ၸွမ်ၽွင်းလူင်မိူင်းတႆး ၻွၵ်ႊတိူဝ်ႊလိၼ်းထုတ်ႉလႄႈ ၽွင်းလူင် 4 ၸဝ်ႈ ၵုမ်းၶင်တူဝ်ၸဝ်ႈၵဝ်ႇ ပႂ်ႉတူၺ်းတၢင်းပဵၼ် ၶူဝ်ႊဝိတ်ႉ – 19 ဝၢႆးလင်ၶၢဝ်းတၢင်း ၸိုင်ႈတႆးပွတ်းဢွၵ်ႇ။
တင်ႈတႄႇဝၼ်းတီႈ 17/4/2020 ၸွမ်ၽွင်းလူင်ၸႄႈမိူင်းတႆး၊ ႁူဝ်ပဝ်ႈသၽႃးၸႄႈမိူင်းတႆးလႄႈ ၸုမ်းလူင်ပွင်ၸိုင်ႈ ၸႄႈ မိူင်းတႆး ႁူမ်ႈၵၼ် ဢွၵ်ႇၶၢဝ်းတၢင်းၼႂ်းမိူင်းတႆး တၢင်းပွတ်းဢွၵ်ႇၶူင်း ပိူဝ်ႈတႃႇၵူတ်ႇထတ်းတူၺ်းငဝ်းလၢႆး ႁႄႉၵင်ႈတၢင်း ပဵၼ်ၶူဝ်ႊဝိတ်ႉ 19 လႄႈတႃႇၸႅၵ်ႇပၼ် ၶဝ်ႈၼမ်ႉတၢင်းၵိၼ် ၵူၼ်းမိူင်း ၸိူဝ်းတုမ်ႉတိူဝ်ႉယွၼ်ႉၶူဝ်ႊဝိတ်ႉ 19 ။
ၼႂ်းၸုမ်းလူင်ပွင်ၸိုင်ႈၼၼ်ႉ ၵူၼ်းႁေႃႈၵႃး ႁူဝ်ပဝ်ႈသၽႃးမိူင်းတႆးလႄႈ ၽူႈၵႅမ်တူဝ် PSO ၽူႈၵွၼ်းပလိၵ်ႈ ၼႂ်းၸႄႈမိူင်းတႆးသမ်ႉ လူမ်းၼၢဝ်ၶိုၼ်ႈသုင်သေ ထုၵ်ႇၵုမ်းၶင်တူဝ်ပႂ်ႉတူၺ်း ပၢႆးယူႇလီဝႆႉတီႈ ႁူင်းယႃလူင်ဝဵင်းၵဵင်းတုင် ။
ဢူးၸူဝ်းၸူဝ်းၸေႃႇ ၽူႈၼမ်းၼႂ်းလူင်ပွင်ၸိုင်ႈ ၸႄႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်သွင်ၵေႃႉ ဢၼ်ဢမ်ႇယူႇလီ ၼၼ်ႉ လႆႈဢဝ်ၶေႃႈမုလ်း(ၽူၼ်တူတ်ႇ) သေ လႆႈသူင်ႇၵႂႃႇတီႈဝဵင်းတႃႈၵုင်ႈၶႃႈဢေႃႈ။ ၶေႃႈတွပ်ႇမၼ်း ဢွၵ်ႇမႃးမိူဝ်ႈၼႆႉဝႃႈၶဝ် တင်းသွင်ၵေႃႉ ဢမ်ႇၸပ်းတၢင်းပဵၼ်ၶူဝ်ႊဝိတ်ႉ – 19 ” ဝႃႈၼႆ။
