵၼ်မီး 2,987 ၵေႃႉ၊ တၢႆ 54 ၵေႃႉလႄႈ ယႃၶႅၼ်း 2,740 ၵေႃႉ လူင်ပွင်ၸိုင်ႈမိူင်းထႆး ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ႁႅင်းၵၢၼ်ၸိူဝ်းၶဝ်ႈႁဵတ်းၵၢၼ်ၼႂ်းၵဵင်းမႆႇၼၼ်ႉ တင်းမူတ်းမီး 86,000 ပၢႆ။ ၵမ်ႈၼမ် ပဵၼ်ၵူၼ်းႁႅင်းၵၢၼ်ယၢၼ်မိူင်း ၼႂ်းမိူင်းႁူမ်ႈတုမ် ၸႄႈမိူင်းတႆးၵမ်ႈၼမ် ၽူႈၸွႆႈထႅမ်တေႃႇဝတ်းဝႂ် ပၼ်ႁႅင်းၵၢၼ်ယၢၼ်မိူင်း တီႈၵဵင်းမႆႇ ၵေႃႉၼိုင်ႈလၢတ်ႈၼႄၼင်ႇၼႆ။