ႁႅင်းၵၢၼ်မိူင်းႁူမ်ႈတုမ် ဢၼ်ထုၵ်ႇပႂ်ႉတူၺ်းငဝ်းလၢႆးတၢင်းပဵၼ် ၶူဝ်ႊဝိတ်ႉ – 19 တႃႇ 21 ဝၼ်း တီႈ(မိုးကုတ်ဝိပ ဿနာရိပ်သာ) တႃႈၶီႈလဵၵ်း ႁူဝ်ၵူၼ်းၼပ်ႉပၢၵ်ႇၼၼ်ႉ ၽူႈမီးပုၼ်ႈၽွၼ်းၶဝ် သူင်ႇပွၵ်ႈႁိူၼ်းမူတ်းယဝ်ႉ ဝႃႈၼႆ။
မိူဝ်ႈဝႃး လႄႈ မိူဝ်ႈၼႆႉ ဝၼ်းတီႈ 28/4/2020 ယၢမ်းၵၢင်ၼႂ် ယူႇတီႈၶွမ်ႊမတီႊ ၵုမ်းထတ်းတၢင်းပဵၼ် ၶူဝ်ႊဝိတ်ႉ – 19 ဝဵင်းတႃႈၶီႈလဵၵ်း ပွႆႇတူဝ် ၵူၼ်းၸိူဝ်းၺႃးၵုမ်းၵမ်တူဝ် ထတ်းပၢႆးယူႇလီ ၶူဝ်ႊဝိတ်ႉ – 19 ဝႆႉ တီႈဝဵင်းတႃႈၶီႈလဵၵ်း ၶၢဝ်းတၢင်း 21 ဝၼ်း ၸုပ်ႈသႅၼ်းၵဝ်ႇလႄႈ ၸုပ်ႈသႅၼ်းဢၼ်ထႆးသူင်ႇပွၵ်ႈမႃးမႂ်ႇ ႁူမ်ႈၵၼ်တင်းမူတ်း 300 ၵေႃႉပၢႆ ၼၼ်ႉ သူင်ႇပွၵ်ႈၶိုၼ်း ဝၢၼ်ႈၽႂ်မိူင်းမၼ်းၶိုၼ်းယဝ်ႉ ဝႃႈၼႆ။
ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈယဝ်ႉ။ မိူဝ်ႈဝႃး လႆႈသူင်ႇပွၵ်ႈမိူဝ်း ဝၢၼ်ႈၽႂ် ဝဵင်းမၼ်း တင်းမူတ်း 255 ၵေႃႉ။ ၼႂ်းၼၼ်ႉ ဢၼ်လုၵ်ႉတၢင်းမႄႈသၢႆမႃး 62 ၵေႃႉ၊ လႆႈသူင်ႇပွၵ်ႈမိူဝ်းမူတ်းယဝ်ႉ။ တီႈတႃႈၶီႈလဵၵ်းတႄႉ ဢမ်ႇမီးသေၵေႃႉယဝ်ႉ၊ လိူၼ်မေႊတေမႃးၼႆႉတႄႉ ပေႃးထႆး သူင်ႇမႃးထႅင်ႈ တေဢမ်ႇပႆႇႁပ်ႉ၊ ႁၢင်ႈႁႅၼ်းတေ သူင်ႇပွၵ်ႈမိူဝ်းႁိူၼ်းၽႂ်မၼ်းၵမ်းလဵဝ်ယဝ်ႉ” – ဝႃႈၼႆ။
ယၢမ်းလဵဝ် လူင်ပွင်ၸိုင်ႈမိူင်းထႆး ပိုၼ်ၽၢဝ်ႇယိုတ်ႈၶၢဝ်းယၢမ်း ငဝ်းလၢႆးလမ်ႇလွင်ႈၶိုၵ်ႉၶၵ်ႉ တင်ႈတႄႇ ဝၼ်းတီႈ 27 ၼႆႉၵႂႃႇထႅင်ႈလိူၼ် ႞ ။
ႁူင်းၵၢၼ်ပႆႇၸၢင်ႈပၼ်ႇလႄႈ ၵူၼ်းဢမ်ႇမီးၵၢၼ် မိူင်းမၢၼ်ႈ မိူင်းတႆး ၸၢင်ႈတေလႆႈပွၵ်ႈၶိုၼ်းမိူင်းထႅင်ႈ ၼပ်ႉႁူဝ်မိုၼ်ႇ။
တေႃႈလဵဝ် ၼႂ်းမိူင်းႁူမ်ႈတုမ်ၼႆႉ ၵူၼ်းၸပ်းတၢင်းပဵၼ်ၸိူဝ်ႉမႅင်းၶူဝ်ႊဝိတ်ႉ – 19 တင်းမူတ်းမီး 146 ၵေႃႉ၊ လူႉတၢႆ 5 ၵေႃႉ၊ ယႃၶႅၼ်း 16 ၵေႃႉယဝ်ႉ။ ၼႂ်းၵူၼ်းပဵၼ် 146 ၵေႃႉၼၼ်ႉ ပႃးၵူၼ်းမိူင်းတႆး 7 ၵေႃႉ။ ၼႂ်းၸိုင်ႈတႆးပွတ်းႁွင်ႇ 2 ၵေႃႉ၊ ပွတ်း ၸၢၼ်း 2 ၵေႃႉလႄႈ ပွတ်းဢွၵ်ႇၶူင်း 3 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