ၽူႈၸၢႆး ဢႃယု 48 ပီ ၵေႃႉၼိုင်ႈ ၸူမ်ၼမ်ႉတဵင်းတၢႆ တီႈဝဵင်းလၢင်းၶိူဝ်း ၸိုင်ႈတႆးပွတ်းၸၢၼ်း။

ဝၼ်းတီႈ 29/4/2020 ယၢမ်းၵၢင်ၼႂ် မွၵ်ႈ 8 မူင်းပၢႆၼႆႉ ပလိၵ်ႈလႄႈၸုမ်းၶၢႆႇၶႃပႄလႅင် ဝဵင်းလၢင်းၶိူဝ်း လႆႈၵႂႃႇၸွႆႈ ဢဝ်တူဝ် တၢႆ ၽူႈၸၢႆးဢႃယု 48 ပီ ၶၢင်ႉၶမ်ဝႆႉတီႈ လၵ်းမၢႆႈလူင်ၼႂ်းၼမ်ႉတဵင်း တိုဝ်ႉပွၵ်ႉၼမ်ႉဝၢၼ်ႈတႂ်ႈ ဝဵင်းလၢင်းၶိူဝ်းၼၼ်ႉ ဢွၵ်ႇမႃး။

ၸၢႆးတဵင်းၸေႃႇဢူး ၸုမ်းၶၢႆႇၶႃပႄလႅင် ၸႄႈဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၸုမ်းႁဝ်းၶႃႈသေ ယဝ်ႉၵေႃႈ ပလိၵ်ႈသေ ႁူမ်ႈၵၼ်ၵႂႃႇဢဝ်ဢွၵ်ႇမႃးၶႃႈ မၼ်းၸၢႆးလွင်ႈၸူမ်ၸွမ်းၼမ်ႉတဵင်းသေ တၢႆၶၢင်ႉဝႆႉတီႈလၵ်းမၢႆႈလူင် ဢၼ် တပ်ႉၼမ်ႉတႃႇ ပၼ်ႇၵူင်းၼမ်ႉၼၼ်ႉ ၶႃႈဢေႃႈ” ဝႃႈၼႆ။

တေႃႈလဵဝ် တူဝ်တၢႆမၼ်းၸၢႆးၼႆႉ လႆႈတေႃႉၵႂႃႇဝႆႉတီႈႁူင်းယႃလၢင်းၶိူဝ်းသေ တိုၵ်ႉၵူတ်ႇထတ်းတူၺ်းလွင်ႈတၢင်း ပဵၼ်မၼ်း ၸၢႆးယူႇ ဝႃႈၼႆ။

ၸၢႆးတဵင်းၸေႃႇဢူး သိုပ်ႇလၢတ်ႈဝႃႈ “ ပလိၵ်ႈလၢမ်းၶၢတ်ႈဝႃႈ မၼ်းၸၢႆးမဝ်းလဝ်ႈသေ ၸူမ်ၼမ်တၢႆ ဝႃႈၼႆ။ ၵူၺ်းၵႃႈ တေႃႈလဵဝ် ယူႇတီႈပလိၵ်ႈၶဝ် တိုၵ်ႉထတ်းတူၺ်းလွင်ႈတၢင်းမၼ်းလီလီယူႇ။ သင်ဝႃႈ ၵူတ်ႇထတ်းယဝ်ႉၸိုင် တေပူၼ်ႉ တူဝ် တၢႆ ၵမ်းလဵဝ်ၶႃႈ ။ ယွၼ်ႉဝႃႈ တီႈလၢင်းၶိူဝ်း ႁဝ်းၶႃႈၼႆႉ ယၢမ်းလဵဝ် ၽႂ်တၢႆၵေႃႈယဝ်ႉ တေဢမ်ႇဝႆႉႁိုင်ၶႃႈ။ ယဝ်ႉၵေႃႈ မီးမၢႆမီႈတေဢမ်ႇလႆႈၶွၼ်ႈတုမ် ႁႃႈၵေႃႉၶိုၼ်ႈ ၼိူဝ်ၼႆၶႃႈဢေႃႈ” ဝႃႈၼႆ။

ၽူႈၸၢႆး ဢၼ်လွင်ႈၸူမ်ၼမ်ႉတဵင်းတၢႆၼႆႉ ၸိုဝ်ႈႁွင်ႉ ၸၢႆးပဝ်း ဢႃယု 48 ပီ ။ ၵူၼ်းဝၢၼ်ႈလူင်ပွၵ်ႉဢွၵ်ႇဝဵင်းလၢင်းၶိူဝ်း လၢတ်ႈဝႃႈ မိူဝ်ႈဝႃးယၢမ်းၵၢင်ဝၼ်း ႁၼ်မၼ်းၸၢႆးၵႂႃႇမီးၸွမ်းၾင်ႇၼမ်ႉတဵင်း ၵိၼ်လဝ်ႈၸွမ်းဢူၺ်းၵေႃႉမၼ်းယူႇ။

“လႆႈငိၼ်းတီႈၵေႃႉပဵၼ်မေးမၼ်းၸၢႆးလၢတ်ႈၼႄတႄႉ မိူဝ်ႈဝႃး 28/4/2020 ယၢမ်းဝၢႆးဝၼ်းမွၵ်ႈ 3 မူင်းၼၼ်ႉ မၼ်းၸၢႆး ၵႂႃႇ ၵိၼ်လဝ်ႈ။ မိူဝ်ႈႁဝ်းၶႃႈ လႆႈထူပ်းႁၼ် တူဝ်တၢႆ မၼ်းၸၢႆးၼၼ်ႉၼႂ်းမိုဝ်းမၼ်းၾၢႆႇၶႂႃ တိုၵ်ႉယိပ်းၾူၼ်းဝႆႉယူႇ၊ ၶႅပ်းတိၼ် ၵေႃႈမၼ်းၸၢႆးတိုဝ်းဝႆႉယူႇ၊ သေႃးရူတ်ႉမၼ်းၸၢႆးၵေႃႈ မီးၼႂ်းမိုဝ်းမၼ်းယူႇ။ သိူဝ်ႈၶူဝ်းၵေႃႈ ၸပ်းတူဝ်ဝႆႉယူႇ ဢၼ်ဢမ်ႇၸပ်းတူဝ်မၼ်းမႃးတႄႉ တေမီးၽႃႈတူင်ႇၼၼ်ႉၵူၺ်း” ၸၢႆးတဵင်းၸေႃႇဢူး လၢတ်ႈၼႄၼင်ႇၼႆ။

ၸၢႆးပဝ်းၼႆႉ ပဵၼ်ၵူၼ်းသႅၼ်ဝီ။ မႃးတႄႇၼႃႈႁိူၼ်းၵိုၵ်းၼၢင်းၼူၺ်ႇ ၵူၼ်းလၢင်းၶိူဝ်း။ မီးလုၵ်ႈႁူမ်ႈၵၼ် 2 ၵေႃႉ။