ဢၼ်ၵုမ်းတူဝ်ၸဝ်ႈၵဝ်ႇဝႆႉၶၢဝ်းတၢင်း မိူင်းတႆးပွတ်းဢွၵ်ႇၶူင်းၼႆႉပဵၼ် တူဝ်ၸွမ်ၽွင်းလူင်ၸိုင်ႈတႆး တွၵ်ႊတိူဝ်ႊ လိၼ်းထုတ်ႉ၊ ၽွင်းလူင်ၾၢႆႇသဵၼ်ႈတႃႈသၢႆတၢင်း ၶုၼ်ႇယႄးထူၺ်း၊ ၽွင်းလူင်ၾၢႆႇလိူမ်ႈလႆႇ လုင်းသူမ်ၶျႆး၊ ၽွင်းလူင်ၾၢႆႇပၢႆးပိူင်ၵူၼ်း တွၵ်ႊတိူဝ်ႊမဵဝ်းထုၼ်း ၵူၺ်းဢမ်ႇၵႃး ပႃးတင်း ၽွင်းလူင်ၸၢဝ်းၶိူဝ်းမၢၼ်ႈ တွၵ်ႊတိူဝ်ႊ ဢွင်ႇတၢၼ်းမွင်ႇလႄႈ ႁူဝ်ပဝ်ႈသၽႃး ၸႄႈမိူင်းတႆး လုင်းၸၢႆးလူင်းသႅင် ၸိူဝ်းၼႆႉ။
ၶဝ်ၸဝ်ႈ ဢွၼ်ၵၼ်ပွၵ်ႈၽႅဝ်ၶိုၼ်းတီႈဝဵင်း တူၼ်ႈတီး မိူဝ်ႈဝၼ်းတီႈ 20/4/2020 ယၢမ်းၵၢင်ၶမ်ႈ။ ဝၢႆးၼၼ်ႉ ၵုမ်းၶင်တူဝ် ၵဝ်ႇဝႆႉၼႂ်းႁိူၼ်းယေးၽႂ်မၼ်းလႄႈ မၢင်ၸိူဝ်းၵေႃႈ ၵုမ်းၶင်တူဝ်ၵဝ်ႇဝႆႉတီႈႁူင်းလိုဝ်ႈလူင်ပွင်ၸိုင်ႈ ဝႃႈၼႆ။
ဢူးၸူဝ်းၸူဝ်းၸေႃႇ သိုပ်ႇလၢတ်ႈဝႃႈ “ လုၵ်ႈဢွၼ်ႇသွင်ၵေႃႉၼၼ်ႉ ဢမ်ႇမီးၸိူဝ်ႉမႅင်း ၶူဝ်ႊဝိတ်ႉ 19 ၼႆသေတႃႉ ၸုမ်းၸွမ်ၽွင်းလူင်ၶဝ်တႄႉ တေသိုပ်ႇယူႇၵႂႃႇၸွမ်းၼင်ႇ မေႃယႃၸီႉၸမ်ႈပၼ်တၢင်းၶႆႈၸႂ်ၵႂႃႇထႅင်ႈယူႇ” ဝႃႈၼႆ။
ထိုင်မႃး ဝၼ်းတီႈ 22/4/2020 ၼႆႉ ယူႇတီႈႁွင်ႈၵၢၼ်ပၢႆးယူႇလီလႄႈ ၾၢႆႇလဵၼ်ႈႁႅင်း ပိုၼ်ၽၢဝ်ႇဢွၵ်ႇဝႆႉ ၵူၼ်းမိူင်းႁူမ်ႈတုမ် တိတ်းၸပ်းတၢင်းပဵၼ် မီး 121 ၵေႃႉ။ ယႃၶႅၼ်းၶိုၼ်း မီး 7 ၵေႃႉ၊ လူႉတၢႆ မီး 5 ၵေႃႉယဝ်ႉ။ ၼႂ်းၵူၼ်းပဵၼ် 121 ၵေႃႉၼၼ်ႉ ပႃးၵူၼ်းမိူင်းတႆး 6 ၵေႃႉ ၼႂ်းၸိုင်ႈတႆးပွတ်းႁွင်ႇ ၵေႃႉၼိုင်ႈလႄႈ ၸိုင်ႈတႆးပွတ်းၸၢၼ်း 2 ၵေႃႉ ယဝ်ႉၵေႃႈ ၸိုင်ႈတႆးပွတ်း ဢွၵ်ႇၶူင်း 3 ၵေႃႉ ဝႃႈၼႆ။
