ၸိုင်ႈတႆးပွတ်းၸၢၼ်း ၼႂ်းၸႄႈဝဵင်းမိူင်းၼၢႆး ၾၢႆႇပၢႆးယူႇလီ ထၢင်ႇထိူမ်ဝႃႈ ၵူၼ်းၵေႃႉ႞ မိူၼ်ၾၢင်ႁၢင်ႈ ၸပ်းတၢင်းပဵၼ် ၶူဝ်ႊဝိတ်ႉ 19 ၼႆသေ ႁွင်ႉၵၵ်းၶင်တူဝ် – ဢဝ်လိူတ်ႈ၊ ဢၢင်ႈဢၢၵ်ႇ ၼမ်ႉလၢႆး သူင်ႇၵႂႃႇၵူတ်ႇထတ်း တီႈသုၼ်ပၢႆးယူႇလီ မိူင်းမၢၼ်ႈ။

ဝၼ်းတီႈ 24/4/2020 ၶၢဝ်းယၢမ်းမွၵ်ႈ 12 မူင်းပၢႆၼၼ်ႉ ၼၢင်းယိင်း ဢႃယု 18 ပီ ၵေႃႉၼိုင်ႈ မီးလူမ်းၼၢဝ်၊ ဢႆ ၶေႃးၸဵပ်း ပႅၵ်ႇပိူင်ႈဝႆႉလႄႈ ၾၢႆႇပၢႆးယူႇလီ ၵၵ်းတူဝ် ပႂ်ႉတူၺ်းငဝ်းလၢႆးတၢင်းပဵၼ် မၼ်းၼၢင်းယူႇ တီႈႁူင်းယႃလူင်ၵူၼ်းမိူင်း ဝဵင်းမိူင်းၼၢႆး ဝႆႉယူႇ။

ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမိူင်းၼၢႆး လၢတ်ႈတီႈ ၽူႈတွႆႇႁွၵ်ႈဝႃႈ “ မၼ်းၼၢင်း ဢမ်ႇပႆႇၸႂ်ႈၵူၼ်းပဵၼ် တိုၵ်ႉပဵၼ်ၵူၼ်းပႂ်ႉတူၺ်းငဝ်းလၢႆးတၢင်းပဵၼ်ၵူၺ်း။ မၼ်းၼၢင်းမီး လူမ်းၼၢဝ်(တူဝ်မႆႈ)၊ ဢႆ၊ ၶေႃးၸဵပ်း ၾၢင်ႁၢင်ႈ မၼ်းၼၢင်းပႅၵ်ႇပိူင်ႈဝႆႉလႄႈ လႆႈသူင်ႇမၼ်းၼၢင်း ၵႂႃႇႁူင်းယႃဢေႃႈ။ လွင်ႈဝႃႈ မၼ်းၼၢင်းပဵၼ် တၢင်းပဵၼ်ၶူဝ်ႊဝိတ်ႉ -19 ဢၼ်ဝႃႈၼၼ်ႉ ပႆႇၸၢင်ႈ ဝႃႈလႆႈၼင်ႇၵဝ်ႇ။ တိုၵ်ႉထတ်းတူၺ်းတၢင်းပဵၼ်မၼ်းၼၢင်းဝႆႉယူႇၶႃႈမိူဝ်ႈလဵဝ်” – ဝႃႈၼႆ။

ၵေႃႉထုၵ်ႇထၢင်ႇထိူမ်ၸပ်းတၢင်းပဵၼ်ၼႆႉ ပဵၼ်ၽူႈယိင်း ဢႃယု 18 ပီ ပဵၼ်ၵူၼ်းဝၢၼ်ႈလွႆၶဵဝ် ဢိူင်ႇလွႆၶဵဝ်။ မၼ်းၼၢင်း လုၵ်ႉမိူင်းထႆး ပွၵ်ႈမႃးတၢင်း ဝဵင်းတႃႈၶီႈလဵၵ်း၊ ထိုင်မိူင်းၼၢႆး မိူဝ်ႈဝၼ်းတီႈ 17/4/2020 ။ ဝၼ်းတီႈ 22/4/2020 ၵုမ်းၵမ်တူဝ် ထတ်းထွင်ပၢႆးယူႇလီ ဝႆႉတီႈ ႁူင်းယႃမိူင်းၼၢႆး ။

ႁွင်ႈၵၢၼ်ပၢႆးယူႇလီ ၸႄႈဝဵင်းမိူင်းၼၢႆး ပိုၼ်ၽၢဝ်ႇဢွၵ်ႇဝႆႉဝႃႈ “ မၼ်းၼၢင်းၼႆႉ လႆႈပႂ်ႉတူၺ်းငဝ်းလၢႆး (Patient Under Investigation PUI) တီႈႁူင်းယႃ မိူင်းၼၢႆးဝႆႉယဝ်ႉ။ တေႃႈလဵဝ် ပၢႆးယူႇလီမၼ်းၼၢင်းၵေႃႈ ၶႅမ်ႉလႅပ်ႈယူႇ။ ယဝ်ႉၵေႃႈ ယူႇတီႈ မေႃယႃၶဝ် လႆႈဢဝ်ၼမ်ႉလၢႆး၊ ၼမ်ႉမုၵ်ႈသေ သူင်ႇၵူတ်ႇထတ်းဝႆႉ” – ဝႃႈၼႆ။

တေႃႈလဵဝ် ၼႂ်းမိူင်းတႆးၼႆႉ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ -19 ၼႆႉ တင်းမူတ်းမီးၵႂႃႇ 7 ၵေႃႉ။ မိူင်းတႆးပွတ်းႁွင်ႇ 2 ၵေႃႉ၊ ပွတ်းၸၢၼ်း 2 ၵေႃႉလႄႈ ပွတ်းဢွၵ်ႇၶူင်း 3 ၵေႃႉ ။ ပတ်းပိုၼ်ႉမိူင်းႁူမ်ႈတုမ် တႄႉ ၵူၼ်းၸပ်းတၢင်းပဵၼ် တေႃႇ ထိုင်ဝၼ်းမိူဝ်ႈၼႆႉ မီး 144 ၵေႃႉ၊ တၢႆ 5 ၵေႃႉ ၊ ယႃၶႅၼ်း 9 ၵေႃႉ ၊ 130 ၵေႃႉ တိုၵ်ႉယူတ်းယႃတူဝ်ဝႆႉ။