ၸဝ်ႈၼႃႈတီႈၶႄႇ ဢၼ်ဢဝ်ႁူမ်ႇလူမ်ႈၸွမ်းလႅၼ်လိၼ်တႆး-ၶႄႇ ပွတ်းမိူင်းမၢဝ်းၼၼ်ႉ ဢဝ်ၶိူင်ႈၵမ်ႉၵႅမ်ပၢႆးယူႇလီ ၊ ၶိူင်ႈတီႉၵူၼ်းႁၢႆႉ ၸိူဝ်းၼႆႉ တွၼ်ႈပၼ် RCSS/SSA တီႈလႅၼ်လိၼ်တႆး – ၶႄႇ တီႈၼိုင်ႈ။
ဝၼ်းတီႈ 24/4/2020 ၽူႈမီးပုၼ်ႈၽွၼ်း ၾၢႆႇႁူမ်ႇလူမ်ႈ တပ်ႉပႂ်ႉလႅၼ်လိၼ် မိူင်းၶႄႇ ဢၼ်ယူႇ ၼႂ်းၼႃႈလိၼ်ၽွင်းငမ်းတူဝ်ၵဝ်ႇတႂ်ႈၶူင်း၊ ထုင်ႉမိူင်းမၢဝ်း ၼၼ်ႉ ႁွတ်ႈၽႅဝ်လႅၼ်လိၼ် တႆး – ၶႄႇ တီႈၼိုင်ႈသေ တွၼ်ႈပၼ် ၶိူင်ႈၵမ်ႉၵႅမ် လွင်ႈပၢႆးယူႇလီ ၶိူင်ႈထတ်းလူမ်းမႆႈ၊ ၽႃတူမ်းပၢၵ်ႇ၊ ၶိူင်ႈလၢင်ႉ မိုဝ်း၊ ၶိူင်ႈတီႉၵူၼ်းႁၢႆႉ ပၼ် တီႈ RCSS/ SSA ။
ၽူႈၶၢၼ်ပၢၵ်ႇ ၶွင်ႇသီႇဢဝ်ၶိုၼ်းၸိုင်ႈတႆး ၸဝ်ႈသိုၵ်းဢုမ်ႈၶိူဝ်း ၵေႃႈဝႃႈ လွင်ႈၼႆႉၸႂ်ႈတႄႉ ဝႃႈၼႆ။
ၵူၼ်းယူႇပိုၼ်ႉတီႈ ၽူႈၶဝ်ႈပၢင်ႁပ်ႉဢဝ်ၶူဝ်းၶွင်တီႈထုင်ႉမၢဝ်း ၵေႃႉၼိုင်ႈလၢတ်ႈဝႃႈ “ ဢၼ်မႃးၼႆႉ ပဵၼ် တပ်ႉႁူမ်ႇလူမ်ႈလႅၼ်လိၼ်ဢေႃႈ။ ၽူႈမီးပုၼ်ႈၽွၼ်း တၢင်းၾင်ႇမိူင်းၶႄႇ ပွတ်းထုင်ႉမၢဝ်း မႃးၸွႆႈထႅမ် ၶိူင်ႈၵမ်ႉၵႅမ် လွင်ႈပၢႆးယူႇလီ တႃႇ ႁႄႉၵင်ႈတၢင်း ပဵၼ်ၶူဝ်ႊဝိတ်ႉ – 19 ၼႆႉၶႃႈဢေႃႈ” ဝႃႈၼႆ။
ႁွင်ႈၵၢၼ် ပိုၼ်ၽၢဝ်ႇ RCSS/SSA တႆးလွတ်ႈလႅဝ်းၵေႃႈဢွၵ်ႇၶၢဝ်ႇဝႆႉဝႃႈ – ၸဝ်ႈၼႃႈတီႈၶႄႇ မိူင်းမၢဝ်း မႃးတွၼ်ႈ လဝ်ႈၾႆး(ဢယႅတ်ႉပျၢၼ်ႇ) 3 ပုင်းလူင်၊ ၶိူင်ႈၵမ်ႉၵႅမ် တီႉၺွပ်းၵူၼ်းႁၢႆႉ 3 ၸုမ်ႇ၊ သုမ်ႉၽႃႈယၢင် 3 ဢၼ်၊ ၽႃႈတူမ်းသူပ်း 1800 ဢၼ် ၊ သိူဝ်ႈဢုၼ်ႇ ၼိုင်ႈထူင် ဝႃႈၼႆ။
ၼႃႈလိၼ်သိုၵ်း 701 RCSS/SSA ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး ၼႆႉတူင်ႉၼိုင်ယူႇသဝ်းၼႂ်း ထုင်ႉမၢဝ်းမႃးၸဵမ်လႂ်။ မိူဝ်ႈပီ 2012 ဝၢႆးၵိုတ်းတိုၵ်း ဢဝ်ငမ်းယဵၼ် တင်းလူင်ပွင်ၸိုင်ႈမၢၼ်ႈ ၼေႇပျီႇ တေႃႇ ၸၼ်ႉမိူင်းႁူမ်ႈတုမ်ယဝ်ႉဢမ်ႇႁိုင် ၺႃးသိုၵ်း မၢၼ်ႈႁႅၼ်းသိုၵ်းလေႃႇတိုၵ်း၊ တႄႇၼၼ်ႉမႃး ဢမ်ႇပိုတ်ႇတီႈယူႇတၼ်းသဝ်း ပဵၼ်တၢင်းၵၢၼ်ၶိုၼ်း တေႃႇထိုင်ဝၼ်းမိူဝ်ႈၼႆႉ။
