ၵေႃလိၵ်ႈလၢႆး သမႃႊၶူမ်ႊ ဝတ်ႉၵူႇတဝ်ႈ လူင်းၸွႆႈထႅမ်ပီႈၼွင်ႉတႆး ထူပ်းၵိၼ်းၼႂ်းၵဵင်းမႂ်ႇ

ၸဝ်ႈၶူးၿႃးပရႃႊၽတ်းၸၼ်တရင်းသီ ဝတ်ႉၵူႇတဝ်ႈ ႁူမ်ႈပႃး ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇ ဢိၵ်ႇတင်း သမႃႊၶူမ်ႊပၢႆးပၺ်ၺႃလႄႈၾိင်ႈငႄႈတႆး လူင်းပိုၼ်ႉတီႈၸွႆႈထႅမ် ပီႈၼွင်ႉတႆးႁႅင်းၵၢၼ် ယၢၼ်မိူင်း ၸိူဝ်းတူၵ်းၵၢၼ်တူၵ်းငၢၼ်း ႁူပ်ႉလွင်ႈယၢပ်ႇၽိုတ်ႇၵိၼ်းၸႂ် ၽွင်းၶၢဝ်းတၢင်းပဵၼ်ၶူဝ်ႊဝိတ်ႉ – 19 လၢမ်းၽႄႈႁၢဝ်ႈႁႅင်းယူႇၼႆႉ ဝႃႈၼႆ။

ဝၼ်းတီႈ 1/5/2020 ဝတ်ႉၵူႇတဝ်ႈ ၵဵင်းမႆႇ ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇ ဢိၵ်ႇပႃး သမႃႊၶူမ်ႊ ပၢႆးပၺ်ၺႃလႄႈၾိင်ႈငႄႈတႆး ႁူမ်ႈၵၼ်လူင်းပိုၼ်ႉတီႈ ၸႅၵ်ႇၸၢႆႇၸွႆႈထႅမ်ႁႅင်းၵၢၼ် ၸိူဝ်းတူၵ်းၵၢၼ်ငၢၼ်း ႁူပ်ႉလွင်ႈယၢပ်ႇၽိုတ်ႇ ၼႂ်းတူင်ႇတၢင်ႇဝဵင်းၵဵင်းမႂ်ႇ ၸိုင်ႈထႆး တႃႇ 169 ၶွပ်ႈၶူဝ်း(မုင်ႉႁေႃႁိူၼ်း) ပၢႆ – ဝႃႈၼႆ။

ၸၢႆးသႅင်ယ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႂ်ႇ လၢတ်ႈတီႈၽူႈတွႆႇႁွၵ်ႈဝႃႈ “ဢၼ်လႆႈလူင်း ပိုၼ်ႉတီႈ ၵႂႃႇၸွႆႈႁႅင်းၵၢၼ်ယၢၼ်မိူင်းႁဝ်းၶႃႈတႄႉ တင်းမူတ်း တႃႇၶွပ်ႈၶူဝ်း 160 ပၢႆ ပဵၼ်ႁႅင်းၵၢၼ် ပီႈၼွင်ႉတႆး ၸိူဝ်းတူၵ်းၵၢၼ်/ငၢၼ်း ဢမ်ႇလႆႈႁဵတ်းၵၢၼ်ၵၼ်မႃး မီးၶၢဝ်းတၢင်း လိူၼ်သွင်လိူၼ်ၸိူဝ်းၼႆႉ” ဝႃႈၼႆ။

ယွၼ်ႉတၢင်းပဵၼ်ၶူဝ်ႊဝိတ်ႉ-19 လၢမ်းၽႄႈႁၢဝ်ႈႁႅင်းလႄႈတုမ်ႉတိူဝ်ႉၵၢၼ်ပၢႆးမၢၵ်ႈမီး ၵူၼ်းမိူင်းထႆး တင်းၼမ် တင်းလၢႆ။ ယွၼ်ႉၼၼ် ႁႅင်းၵၢၼ်ယၢၼ်မိူင်းၸိူဝ်းၶဝ်ႈႁဵတ်းၵၢၼ်တၢင်းမိူင်းထႆးၸိူဝ်းၼၼ်ႉၵေႃႈ ႁူပ်ႉလွင်ႈယၢပ်ႇၽိုတ်ႇ တူၵ်းၵၢၼ်/ ငၢၼ်း ၵၢၼ်တင်းၼမ်။

