ၵူၼ်းမိူင်းတႆး ၸိူဝ်းၵႂႃႇႁဵတ်းၵၢၼ် မိူင်းၶႄႇပွၵ်ႈမႃး ထိုင်ၶိုၼ်း ၸႄႈဝဵင်းလွႆလႅမ် မိူင်းတႆးပွတ်းၸၢၼ်း ႁိမ်း 100 ၵေႃႉ၊ ဢမ်ႇႁူႉသဵၼ်ႈမၢႆတႅတ်ႈတေႃး ႁၢင်ႈႁႅၼ်းဢမ်ႇၶိုတ်းတၼ်း၊ လႆႈၸူၵ်းငိုၼ်း ၸႂ်ႉၸၢႆႇၵိၼ် ႁင်းၵူၺ်းၵေႃႈမီး။

ဝၼ်းတီႈ 28/4/2020 ၼႆႉ ႁႅင်းၵၢၼ် ၵူၼ်းမိူင်းတႆး ၵႂႃႇႁဵတ်းၵၢၼ်မိူင်းၶႄႇ ပွၵ်ႈမႃးမီးယူႇတီႈ ဝဵင်းလွႆလႅမ် မိူင်းတႆး ပွတ်း ၸၢၼ်း 97 ၵေႃႉ။

ၶဝ်ၸိူဝ်းၼႆႉ ဢမ်ႇမီးၵၢၼ်ငၢၼ်း ၾၢႆႇၶႄႇ သူင်ႇပွၵ်ႈၶိုၼ်း မႃးတၢင်း မူႇၸေႊ၊ လူင်ပွင်ၸိုင်ႈ ဢဝ်တၢင်ႇၵႃး 10 လေႃႉသေ တေႃႉသူင်ႇ။ ၽူႈမီးပုၼ်ႈၽွၼ်း ၼႂ်းပိုၼ်ႉတီႈ ႁပ်ႉတၢင်းလူႇၶၢမ်ႇသေ ၸွႆႈထႅမ် လွင်ႈယူႇလွင်ႈသဝ်း၊။

ၼၢင်းမျႃႉထူၺ်း ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းလွႆလႅမ် လၢတ်ႈတီႈ ၽူႈတွႆႇႁွၵ်ႈဝႃႈ “ တေႃႈ လဵဝ် ဢၼ်ႁႅင်းၵၢၼ်ပွၵ်ႈမႃးၼႆႉ ယူႇတီႈလူင်ပွင်ၸိုင်ႈသေ ၶပ်းၶိုင်ဝႆႉ ဢွင်ႈတီႈယူႇပၼ်။ လွင်ႈၵိၼ်ယႅမ်ႉၸိူဝ်းၼႆႉတႄႉ ၼမ်လႄႈဢေႇ တူဝ်ၸဝ်ႈၵဝ်ႇၵေႃႈ လူဝ်ႇၸွႆႈၽွင်ႈၶႃႈယဝ်ႉ။ ၸွမ်းၼင်ႇ ၽူႈမီးပုၼ်ႈၽွၼ်းၶဝ် လူႇၶၢမ်ႇလႆႈမႃး တီႈၽူႈမီးၼမ်ႉၸႂ် ၸေႇတၼႃႇၵမ်ႉၸွႆႈၼၼ်ႉ ဢဝ်ၵမ်ႉၸွႆႈထႅမ်ပၼ်ၶဝ်ယူႇ”- ဝႃႈၼႆ။

ႁႅင်းၵၢၼ် ဢၼ်ပွၵ်ႈမႃးၸိူဝ်းၼၼ် ၵမ်ႈၼမ် ယူႇသဝ်းၸွမ်းသၢပ်ႇဝဵင်းပၢင်လူင် တၢင်းပွတ်း ဢိူင်ႇ ႁၢႆးၼၢင်း၊ သႁွင်း၊ တၢၼ်ႇဢႄ တင်း ပၢင်မူင်ႈ ၸိူဝ်းၼႆႉ။ ၵူၼ်းတင်း 97 ၵေႃႉၼႆႉ ယၢမ်းလဵဝ် မႃးယူႇဝႆႉတီႈႁူင်းႁဵၼ်းလူင်ပွင်ၸိုင်ႈ ၸၼ်ႉသုင် ၸႄႈဝဵင်းလွႆလႅမ်လႄႈ ႁူင်းႁဵၼ်း ပူၵ်းပွင် ၸၢဝ်းၶိူဝ်းလႅၼ်လိၼ် ၼတလ ၸိူဝ်းၼႆႉ။

တေႃႈလဵဝ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ – 19 ၼႂ်းမိူင်းႁူမ်ႈတုမ်သမ်ႉ တင်းမူတ်းမီးၵႂႃႇ 146 ၵေႃႉ၊ တၢႆ 5 ၵေႃႉ၊ ယႃၶႅၼ်း 16 ၵေႃႉ။ ၼႂ်းၵူၼ်းပဵၼ် 146 ၵေႃႉၼၼ်ႉ ပႃးၵူၼ်းမိူင်းတႆး 7 ၵေႃႉ။ ၸိုင်ႈတႆးပွတ်းႁွင်ႇ 2 ၵေႃႉ၊ ပွတ်းၸၢၼ်း 2 ၵေႃႉလႄႈ ပွတ်းဢွၵ်ႇၶူင်း 3 ၵေႃႉ။