ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ် လူႉတၢႆထႅင်ႈ ၼိုင်ႈၵေႃႉ တေႃႈလဵဝ် မီးၵူၼ်းၸပ်းၸိူဝ်ႉမႅင်းသေ လူႉ တၢႆၵႂႃႇယဝ်ႉ 6 ၵေႃႉ။

ဝၼ်းတီႈ 29/4/2020 ယၢမ်းၵၢင်ဝၼ်း 11 မူင်း ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ – 19 ၵေႃႉထူၼ်ႈ 110 ၽူႈၸၢႆး ဢႃယု 63 ပီ ဢၼ်ယူတ်းယႃတူဝ်ယူႇဝႆႉတီႈႁူင်းယႃ တွင်ႇဢူၵ်ႉၵလႃႇ ဝဵင်းတႃႈၵုင်ႈၼၼ်ႉ လႆႈလူႉတၢႆၵႂႃႇယဝ်ႉ ယူႇတီႈႁွင်ႈၵၢၼ် ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇ ဢွၵ်ႇဝႆႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉဝႃႈ ၾၢႆႇယူႇလီပိုၼ်ၽၢဝ်ႇပဵၼ်တၢင်းၵၢၼ်ဝႃႈ “မၼ်းၸၢႆးၸပ်းတၢင်းပဵၼ်ၶူဝ်ႊဝိတ်ႉ – 19 မိူဝ်ႈဝၼ်းတီႈ 19 လိူၼ်ဢေႊပရိူဝ်ႊ ။ ၵူၺ်းၵႃႈမၼ်းၸၢႆးၼႆႉ ၸဵမ်ပိုင်း မီးတၢင်းပဵၼ် လိူတ်ႈသုင်လႄႈ ယဵဝ်ႈဝၢၼ်ဝႆႉ” ဝႃႈ ၼႆ။

ထိုင်မႃး ဝၼ်းတီႈ 24/4/2020 သမ်ႉ တၢင်းပဵၼ်မၼ်းၸၢႆး ႁၢဝ်ႈႁႅင်းသေ ထိုင်မႃးဝၼ်းတီႈ 29 ယၢမ်းၵၢင်ဝၼ်းၵေႃႈ မၼ်း ၸၢႆးလႆႈလူႉတၢႆၵႂႃႇ ဝႃႈၼႆ။

ယူႇတီႈႁွင်ႈၵၢၼ်ပၢႆးယူႇလီလႄႈၾၢႆႇလဵၼ်ႈႁႅင်းပိုၼ်ၽၢဝ်ႇထႅင်ႈဝႃႈ “ ၽွင်းမၼ်းၸၢႆးတၢႆၵႂႃႇၼႆႉ လႆႈႁၼ်တၢင်းပဵၼ်ပွတ်ႇၵႂ်ႈ၊ လွတ်ႇလူမ်း ထူၺ်ႈၸႂ်လူႉၵွႆ၊ ၸိူဝ်ႉမႅင်းပႅၵ်ႇထီးရီးယႃး ၶဝ်ႈလွတ်ႇလူမ်းထူၺ်ႈၸႂ်လႄႈ တႂ်လႅဝ် ၸိူဝ်းၼႆႉ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈၽူႈမီးပုၼ်ႈၽွၼ်း တီႈႁူင်းယႃ ၸႅင်ႈၸူး ၸိူဝ်ႉၶိူဝ်းပီႈၼွင်ႉမၼ်းၸၢႆးသေ ထိုင်မႃးယၢမ်းဝၢႆး ဝၼ်း ဝၼ်းတီႈ 29 မိူဝ်ႈဝႃးၼႆႉ လႆႈပူၼ်ႉၶၢပ်ႈတူဝ် ၵမ်းလဵဝ်ယဝ်ႉ ဝႃႈၼႆ။

တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 တင်းမူတ်း မီးၵႂႃႇ 150 ၵေႃႉ၊ လူႉတၢႆ 6 ၵေႃႉ၊ ယႃ ၶႅၼ်း 27 ၵေႃႉ၊ တိုၵ်ႉယူတ်းယႃဝႆႉ 117 ၵေႃႉ ၼႆယဝ်ႉ။

လိူဝ်ၼၼ်ႉ ၼႂ်းမိူင်းတႆးသမ်ႉ ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ – 19 ၼႆႉသမ်ႉ တင်းမူတ်းမီး 7 ၵေႃႉ။ ပွတ်းႁွင်ႇ 2 ၵေႃႉ၊ ပွတ်းၸၢၼ်း 2 ၵေႃႉ တႃႇၵေႃႉၼိုင်ႈ လူင်းႁူင်းယႃယဝ်ႉ၊ ပွတ်းဢွၵ်ႇၶူင်း 3 ၵေႃႉ ဝႃႈၼႆ။