ၸိူင်ႉႁိုဝ်ၵေႃႈလီ တၢင်းဝတ်ႉၵူႇတဝ်ႈ၊ ၵေႃလိၵ်ႈလၢႆးလႄႈ သမႃႊၶူမ်ႊပၢႆးပၺ်ၺႃ ႁူမ်ႈၶွၼ်ႈၶူဝ်းၶွင် ၶဝ်ႈၼမ်ႉတၢင်းၵိၼ် ၶွင်ႁႅင်ႈ ၸိူင်ႉၼင်ႇ ၶဝ်ႈသၢၼ် ၼမ်ႉမၼ်း ၶႆႇၵႆႇ ၶဝ်ႈသွႆးႁႅင်ႈ ၽိတ်ႉၵိူဝ်ထူဝ်ႇၼဝ်ႈၶႅပ်း ဢီႇမဵတ်ႈႁႅင်ႈ ၶဝ်ႈမုၼ်းၶဝ်ႈပွင်း ၼူမ်းၵွင်ႇ ၼမ်ႉသူမ်ႈၼမ်ႉဝၢၼ် ၸိူဝ်းၼႆႉ ဢဝ်လူင်းၵႂႃႇၸႅၵ်ႇယိုၼ်ႈ ၸွႆႈထႅမ် ပၼ်ပီႈၼွင်ႉတႆး ၸွမ်းၼႂ်းပိုၼ်ႉတီႈယူႇသဝ်းပီႈၼွင်ႉတႆးၼႂ်းတူင်ႇဝဵင်းၵဵင်းမႂ်ႇ။

ၸၢႆးသႅင်ယ သိုပ်ႇလၢတ်ႈဝႃႈ “ၶူဝ်းၶွင်ဢၼ်ႁဝ်းၶႃႈ လူင်းၸႅၵ်ႇၸွႆႈပၼ်ႁႅင်းၵၢၼ်ႁဝ်းၶႃႈတႄႉ လိူဝ်သေၸဝ်ႈသတ်ႉထႃးလူင်ႁဝ်း ၸဝ်ႈၶူးၿႃးပရႃႊၽတ်းၸၼ်တရင်းသီ ၸဝ်ႈၵွၼ်းဝတ်ႉၵူႇတဝ်ႈ (ၸဝ်ႈၽူႈ ၵွၼ်းၸႄႈဝဵင်းၵဵင်းမႂ်ႇ)လႄႈ သမႃႊၶူမ်ႊပၢႆးပၺ်ၺႃလႄႈၾိင်ႈငႄႈတႆး ဢိၵ်ႇတင်းၵေႃလိၵ်ႈလၢႆး လႄႈၾိင်ႈငႄႈတႆးၵဵင်းမႂ်ႇယဝ်ႉယင်းမီးပီႈၼွင်ႉၽူႈမီးၸႂ်သတ်ႉထႃးလၢႆတီႈလၢႆတၢင်းၵမ်ႉၸွႆႈႁွမ်းမႃးမိူၼ်ၼင်ႇ ပီႈၼွင်ႉတၢင်းဝၢၼ်ႈမႂ်ႇမွၵ်ႇၸၢမ်၊ မႄႈဢၢႆး၊ တႃႈတွၼ်း၊ မိူင်းၾၢင်လႄႈၼႂ်းၵဵင်းမႂ်ႇၸိူဝ်းၼႆႉတင်း ႁႅင်းတူဝ်ၸႂ် ငိုၼ်းတွင်းလၢႆတီႈလၢႆတၢင်းယူႇ။

လိူဝ်ၼၼ်ႉ ယင်းမီးၸဝ်ႈၸႂ်ၿုၼ်ၸႂ်ထမ်းလၢႆၸဝ်ႈ ႁွမ်းၸွႆႈမႃး ၶဝ်ႈသၢၼ် ၼမ်ႉမၼ်း ၶႆႇၵႆႇ ယဝ်ႉၵေႃႈ တီႈဝတ်ႉၵူႇတဝ်ႈ၊ ၵေႃလိၵ်ႈလၢႆးလႄႈ သမႃႊၶူမ်ႊ ၸိူဝ်းၼႆႉ။ မိူဝ်ႈဝၼ်းတီႈ 30/4/2020 ၼၼ်ႉၵေႃႈ ယူႇတီႈ ႁႅင်းၵၢၼ် ၶဝ်ႈမႃးႁပ်ႉဢဝ်တၢင်းၸွႆႈထႅမ် တီႈၵေႃလိၵ်ႈလၢႆးႁဝ်းၶႃႈၵေႃႈမီးၵႂႃႇ 113 ၶွပ်ႈၶူဝ်း” ဝႃႈၼႆ။

