ၵူၼ်းႁိူၼ်းၵူၼ်းယေး ၽူႈၸပ်းတၢင်းပဵၼ်ၶူဝ်ႊဝိတ်ႉ – 19 တီႈဝဵင်းမူႇၸေႊၼၼ်ႉ ယၢမ်းလဵဝ် ၺႃးၵုမ်းၵမ် ၵၵ်းၶင်ၵိုၵ်း ႁိူၼ်းတင်းသဵင်ႈသေ ထုၵ်ႇပၢႆးယူႇလီ ပႂ်ႉတူၺ်းငဝ်းလၢႆး သေဢမ်ႇၵႃး ပွၵ်ႉၵၢတ်ႇ ဝဵင်းမူႇၸေႊၵေႃႈ ပိၵ်ႉဢိုတ်း၊ ႁၢမ်ႈၵူၼ်း ၶဝ်ႈဢွၵ်ႇၵႂႃႇမႃးဝႆႉ ၸူဝ်ႈၶၢဝ်း။
ဝၼ်းတီႈ 25/4/2020 ၶွမ်ႊမတီႊ ၾၢႆႇၵုမ်းၵမ် ၵူတ်ႇထတ်း ၵႂၢတ်ႇလၢင်ႉ တၢင်းပဵၼ်ၶူဝ်ႊဝိတ်ႉ – 19 တီႈဝဵင်းမူႇၸေႊ ပူင် သင်ႇ ၵူၼ်းႁိူၼ်းၵူၼ်းယေး ၼႂ်းမုင်ႉႁေႃႁိူၼ်း လႄႈ ၵူၼ်းၵဵဝ်ႇၶွင်ႈ/ ပီႈၼွင်ႉဝၢၼ်ႈတႂ်ႈဝၢၼ်ႈၼိူဝ် ၽူႈၸပ်းတၢင်း ပဵၼ် ၶူဝ်ႊဝိတ်ႉ -19 ၼၼ်ႉၺႃး ၵုမ်းၵမ်တူဝ် ထတ်းပၢႆးယူႇလီဝႆႉသဵင်ႈ သေဢမ်ႇၵႃး ပွၵ်ႉဢၼ်မၼ်း ၼၢင်းယူႇ ဢၼ်ပဵၼ် ပွၵ်ႉၵၢတ်ႇ ဝဵင်းမူႇၸေႊၵေႃႈ ႁၢမ်ႈၶဝ်ႈႁၢမ်ႈဢွၵ်ႇ ထတ်းထွင် ပႂ်ႉတူၺ်းငဝ်းလၢႆး ပၢႆးယူႇလီ ဝႆႉယူႇ။ ၵူၼ်းႁိူၼ်းၵူၼ်းယေး ထဝ်ႈယိင်း ၽူႈၸပ်းတၢင်းပဵၼ်မီး 6 ၵေႃႉ၊ ပေႃးသွၼ်ႇပႃးပီႈၼွင်ႉပွၵ်ႉၾၢႆႇၸၢၼ်း ပီႈၼွင်ႉဢၼ်ၵွင်ႉၵၢႆႇမၼ်းၼၢင်းမီး 21 ၵေႃႉ ဝႃႈၼႆ။
ၸၢႆးႁိၼ်လဵၵ်း ၸုမ်းၶၢဝ်ႇ ထုင်ႉႁူၺ်ႈလီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၽိူဝ်ႇဝႃႈလႆႈႁူႉၶၢဝ်ႇဢွၵ်ႇ မႃးၵေႃႈ တီႈပွၵ်ႉ ၵၢတ်ႇၼၼ်ႉ လႆႈ Lockdown ဝႆႉၸူဝ်ႈၶၢဝ်း တႄႇဢဝ် မိူဝ်ႈဝႃးၵၢင်ၶမ်ႈမႃးၵမ်းလဵဝ်ၶႃႈယဝ်ႉ။ ၵူၼ်းႁိူၼ်း ဢၼ်ၵႂႃႇပႂ်ႉတူၺ်း ယႃႈထဝ်ႈတီႈႁူင်းယႃ မီး 2 ၵေႃႉၵူၺ်း။ လိူဝ်ၼၼ်ႉတႄႉ ယူႇႁိူၼ်းဝႆႉ ” – ဝႃႈၼႆ။
