ၼၢင်းယိင်း ဢႃယု မွၵ်ႈ 50 ၵူၼ်းပဵၼ်ထၢင်ႇထိူမ်ပႂ်ႉတူၺ်းတၢင်းပဵၼ်ၶူဝ်ႊဝိတ်ႉ-19 တီႈႁူင်းယႃလူင် ၸဝ်ႈၸၢမ်ႇထုၼ်း ဝဵင်းတူၼ်ႈတီး လူႉတၢႆ ၽွင်းတိုၵ်ႉသူင်ႇၵူတ်ႇထတ်းတၢင်းပဵၼ်ဝႆႉပႆႇႁူႉၶေႃႈတွပ်ႇ ဝႃႈၼႆ။

ဝၼ်းတီႈ 28/4/2020 ယၢမ်းၵၢင်ၼႂ် မွၵ်ႈ 10 မူင်းၶိုင်ႈ ၼၢင်းယိင်း ဢႃယု မွၵ်ႈ 50 ပဵၼ်ၵူၼ်းဢိၼ်းတေႃႇ ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း ပဵၼ်တၢင်းပဵၼ်ပွတ်ႇၵႂ်ႈသေယူတ်းယႃတူဝ်ဝႆႉတီႈႁူင်းယႃတူၼ်ႈတီး။ မေႃယႃမၵ်းမၼ်ႈပဵၼ် ၽူႈပႂ်ႉတူၺ်းၶူဝ်ႊဝိတ်ႉ -19 ။ ၽွင်းတိုၵ်ႉသူင်ႇၼမ်ႉမုၵ်ႈဝႆႉသေ ပႆႇလႆႈႁူႉၶေႃႈတွပ်ႇၼၼ်ႉ မၼ်းၼၢင်းလူႉတၢႆၵႂႃႇပႅတ်ႈ။

Dr. ၼိၼ်းဢီးၽိဝ်ႇ ၵႅမ်ၽူႈၸီႉသင်ႇ ႁွင်ႈၵၢၼ်ပၢႆးယူႇလီ ၸႄႈမိူင်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မၼ်းပဵၼ် တၢင်းပဵၼ်ပွတ်ႇ။ ဢွၵ်ႇမိူၼ်ၾၢင်ႁၢင်ႈၶူဝ်ႊဝိတ်ႉဝႆႉလႄႈ ၵုမ်းတူဝ်ဝႆႉတီႈႁူင်းယႃ ၸဝ်ႈၸၢမ်ႇထုၼ်း ။ လွင်ႈဝႃႈ ပဵၼ်တၢင်း ပဵၼ်ႁႃႉ ဢမ်ႇပဵၼ်ဢၼ်ဝႃႈၼၼ်ႉ ပႆႇလႆႈၵႂၢမ်းတွပ်ႇ။ ယွၼ်ႉတိုၵ်ႉသူင်ႇၵူတ်ႇထတ်းဝႆႉယူႇ” ဝႃႈၼႆ။

ၼၢင်းယိင်းဢၼ်လႆႈလူႉတၢႆၵႂႃႇၼၼ်ႉ ဢမ်ႇမီးပိုၼ်း ဢွၵ်ႇၼွၵ်ႈမိူင်း၊ ၵူၺ်းၵႃႈ လုၵ်ႈၸၢႆးမၼ်းၼၢင်းတိုၵ်ႉလုၵ်ႉမိူင်းထႆး ပွၵ်ႈထိုင်ႁိူၼ်း မိူဝ်ႈဝၼ်းတီႈ 5/3/2020 ၼၼ်ႉၵူၺ်း။

ယွၼ်ႉမၼ်းၼၢင်း ပဵၼ်ဢႆ၊ ပဵၼ်ပွတ်ႇ (အဆုတ်ရောင်ရောဂါ) ၼႆသေ လႆႈသူင်ႇမႃးယူတ်းယႃတူဝ်လႄႈ ၵုမ်းပႂ်ႉတူၺ်းငဝ်းလၢႆး တၢင်းပဵၼ် တီႈႁူင်းယႃ လူင်ၸဝ်ႈၸၢမ်ႇထုၼ်း မိူဝ်ႈဝၼ်းတီႈ 23/4/2020 ယၢမ်းၵၢင်ၶိုၼ်းမွၵ်ႈ 11 မူင်းၶိုင်ႈ ဝႃႈၼႆ။

Dr. ၼိၼ်းဢိၽိဝ်ႇ သိုပ်ႇလၢတ်ႈတီႈၽူႈတွႆႇႁွၵ်ႈဝႃႈ “ ၸွင်ႇမီးၸိူဝ်ႉမႅင်း ဢမ်ႇမီးဢၼ်ဝႃႈၼၼ်ႉ တေလႆႈပႂ်ႉတူၺ်း ထႅင်ႈ 2-3 ဝၼ်း ၵွၼ်ႇၸင်ႇတေႁူႉ” ဝႃႈၼႆ။

တူဝ်တၢႆမၼ်းၼၢင်းၼၼ်ႉတႄႉ ယူႇတီႈၽူႈမီးပုၼ်ႈၽွၼ်းတီႈႁူင်းယႃၸဝ်ႈၸၢမ်ႇထုၼ်း လႆႈပူၼ်ႉတူဝ် ၽဝ်ပၼ် မိူဝ်ႈဝၼ်းတီႈ 28 မိူဝ်ႈဝႃး ၵမ်းလဵဝ် ဝႃႈၼႆ။

တီႈႁူင်းယႃ ၸဝ်ႈၸၢမ်ႇထုၼ်းၼႆႉ မီးၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ – 19 ဝႆႉ 2 ၵေႃႉ။ တႃႇၵေႃႉၼိုင်ႈ ပဵၼ်ၽူႈ ၸၢႆး ၵူတ်ႇထတ်းတူၺ်းဢမ်ႇမီးၸိူဝ်ႉမႅင်းယဝ်ႉလႄႈ လႆႈလူင်းႁူင်းယႃ မိူဝ်ႈဝၼ်း တီႈ 27/4/2020 ယဝ်ႉသေ ၵႂႃႇၵုမ်းတူဝ်ဝႆႉထႅင်ႈ 21 ဝၼ်းၸင်ႇတေၸၢင်ႈပွၵ်ႈႁိူၼ်း။

တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ်ၼႆႉ တင်းမူတ်းမီးၵႂႃႇ 150 ၵေႃႉ၊ လူႉတၢႆ 5 ၵေႃႉ၊ တိုၵ်ႉ ယူတ်းယႃဝႆႉယူႇ 129 ၵေႃႉ၊ ယႃၶႅၼ်း16 ၵေႃႉ။ ၼႂ်းမိူင်းတႆးသမ်ႉမီးၵူၼ်းၸပ်းတၢင်းပဵၼ် 7 ၵေႃႉ။ ပွတ်းႁွင်ႇ 2 ၵေႃႉ၊ ပွတ်းၸၢၼ်း 2 ၵေႃႉ ၊ ပွတ်းဢွၵ်ႇၶူင်း 3 ၵေႃႉ ဝႃႈၼႆ။