ယွၼ်ႉၼၼ်လႄႈ တွၼ်ႈတႃႇ တေသိုပ်ႇၵမ်ႉၸွႆႈပၼ်ႁႅင်းၵၢၼ်ယၢၼ်မိူင်း ၸိူဝ်းတူၵ်းၵၢၼ်/ ငၢၼ်း ၵၼ်မႃး ၶၢဝ်းတၢင်းလိူၼ် သွင်လိူၼ်မႃးၼႆႉ ၾၢႆႇၼိုင်ႈၵေႃႈတၢင်း ၵေႃလိၵ်ႈလၢႆး၊ သမႃႊၶူမ်ႊလႄႈဝတ်ႉၵူႇတဝ်ႈ တေၶတ်းၸႂ်ႁႃၸဝ်ႈတႃႇၼ မႃးၵမ်ႉၸွႆႈ ၾၢႆႇၼိုင်ႈၵေႃႈ တေၶတ်းၸႂ်ႁႃတၢင်းလူင်းၸွႆႈထႅမ်ပၼ် ပီႈၼွင်ႉတႆးႁဝ်း ၵႂႃႇထႅင်ႈၸွမ်းၼင်ႇဢၼ်ႁဝ်းယိုၼ်းမိုဝ်းၶိုတ်းလႆႈၸိူဝ်းၼၼ်ႉယူႇ။

မိူဝ်ႈလဵဝ် ၶူဝ်းၶွင်ႁဝ်းၶႃႈၸႅၵ်ႇၵႂႃႇမိူဝ်ႈဝၼ်းတီႈ 30/04/2020-01/05/2020 ၼၼ်ႉ သုတ်းယဝ်ႉၵႂႃႇ 2 ၸုပ်ႈယဝ်ႉလႄႈ ဢၼ်ႁႅင်းၵၢၼ်ႁဝ်းလႆႈမႃးပၼ်သဵၼ်ႈသၢႆမၢႆဝႆႉၸိူဝ်းၼၼ်ႉ ႁဝ်းၶႃႈ တေၶတ်းၸႂ် ၸႅင်ႈပွင်ႇ ပၼ်ၶိုၼ်းယူႇ -ဝႃႈတေၸၢင်ႈလူင်းမႃးၸွႆႈထႅမ်လႆႈမိူဝ်ႈလႂ်ၼႆဢေႃႈ -ယွၼ်းၶေႃၶၢဝ်းယၢမ်းထႅင်ႈဢိတ်းၼိုင်ႈဢေႃႈ ပေႃးႁဝ်းၶႃႈၵဵပ်းႁွမ်လႆႈၶူဝ်းၶွင်ယဝ်ႉၸိုင်တေသိုပ်ႇလူင်းပိုၼ်ႉတီႈယူႇဢေႃႈ။

ၸိူင်ႉႁိုဝ်ၵေႃႈလီ သင်ဝႃႈၽူႈၸိူဝ်းၶႅၼ်းၸႂ် ၽူႈမီးၸႂ်သတ်ႉထႃးႁဝ်းၶဝ် ၶႂ်ႈၸွႆႈထႅမ်ပီႈၼွင်ႉတႆးႁဝ်း ဢၼ်တူၵ်းယၢၵ်ႈ တူၵ်း ၵိၼ်းယူႇၼႆၸိုင် ၶႅၼ်းတေႃႈတိတ်းတေႃႇမႃးတီႈႁွင်ႈၵၢၼ်ၵေႃလိၵ်ႈလၢႆး လႄႈၾိင်ႈငႄႈတႆးၵဵင်းမႂ်ႇ ၼႂ်းဝတ်ႉၵူႇတဝ်ႈလႆႈယူႇဢေႃႈ။

မၢႆၾူၼ်း 081-796-0123
မၢႆယေးငိုၼ်း
ชื่อบัญชี นางแสงระวี เทียล และ /หรือ นายชัยยะ คงชื่น และ /หรือ นายล้อมวงค์ ปันอิน
หมายเลขบัญชี 404-703617-1
ธนาคารไทยพาณิชย์
ၵေႃလိၵ်ႈလၢႆး လႄႈ ၾိင်ႈငႄႈတႆး ၵဵင်းမႂ်ႇ