ဝၼ်းတီႈ 24/4/2020 ယၢမ်းၵၢင်ၶမ်ႈ 8 မူင်းၼၼ်ႉ ယူႇတီႈႁွင်ႈၵၢၼ်ပၢႆးယူႇလီ မိူင်းႁူမ်ႈတုမ်ပိုၼ်ၽၢဝ်ႇ ၵူၼ်းၸပ်း တၢင်း ပဵၼ် ၼႂ်းမိူင်းႁူမ်ႈတုမ် ထႅင်ႈ 4 ၵေႃႉ ၼႂ်းၼၼ်ႉ တႃႇ 3 ၵေႃႉ ပဵၼ်ၵူၼ်း တႃႈၵုင်ႈ၊ ၵေႃႉၼိုင်ႈသမ်ႉ ပဵၼ်ၵူၼ်းမိူင်းတႆး ယူႇ မူႇၸေႊ ၸိုင်ႈတႆး ပွတ်းႁွင်ႇ။ ပဵၼ်ထဝ်ႈယိင်း ဢႃယု 87 ပီ ။
ထဝ်ႈယိင်း ၵေႃႉတိတ်းၸပ်းတၢင်းပဵၼ် ၶူဝ်ႊဝိတ်ႉ – 19 ၼၼ်ႉ ဢိင်ၼိူဝ်ၵူၼ်းႁိူၼ်းၵူၼ်းယေးမီးလွင်ႈၵွင်ႉၵၢႆႇ ၶဝ်ႈဢွၵ်ႇ တင်း ပီႈၼွင်ႉ ပွၵ်ႉၸၢၼ်း ဝဵင်းမူႇၸေႊလႄႈ ၶဝ်ၸိူဝ်းၼၼ်ႉၵေႃႈ ၺႃးၵုမ်း ၶင်တူဝ်ၸဝ်ႈၵဝ်ႇ ဝႆႉတီႈႁိူၼ်းသေ ယူႇတီႈ မေႃယႃ တေမႃးၵူတ်ႇထတ်း တူၺ်းပၢႆးယူႇလီ ၶဝ်ဝႃႈၼႆ။
တေႃႈလဵဝ် ၼႂ်းမိူင်းတႆးၼႆႉ ၵူၼ်းၸပ်းတၢင်းပဵၼ် ၶူဝ်ႊဝိတ်ႉ – 19 တင်းမူတ်းမီးၵႂႃႇ 7 ၵေႃႉယဝ်ႉ။ ၼႂ်းၼၼ်ႉ ၵူၼ်း ၵျွၵ်ႉ မႄး ၵေႃႉၼိုင်ႈ(ၵႂႃႇယႃတူဝ် ဝႆႉတီႈႁူင်းယႃလႃႈသဵဝ်ႈ) ၊ ၵူၼ်းမူႇၸေႊ ၵေႃႉၼိုင်ႈ၊ ၵူၼ်းတူၼ်ႈတီး 2 ၵေႃႉ၊ ၵူၼ်းမိူင်းၽျၢၵ်ႈ ၵေႃႉၼိုင်ႈလႄႈ ၵူၼ်းတႃႈၶီႈ လဵၵ်း 2 ၵေႃႉ သမ်ႉ သူင်ႇၵႂႃႇ ယႃတူဝ်ဝႆႉတီႈ ႁူင်းယႃလူင်ၵူၼ်းမိူင်း ၵဵင်းတုင် ဝႃႈၼႆ။
ပတ်းပိုၼ်ႉမိူင်းႁူမ်ႈတုမ်သမ်ႉ ၵူၼ်းၸပ်း တၢင်း ပဵၼ် ၶူဝ်ႊဝိတ်ႉ 19 မီးၵႂႃႇ 144 ၵေႃႉ၊ လူႉတၢႆ 5 ၵေႃႉလႄႈ ယႃၶႅၼ်း 9 ၵေႃႉ ၊ ဢၼ်ထုၵ်ႇ ထၢင်ႇထိူမ်သေ ၵူတ်ႇထႆးပၢႆယူႇလီဝႆႉယူႇ တင်းမူတ်း မီးႁူဝ်ႁဵင်။ တင်းလုမ်ႈၾႃႉတႄႉ ၵူၼ်းၸပ်း မီးႁိမ်း 3 လၢၼ်ႉ၊ ၵူၼ်းတၢႆ မီးႁိမ်း 2 သႅၼ်၊ ၵူၼ်းယႃၶႅၼ်းသမ်ႉ မီး 8 သႅၼ်ပၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